Cynnal cofrestru etholiadol - Cymru

Os byddwch yn cael ymateb gan yr etholwr ond nad ydych yn siŵr a yw’n bodloni’r meini prawf cymhwysedd newydd, er enghraifft os yw’r etholwr wedi rhoi gwybod i chi ei fod wedi bod allan o’r wlad am gyfnod o amser, yna mae gennych y pŵer i wneud cais am ragor o wybodaeth er mwyn gwneud penderfyniad. 

Gellir anfon y cais am ragor o wybodaeth naill ai’n electronig neu i gyfeiriad y person. Rhaid iddo nodi: 

• Rhaid i'r person ddarparu gwybodaeth bellach er mwyn i chi benderfynu a yw'n gymwys
• Os na fydd y person yn darparu’r wybodaeth y gofynnwyd amdani erbyn y dyddiad a nodir ar y cyfathrebiad, gallwch benderfynu nad yw’r etholwr yn gymwys i gael ei gofrestru.
• Ni fyddai gan y person hawl i apelio yn erbyn eich penderfyniad o dan yr amgylchiadau hyn
• Nid yw’r cymhwysedd hwnnw i bleidleisio yn etholiadau Comisiynwyr yr Heddlu a Throseddu yn gysylltiedig â chymhwysedd i gofrestru a phleidleisio yn etholiadau’r Senedd ac etholiadau llywodraeth leol. 1

Er mwyn penderfynu a yw'r etholwr yn gymwys i barhau i fod wedi'i gofrestru i bleidleisio yn etholiadau Comisiynwyr yr Heddlu a Throseddu, efallai y byddwch yn ei gwneud yn ofynnol i'r etholwr, os nad yw eisoes wedi gwneud hynny, ddatgan ei fod wedi bod yn y DU ers cyn dyddiad dechrau’r cyfnod gweithredu. Os yw dinesydd yr UE gyda statws preswylydd sefydlog neu statws preswylydd cyn-sefydlog, gellir cymryd hyn fel tystiolaeth eu bod yn bodloni’r meini prawf cymhwysedd newydd. Dylai’r etholwr allu darparu cod rhannu a fydd yn caniatáu i chi weld statws mewnfudo'r etholwr gan ddefnyddio'r gwasanaeth gweld a phrofi . Mae cadarnhad o’r dyddiad y cyrhaeddodd etholwr y DU yn bwysig oherwydd bydd y gwasanaeth gweld a phrofi ond yn rhoi sicrwydd o statws mewnfudo cyfredol y gellir ei gymhwyso hefyd i unigolion yma ar y cynllun teulu a allai fod wedi cyrraedd ar ôl dyddiad dechrau’r cyfnod gweithredu. Gallwch ofyn i unrhyw unigolion o’r fath gadarnhau a gawsant statws preswylydd sefydlog/preswylydd cyn-sefydlog ar y sail eu bod yn aelod sy'n ymuno gyda'u teulu. Pe baent wedi gwneud hynny, ni fyddent yn gymwys o dan y meini prawf cymhwysedd newydd. 

Ni fydd rhai etholwyr yn gallu darparu cod ac, o dan yr amgylchiadau hyn, dylech ofyn am ddatganiad cymhwysedd,  a lle mae ar gael dylai gynnwys unrhyw lythyrau neu ddogfennau a gyhoeddir gan y Swyddfa Gartref sy’n cadarnhau statws mewnfudo cyfredol neu hanesyddol yr etholwr.

Rydym wedi llunio llythyr templed i ofyn am ragor o wybodaeth, y gallwch ei ddefnyddio.

Pan fydd y templed ar gael, gallwch ddod o hyd iddo yma. 

Os oes gennych ymholiad ynglŷn ag unrhyw agwedd ar statws mewnfudo rhywun, dylech gysylltu â’r Swyddfa Gartref: [email protected] (Yn agor mewn ffenestr newydd). Gofynnir i chi gwblhau templed a fydd yn cael ei ddarparu – cwblhewch a dychwelwch yr adran o dan y pennawd ‘Pwnc 1’ i’r un cyfeiriad e-bost. Mae’r Swyddfa Gartref wedi gofyn am un templed fesul pwnc fesul e-bost, a bod ‘ER’ yn cael ei ychwanegu at y pennawd pwnc ar gyfer pob e-bost i sicrhau ei fod yn mynd i mewn i’r ffolder cywir ar gyfer ymateb. Bydd y Swyddfa Gartref yn ymateb o fewn pum diwrnod gwaith oni bai bod angen ffeil, ac os felly bydd yn ymateb o fewn deg diwrnod gwaith.