Diweddariad misol – ymchwiliadau a gwblhawyd
Summary
Mae'r Comisiwn Etholiadol wedi cyhoeddi'r manylion am yr ymchwiliadau a gwblhawyd yn ystod y mis diwethaf, sy'n rhan bwysig o sicrhau tryloywder mewn cyllid gwleidyddol yn y DU.
Ymgymeriadau gorfodi
Yn dilyn Etholiad Cyffredinol Senedd y DU yn 2017, nododd y Comisiwn nad oedd y ffurflenni gwariant a gyflwynwyd gan y Blaid Geidwadol ac Unoliaethol na'r Democratiaid Rhyddfrydol yn cydymffurfio â'r rheolau'n llawn. Roedd ffurflenni gwariant y ddwy blaid yn anghywir ac roedd rhai anfonebau ar goll o ffurflenni'r Ceidwadwyr. Gwnaeth y ddwy blaid dalu rhai anfonebau yn hwyrach na'r dyddiad a ganiateir yn ôl y gyfraith.
Ar ôl i'r Comisiwn ddechrau ymchwilio i'r mater, penderfynwyd mai'r cam mwyaf priodol i'w gymryd oedd argymell bod pob plaid yn ymrwymo i 'ymgymeriadau gorfodi' i wella'r gweithdrefnau cydymffurfio, gan ei bod yn ymddangos bod methiannau ym mhob achos i ddelio â gwariant etholiad yn deillio o broblemau systematig. Mae'r rhain yn gytundebau statudol â'r Comisiwn lle y mae plaid yn ymrwymo i gymryd camau penodol o fewn amserlen y cytunir arni, er mwyn unioni'r methiannau hyd y gellir a'u hatal rhag codi eto.
Mae manylion penodol yr ymgymeriadau hynny yn wahanol ym mhob achos ond mae'r ddau ohonynt yn cynnwys camau gweithredu i wella systemau a gweithdrefnau cydymffurfio; a gwella'r canllawiau a hyfforddiant i'r staff er mwyn sicrhau eu bod yn cydymffurfio â'r rheolau.
Wrth roi sylwadau ar y penderfyniad i gytuno ar ymgymeriadau gorfodi, dywedodd y Cyfarwyddwr Rheoleiddio, Louise Edwards:
"Rhaid i bleidiau gwleidyddol sy'n ymladd etholiadau ac sy'n gwario miliynau o bunnoedd ar geisio darbwyllo pleidleiswyr i'w cefnogi, sicrhau eu bod yn cyflwyno ffurflenni gwariant cyflawn a chywir. Mae gan y Blaid Geidwadol a'r Democratiaid Rhyddfrydol hanes o fethu â gwneud hyn. Yn hytrach na dirwyo'r pleidiau, rydym wedi penderfynu cydweithio â nhw i wella eu cydymffurfiaeth drwy ei gwneud hi'n ofynnol iddynt wario eu harian ar wella systemau a hyfforddiant i'r staff."
Further information on enforcement undertakings
Bydd y Comisiwn yn monitro cynnydd y ddwy blaid yn erbyn amserlenni y cytunir arnynt. Os byddant yn cydymffurfio â'r ymgymeriadau, ni chaiff unrhyw gosbau eu rhoi mewn perthynas â'r problemau a nodir. Os na fyddant yn cydymffurfio ag ymgymeriad, mae'r hawl gennym i ailagor ein hymchwiliadau.
Ymchwiliadau lle y cafwyd troseddau ac y rhoddwyd sancsiynau
| Enw'r endid a reoleiddir a'r math o endid | Yr hyn yr ymchwiliwyd iddo | Penderfyniad | Canlyniad |
|---|---|---|---|
| Y Blaid Geidwadol ac Unoliaethol (Uned gyfrifyddu Beckenham) | Cyflwyno datganiad cyfrifon 2017 yn hwyr | Cosb ariannol amrywiadwy o £400 | Taliad yn ddyledus ar 26 Awst 2019 |
| Y Democratiaid Rhyddfrydol (Uned gyfrifyddu Southwark) | Cyflwyno datganiad cyfrifon 2017 yn hwyr | Cosb ariannol amrywiadwy o £400 | Talwyd ar 6 Awst 2019 |
| Michelle McIlveen Aelod o'r Cynulliad Deddfwriaethol (Gogledd Iwerddon) (derbynnydd a reoleiddir) | Methu â rhoi gwybod am rodd o fewn 30 diwrnod | Cosb ariannol benodedig o £200 | Talwyd ar 2 Gorffennaf 2019 |
| Jonathan Buckley Aelod o'r Cynulliad Deddfwriaethol (Gogledd Iwerddon) (derbynnydd a reoleiddir) | Methu â rhoi gwybod am rodd o fewn 30 diwrnod | Cosb ariannol benodedig o £200 | Talwyd ar 1 Gorffennaf 2019 |
| William Humphrey Aelod o'r Cynulliad Deddfwriaethol (Gogledd Iwerddon) (derbynnydd a reoleiddir) | Methu â rhoi gwybod am rodd o fewn 30 diwrnod | Cosb ariannol benodedig o £200 | Talwyd ar 1 Gorffennaf 2019 |
| Andrea Venzon (ymgeisydd rhanbarth Llundain, etholiad Senedd Ewrop, Mai 2019) | Methu â rhoi gwybod am roddion gan roddwyr nas caniateir o fewn 30 diwrnod | Fforffediad gwirfoddol o roddion (sy'n werth dros £1,360) | Fforffediad gwirfoddol o roddion |
Derbynwyr a reoleiddir yng Ngogledd Iwerddon
Mae'r Comisiwn hefyd wedi cynnal tri ymchwiliad i fethiant tri derbynnydd a reoleiddir i gydymffurfio â PPERA, sy'n ymwneud â rhoddion a dderbyniwyd cyn 1 Gorffennaf 2017. Mae wedi rhoi cosbau o £250, £300 a £600 i'r tri derbynnydd a reoleiddir dan sylw. Y terfyn amser ar gyfer gwneud taliad neu apelio yw 9 Medi 2019.
Mae deddfwriaeth yn parhau i atal y Comisiwn rhag datgelu unrhyw wybodaeth am y rhoddion a wnaed i dderbynwyr a reoleiddir yng Ngogledd Iwerddon cyn 1 Gorffennaf 2017 (adran 71E o Ddeddf Pleidiau Gwleidyddol, Etholiadau a Refferenda 2000).
Wrth roi sylwadau ar y dirwyon a roddwyd i dderbynwyr a reoleiddir yng Ngogledd Iwerddon, dywedodd y Cyfarwyddwr Rheoleiddio, Louise Edwards:
"Yn anffodus, ni allwn ddatgelu unrhyw wybodaeth am y rhoddion a wnaed cyn Gorffennaf 2017. Rydym yn parhau i bwyso ar Lywodraeth y DU i gyflwyno deddfwriaeth a fydd yn ein galluogi i gyhoeddi gwybodaeth am roddion o Ionawr 2014. Byddai hyn yn rhoi eglurder a hyder i bleidleiswyr yng Ngogledd Iwerddon."
Ymchwiliadau lle y cafwyd troseddau ac na roddwyd sancsiynau
| Enw'r endid a reoleiddir a'r math o endid | Yr hyn yr ymchwiliwyd iddo | Penderfyniad | Canlyniad |
|---|---|---|---|
| Save Our NHS De Swydd Efrog (plaid wleidyddol sydd wedi datgofrestru) | Cyflwyno adroddiadau rhoddion a thrafodion chwarterol yn hwyr | Dim sancsiwn | Wedi cau heb gamau pellach |
Diwedd
I gael rhagor o wybodaeth, cysylltwch â swyddfa wasg y Comisiwn Etholiadol ar 020 7271 0704, neu 07789 920 414 y tu allan i oriau swyddfa, neu anfonwch e-bost i [email protected]
Nodiadau i olygyddion
- Y Comisiwn Etholiadol yw'r corff annibynnol sy'n goruchwylio etholiadau a rheoleiddio cyllid gwleidyddol yn y DU. Rydym yn gweithio i hyrwyddo hyder y cyhoedd yn y broses ddemocrataidd a sicrhau ei hygrededd drwy'r canlynol:
- galluogi cyflawni etholiadau a refferenda rhydd a theg, canolbwyntio ar anghenion etholwyr a mynd i'r afael ag amgylchedd sy'n gyson newid i sicrhau bod pob pleidlais yn parhau i fod yn ddiogel a hygyrch
- rheoleiddio cyllid gwleidyddol - cymryd camau rhagweithiol i gynyddu tryloywder, sicrhau cydymffurfiaeth ac erlid achosion o dorri rheolau
- defnyddio ein harbenigedd i wneud ac eirioli dros newidiadau i'n democratiaeth, gan geisio gwella tegwch, tryloywder ac effeithiolrwydd
Crëwyd y Comisiwn yn 2000 ac mae'n adrodd yn uniongyrchol i Senedd y DU ac i Senedd yr Alban.
- Mae'r datganiad yma'n rhan o ddiweddariad misol ymchwiliadau'r Comisiwn, fel rhan bwysig o'i ymrwymiad i ddarparu tryloywder i gyllid gwleidyddol y DU. Caiff gwybodaeth o'r natur yma ei gyhoeddi'n rheolaidd ar drydydd dydd Mawrth bob mis. Mae manylion cosbau misoedd blaenorol ar gael ar ein.
- Mae unrhyw gosbau sydd wedi'u rhoi gan y Comisiwn yn mynd i'r Gronfa Gyfunol. Caiff ei reoli gan Drysorlys EM ac nid y Comisiwn Etholiadol.