Un mis ar ôl i gofrestru i bleidleisio yn yr etholiadau ym mis Mai yng Nghymru

Dim ond un mis sydd ar ôl gan bleidleiswyr yng Nghymru i gofrestru i bleidleisio cyn y dyddiad cau ar gyfer yr etholiadau llywodraeth leol. Mae’n rhaid i unrhyw un sydd eisiau pleidleisio yn yr etholiadau ar 5 Mai gofrestru erbyn canol nos ar 14 Ebrill. 

Mae cofrestru’n gyflym ac yn hawdd a gellir ei wneud ar-lein yn www.gov.uk/cofrestruibleidleisio. 

Gall person gofrestru i bleidleisio yn yr etholiadau llywodraeth leol yng Nghymru os yw’r canlynol yn wir:

• mae’n 16 mlwydd oed neu’n hŷn ar ddiwrnod yr etholiad
• mae’n ddinesydd Prydeinig sy’n preswylio yng Nghymru
• mae’n ddinesydd Gwyddelig, yn ddinesydd yr Undeb Ewropeaidd, yn ddinesydd cymwys y Gymanwlad neu’n ddinesydd tramor cymwys sy’n preswylio yng Nghymru

Bydd angen i unrhyw un a oedd ar y gofrestr yn flaenorol ac sydd wedi symud tŷ yn ddiweddar neu y mae eu manylion wedi newid, gofrestru i bleidleisio eto.

Dywedodd Rhydian Thomas, Pennaeth y Comisiwn Etholiadol, Cymru:

“Ym mis Mai, bydd pleidleiswyr ledled Cymru’n pleidleisio er mwyn dweud eu dweud ar y materion sy’n effeithio ar eu bywydau dydd i ddydd. Yn dilyn yr estyniad i’r etholfraint bleidleisio, gall pobl ifanc 16-17 mlwydd oed a gwladolion tramor cymwys yng Nghymru bleidleisio yn yr etholiadau hyn.

“Ni allwch ddweud eich dweud oni bai eich bod wedi cofrestru i bleidleisio - gallwch wneud hynny ar-lein yn www.gov.uk/cofrestruibleidleisio. Dim ond pum munud y mae’n ei gymryd i gofrestru - amser y byddech fel arall yn ei dreulio yn aros i’r tegell ferwi neu i redeg y bath. Felly os ydych chi am sicrhau bod eich llais yn cael ei glywed a’ch bod ddim wedi’ch cofrestru eisoes, ewch ar-lein a chofrestrwch nawr. ”

Dim ond pleidleiswyr sydd wedi cofrestru i bleidleisio gall ddweud eu dweud ym mis Mai. Mae’n rhaid i’r rheiny sy’n dymuno pleidleisio trwy’r post neu drwy benodi rhywun y maent yn ymddiried ynddynt i bleidleisio ar eu rhan, sef pleidlais drwy ddirprwy, wneud cais i bleidleisio’r ffordd hyn, yn ogystal â chofrestru i bleidleisio. Y dyddiad cau i wneud cais am bleidlais bost yw 5pm ar ddydd Mawrth 19 Ebrill, a’r dyddiad cau i wneud cais am bleidlais drwy ddirprwy yw 5pm ar ddydd Mawrth 26 Ebrill. 

I gael gwybodaeth am etholiadau yn eich ardal, sut i gofrestru i bleidleisio, a sut i wneud cais am bleidlais bost neu bleidlais drwy ddirprwy, gallwch fynd i www.electoralcommission.org.uk/cy/pleidleisiwr. Bydd y dudalen hon yn parhau i gael ei diweddaru cyn yr etholiadau. 

Diwedd

I gael rhagor o wybodaeth, cysylltwch ag Ella Downing, Swyddog Cyfathrebu, trwy ffonio 02920 346 824, neu 07789 920 414 y tu allan i oriau swyddfa, neu drwy e-bostio [email protected].