Cofnodion Bwrdd y Comisiwn: 23 Mai 2023

Croesawodd y Bwrdd aelodau o Wasanaeth Cynghori'r Tîm Cymorth Rheoleiddio a ddarparodd amlinelliad o'u gwaith. Roedd lefel y cyngor a'r cymorth a ddarperir, ynghyd â gwelliannau diweddar i gyflawni Dangosyddion Perfformiad Allweddol newydd sy'n fwy heriol, wedi creu argraff ar y Bwrdd.

Diolchodd y Bwrdd i aelodau'r tîm am eu hamser a'r diweddariad.

Penderfynwyd: Nododd y Bwrdd nad oedd unrhyw ddiweddariadau i'r datganiadau o fuddiannau ers cyfarfod y Bwrdd ym mis Ebrill 2023. 
 

Penderfynwyd: Y dylai'r Bwrdd gytuno ar gofnodion cyfarfod y Bwrdd ar 25 Ebrill 2023.

Dywedodd y Bwrdd y dylai'r system olrhain camau gweithredu gynnwys mwy o fanylion am yr amrywiaeth o eitemau sydd ar agor.

Penderfynwyd: Y dylai'r Bwrdd nodi'r cynnydd a wnaed yn erbyn camau gweithredu.

Nododd y Bwrdd fod rhai o gyfarfodydd y Bwrdd wedi cael eu hymestyn i gynnwys trafodaethau gwrthrychol strategol.

Penderfynwyd: Y dylai'r Bwrdd nodi Blaengynllun busnes y Bwrdd ar gyfer 2023/24

Cyflwynodd y Prif Weithredwr ei ddiweddariad gan ddiolch i'r Cyfarwyddwr, Cyfathrebu, Polisi ac Ymchwil, y Cyfarwyddwr, Gweinyddu Etholiadau a Chanllawiau, y Cyfarwyddwr, Rheoleiddio a Thrawsnewid Digidol a'u timau am eu gwaith mewn perthynas ag etholiadau mis Mai 2023.

Nododd y Cyfarwyddwr, Gweinyddu Etholiadau a Chanllawiau fod gwaith yn mynd rhagddo o hyd i adolygu is-ddeddfwriaeth ddrafft yn amlinellu manylion y newidiadau dilynol sy'n deillio o Ddeddf Etholiadau 2022. Nododd y Bwrdd fod y newidiadau sydd i ddod yn gymhleth ac yn dechnegol, a bod gwaith yn mynd rhagddo i drosi'r manylion yn ganllawiau a phrosesau ymarferol. Nododd y Bwrdd mai prif bryderon y gymuned gweinyddu etholiadau yw nifer y newidiadau sydd i ddod a'r effaith a gânt ar eu capasiti, sydd eisoes yn brin. 

Cafodd y Bwrdd ddiweddariad gan y Cyfarwyddwr, Rheoleiddio a Thrawsnewid Digidol a nododd fod ymateb wedi dod i law i'r llythyrau a anfonwyd at y Gweinidogion Diogelwch ac Etholiadau ynghylch mesurau diogelu ychwanegol ar gyfer y gyfundrefn rhoddion i bleidiau gwleidyddol, a'r Bil Diogelwch Cenedlaethol. Atebodd y Gweinidog Etholiadau nad oedd o'r farn bod angen y mesurau diogelu. Bydd y Comisiwn nawr yn ystyried sut i sefydlu consensws ehangach dros ddiwygio ymhlith rhanddeiliaid allweddol.

Nododd y Bwrdd yr Adroddiad Cyllid a Pherfformiad ar gyfer Chwarter Pedwar 2022/23.

Penderfynwyd: Y dylai'r Bwrdd nodi'r diweddariad ar weithrediadau a materion sy'n codi, gan gynnwys diweddariad ar weithredu Deddf Etholiadau 2022 ac Adroddiad Cyllid a Pherfformiad Chwarter Pedwar 2022/23.

Nododd y Bwrdd fyfyrdodau'r Comisiynwyr ar eu harsylwadau ar y diwrnod pleidleisio yn Lloegr ac yng Ngogledd Iwerddon.

Darparodd y Cyfarwyddwr, Gweinyddu Etholiadau a Chanllawiau, drosolwg o fyfyrdodau lefel uchel cychwynnol ar yr etholiadau, gan nodi er bod yr etholiadau wedi cael eu rhedeg yn dda, bod nifer o heriau gweinyddol wedi codi, a bod cydnerthedd a chapasiti o ran staff a chyflenwyr yn themâu cyffredin unwaith eto. 

Nododd y Bwrdd y data cychwynnol a gyflwynwyd ar weithrediad y system ID pleidleiswyr yn ystod etholiadau mis Mai 2023 yn Lloegr, a fydd yn sail i'r dadansoddiad interim a gyhoeddir ym mis Mehefin. Cafwyd diweddariad hefyd ar gynlluniau ar gyfer yr adroddiadau interim a therfynol ar ôl yr etholiadau – ym mis Mehefin ac ym mis Medi, yn y drefn honno – yn ogystal â'r gweithgareddau cyfathrebu a fyddai'n cefnogi'r adroddiadau hyn.

Penderfynwyd: Y dylai'r Bwrdd nodi'r diweddariad ar etholiadau mis Mai 2023 a chytuno ar y drefn ar gyfer cyhoeddi dadansoddiad interim o ddata ar y system ID pleidleiswyr.

Cyflwynodd y Prif Weithredwr  Adroddiad Blynyddol a Chyfrifon drafft 2022/23 a gofynnodd am sylwadau gan aelodau o'r Bwrdd. Nododd y Bwrdd mai'r dyddiad cau ar gyfer adborth a sylwadau oedd 2 Mehefin 2023, ac y byddai'r adroddiad terfynol yn dychwelyd i'w gymeradwyo yn ystod cyfarfod y Bwrdd ym mis Mehefin 2023. 

Nododd y Bwrdd y gallai datganiad cryno fod yn ddefnyddiol er mwyn helpu darllenwyr yr adroddiad i ddeall sut mae'r Comisiwn yn gweithredu fel corff yn y DU, o ystyried y gofynion adroddiad ffurfiol gwahanol sy'n gymwys i'r adroddiadau blynyddol eu hunain. 

Nododd y Cyfarwyddwr Dros Dro, Cyllid y bu'n rhaid oedi o leiaf bythefnos cyn cau'r cyfrifon blynyddol ar gyfer 2022/23, yn bennaf o ganlyniad i broblemau cysoni â'r system gyfrifyddu newydd. Nododd y Bwrdd fod y rhan fwyaf o'r problemau wedi cael eu datrys ond y bydd yr oedi yn effeithio ar yr archwiliad cenedlaethol gan y Swyddfa Archwilio Genedlaethol a bod risg na chaiff yr archwiliad ei gwblhau o fewn yr amser dynodedig. 

Penderfynwyd: Y dylai'r Bwrdd adolygu drafft cyntaf o Adroddiad Blynyddol a Chyfrifon 2022/23 a nodi'r amserlen ar gyfer gwneud sylwadau.