Cyngor newydd i bleidleiswyr ar dwyllwybodaeth, ac i ymgyrchwyr sy’n defnyddio AI cynhyrchiol

Mae pleidleiswyr yn cael eu hannog i feddwl yn feirniadol am ddeunydd ymgyrchu, wrth i bleidiau gwleidyddol ac ymgyrchwyr gael eu hannog i ymgyrchu’n dryloyw cyn yr etholiad cyffredinol fis nesaf. 

Mae pleidleiswyr yn cael eu hannog i feddwl yn feirniadol am ddeunydd ymgyrchu, wrth i bleidiau gwleidyddol ac ymgyrchwyr gael eu hannog i ymgyrchu’n dryloyw cyn yr etholiad cyffredinol fis nesaf. 

Mae’r Comisiwn Etholiadol yn galw ar bob ymgyrchydd sy’n cymryd rhan yn yr etholiad i beidio â chamarwain pleidleiswyr, ac i ystyried sut bydd eu deunydd ymgyrchu yn cael ei dderbyn, yn enwedig wrth ddefnyddio Deallusrwydd Artiffisial (AI) cynhyrchiol.

Daw’r rhybudd wrth i’r Comisiwn gyhoeddi cyngor newydd i bleidleiswyr ar sut i ymgysylltu â deunydd ymgyrchu ac i feddwl yn feirniadol am ddeunydd maen nhw’n ei weld a’i glywed. 

Meddai Vijay Rangarajan, Prif Weithredwr y Comisiwn Etholiadol:  

“Mae cael gwybodaeth i bleidleiswyr mewn ymgyrch etholiadol yn rhan sylfaenol o unrhyw etholiad; mae angen gwybodaeth ddibynadwy ac y gellir ymddiried ynddi ar bleidleiswyr i’w helpu i wneud penderfyniadau am sut i bleidleisio. Ac eto, mae ein hymchwil yn dangos bod y rhan fwyaf o bleidleiswyr yn ystyried bod twyllwybodaeth a chamwybodaeth wleidyddol yn broblem – dywedodd 70% hynny yn ein harolwg diweddar. Felly, mae mynd i’r afael â thwyllwybodaeth a chamwybodaeth wleidyddol yn hanfodol os ydyn ni am ddiogelu a chynnal hyder pleidleiswyr yn ein system etholiadol.

“Rydyn ni’n galw ar ymgyrchwyr i gyflawni eu swyddogaethau hanfodol yn gyfrifol a meddwl yn ofalus am y deunydd maen nhw’n ei gynhyrchu. Dylai ymgyrchwyr ystyried a allai’r deunydd maen nhw’n ei greu gamarwain pleidleiswyr – eu cyfrifoldeb nhw yw gwneud yn siŵr nad yw’n gwneud hynny. Dylai unrhyw un sy’n defnyddio Deallusrwydd Artiffisial cynhyrchiol nodi hynny’n glir i’r rhai sy’n gweld y deunydd. Byddwn yn monitro’r defnydd o Ddeallusrwydd Artiffisial yn ofalus yn yr etholiad yma.”

Nid oes gan y Comisiwn bwerau cyfreithiol i reoleiddio cynnwys deunydd ymgyrchu. Nid oes gan yr un sefydliad yng ngwledydd Prydain y pwerau hynny. Mae’r Comisiwn felly’n cynghori pleidleiswyr i feddwl yn feirniadol am y wybodaeth maen nhw’n ei gweld, cyn penderfynu a ddylen nhw adael iddi ddylanwadu ar eu pleidlais. Dylai pleidleiswyr chwilio am argraffnod, yn dangos pwy sydd wedi talu am greu a hyrwyddo deunydd. Mae hyn yn ofyniad cyfreithiol ar gyfer yr holl ddeunydd etholiadol. 

Mae’r Comisiwn hefyd yn cynghori pleidleiswyr i ddefnyddio gwefan y Comisiwn i wirio gwybodaeth am brosesau pleidleisio neu etholiadol ac yn dweud y bydd yn mynd ati’n rhagweithiol i gywiro unrhyw wybodaeth ffug am bleidleisio.

Ychwanegodd Vijay Rangarajan: 

“Rydyn ni’n darparu ffynhonnell o wybodaeth ddibynadwy i bleidleiswyr am brosesau pleidleisio yn y cyfnod cyn yr etholiad cyffredinol yma. Tra bod y mwyafrif helaeth o bobl sy’n cymryd rhan mewn etholiadau yn y Deyrnas Unedig eisiau cefnogi pleidleiswyr i gael dweud eu dweud, mae drwgweithredwyr allan yna sy’n ceisio camarwain pleidleiswyr a’u hatal rhag bwrw eu pleidlais. Os byddwn yn gweld camwybodaeth neu dwyllwybodaeth am y broses bleidleisio byddwn yn ei chywiro’n gyflym ac yn gyhoeddus. 

“Rydyn ni’n annog pleidleiswyr i feddwl yn feirniadol am yr hyn rydych chi’n ei weld a’i glywed yn yr ymgyrch yma, ac i wirio ein gwefan i sicrhau bod gennych y wybodaeth sydd ei hangen arnoch i bleidleisio ar 4 Gorffennaf, neu drwy bleidlais bost cyn hynny.”

DIWEDD

I gael rhagor o wybodaeth, cysylltwch â swyddfa’r wasg y Comisiwn Etholiadol ar 020 7271 0704, neu 07789 920 414 y tu allan i oriau swyddfa, neu [email protected].