Pleidleisio drwy'r post

Er mwyn pleidleisio mewn unrhyw etholiad yn y DU, mae'n rhaid eich bod wedi cofrestru i bleidleisio. Dysgwch a ydych yn gymwys i gofrestru a sut i wneud cais

Os nad ydych yn siŵr a oes gennych bleidlais bost yn barod, cysylltwch â thîm gwasanaethau etholiadol eich cyngor lleol i gael gwybod.

Os byddwch yn gwybod na fydd modd i chi gyrraedd eich gorsaf bleidleisio ar y diwrnod pleidleisio, gallwch bleidleisio drwy'r post.

Gallwch wneud cais am bleidlais bost os byddwch i ffwrdd ar wyliau neu am fod ymrwymiadau gwaith yn golygu na allwch fynd i'r orsaf bleidleisio. Gallwch hefyd ddewis pleidleisio drwy'r post gan y byddai hynny'n fwy cyfleus i chi.

Bydd pecyn pleidleisio drwy'r post yn cael ei anfon atoch cyn yr etholiad. Rhagor o wybodaeth am sut i bleidleisio drwy'r post.

Mae'r broses gwneud cais am bleidlais bost yng Nghymru yn dibynnu ar y math o etholiad:

• Ar gyfer pob etholiad, gallwch lawrlwytho, argraffu a chwblhau ffurflen gais i bleidleisio drwy'r post (PDF) 
• Gallwch hefyd wneud cais ar-lein drwy GOV.uk neu drwy lenwi cais i bleidleisio drwy'r post ar gyfer etholiadau Senedd y DU ac etholiadau Comisiynwyr yr Heddlu a Throseddu
• Gallwch lenwi cais i bleidleisio drwy'r post ar gyfer etholiadau'r Senedd ac etholiadau cynghorau lleol yng Nghymru

Gallwch ddewis gwneud cais am bleidlais drwy’r post ar gyfer etholiad penodol, math arbennig o etholiad, neu'r holl etholiadau yr ydych yn gymwys i bleidleisio ynddynt.

Dim ond i wneud cais am yr holl etholiadau yr ydych yn gymwys i bleidleisio ynddynt y gallwch ddefnyddio'r ffurflen gais uchod. Os hoffech wneud cais i bleidleisio drwy'r post ar gyfer etholiad penodol neu fath arbennig o etholiad, mae angen i chi gysylltu â'r tîm gwasanaethau etholiadol yn eich cyngor lleol.

Gallwch wneud cais ar gyfer etholiad neu refferendwm penodol, ar gyfer cyfnod penodol o amser, neu ar gyfer pleidlais bost hirdymor. Mae hyd pleidlais bost hirdymor yn dibynnu ar y math o etholiad.

Ar gyfer etholiadau Senedd y DU ac etholiadau Comisiynwyr yr Heddlu a Throseddu, gall pleidlais bost bara am hyd at dair blynedd cyn y bydd angen i chi wneud cais arall. 

Ar gyfer etholiadau Senedd Cymru ac etholiadau llywodraeth leol, gallwch gael pleidlais bost am gyfnod amhenodol, ond bydd tîm gwasanaethau etholiadol eich cyngor lleol yn cysylltu â chi i ofyn i chi ddiweddaru eich llofnod ar ôl pum mlynedd.

Bydd angen i chi gwblhau cais newydd am bleidlais bost os byddwch wedi symud tŷ.

Os hoffech bleidleisio drwy'r post yn etholiad Comisiynydd yr Heddlu a Throseddu ym mis Mai 2024, bydd angen i chi gyflwyno cais ar wahân am bleidlais bost os ydych: 

• yn ddinesydd o'r Undeb Ewropeaidd
• yn ddinesydd Prydeinig, Gwyddelig neu'r Gymanwlad sydd â phleidlais bost ar gyfer etholiadau llywodraeth leol ond nid etholiadau Senedd y DU
• yn ddinesydd Prydeinig, Gwyddelig neu'r Gymanwlad sydd heb bleidlais bost bresennol, ac nad ydych am bleidleisio drwy'r post yn etholiadau Senedd y DU
• yn Arglwydd

Lawrlwythwch ffurflen gais am bleidlais bost (PDF)

l pleidleiswyr tramor hefyd wneud cais trwy lawrlwytho, argraffu a chwblhau ffurflen gais am bleidlais bost.

Ffurflen gais am bleidlais bost dramor

Mae cyfarwyddiadau ar sut i gwblhau'r cais yn gywir ar gael ar y ffurflenni papur ac ar-lein. 

Bydd angen i chi roi eich dyddiad geni a'ch llofnod ar eich ffurflen gais. Ar gyfer etholiadau Senedd y DU ac etholiadau Comisiynwyr yr Heddlu a Throseddu, bydd angen i chi gynnwys eich rhif Yswiriant Gwladol hefyd. Caiff y rhain eu defnyddio i gadarnhau pwy ydych chi pan fyddwch yn pleidleisio drwy'r post.

Os na allwch ddarparu eich rhif Yswiriant Gwladol, bydd angen i chi esbonio pam yn eich cais. Bydd tîm gwasanaethau etholiadol eich cyngor lleol yn cysylltu â chi i drafod pa fathau eraill o brawf adnabod y bydd angen i chi eu darparu.

Cysylltwch â thîm gwasanaethau etholiadol eich cyngor lleol i gael rhagor o wybodaeth os na allwch lofnodi'r ffurflen, neu os na allwch roi llofnod cyson.

Os byddwch yn defnyddio ffurflen gais bapur, ar ôl i chi gwblhau'r ffurflen a sicrhau eich bod wedi'i llofnodi, bydd angen i chi ei hanfon i dîm gwasanaethau etholiadol eich cyngor lleol.

Gallwch anfon eich ffurflen drwy'r post. Mae'n bosibl hefyd y bydd tîm gwasanaethau etholiadol eich cyngor lleol yn derbyn copi wedi'i sganio o'ch ffurflen drwy e-bost, ond dylech gadarnhau hyn gyntaf.

Os byddwch yn gwneud cais ar-lein i bleidleisio drwy'r post, bydd angen i chi gwblhau'r cais i gyd ar yr un pryd a dilyn y cyfarwyddiadau ar GOV.uk i gyflwyno eich cais. 

Rhaid i chi gyflwyno eich cais erbyn 5pm, 11 diwrnod gwaith cyn y bleidlais.

Os hoffech ganslo eich pleidlais bost, yna dylech gysylltu â'ch cyngor lleol i wneud cais am hyn. Rhaid i chi wneud hynny cyn 5pm, 11 diwrnod gwaith cyn yr etholiad y byddwch yn pleidleisio ynddo.

Os ydych eisoes wedi cwblhau a dychwelyd eich pleidlais bost, yna ni allwch ei chanslo ar gyfer yr etholiad hwnnw.