Gwneud cais i bleidleisio drwy ddirprwy

Er mwyn pleidleisio mewn unrhyw etholiad yn y DU, mae'n rhaid eich bod wedi cofrestru i bleidleisio. Dysgwch a ydych yn gymwys i gofrestru a sut i wneud cais

Os nad ydych yn siŵr a oes gennych bleidlais drwy ddirprwy yn barod, cysylltwch â thîm gwasanaethau etholiadol eich cyngor lleol i gael gwybod.

Os byddwch yn gwybod na fydd modd i chi gyrraedd eich gorsaf bleidleisio ar y diwrnod pleidleisio, gallwch ofyn i rywun rydych chi'n ymddiried ynddo fwrw eich pleidlais ar eich rhan . Pleidleisio drwy ddirprwy yw'r enw ar hyn a chyfeirir yn aml at y sawl sy'n bwrw eich pleidlais fel eich dirprwy.

Gall yr unigolyn sy'n pleidleisio ar eich rhan naill ai fynd i'ch gorsaf bleidleisio i fwrw eich pleidlais, neu gall wneud cais i bleidleisio ar eich rhan drwy'r post.

Dysgwch sut i bleidleisio drwy ddirprwy

Wrth gwblhau'r cais, bydd angen i chi roi rheswm pam na allwch fynd i'ch gorsaf bleidleisio eich hun.

Efallai eich bod i ffwrdd ar wyliau, i ffwrdd gyda'ch gwaith, neu gall fod gennych anabledd sy'n golygu na allwch fynd i'ch gorsaf bleidleisio ar y diwrnod pleidleisio. 

Pan fyddwch yn gwneud cais am bleidlais newydd drwy ddirprwy, rhaid i chi ddychwelyd eich ffurflen gais am bleidlais drwy ddirprwy erbyn 5pm, chwe diwrnod gwaith cyn y bleidlais.

I wneud cais am bleidlais drwy ddirprwy, rhaid i chi lenwi ffurflen gais. Gallwch wneud cais ar-lein ar gyfer rhai etholiadau o dan amgylchiadau penodol.

Bydd angen i chi roi eich dyddiad geni a’ch llofnod ar eich ffurflen gais. Ar gyfer etholiadau Senedd y DU ac etholiadau Comisiynwyr yr Heddlu a Throseddu, bydd angen i chi hefyd ddarparu eich rhif Yswiriant Gwladol.

Bydd angen i chi gwblhau cais newydd am bleidlais drwy ddirprwy os ydych wedi symud tŷ neu wedi newid eich enw.

Gallwch ddewis gwneud cais am bleidlais drwy ddirprwy ar gyfer etholiad penodol, math penodol o etholiad, neu’r holl etholiadau yr ydych yn gymwys i bleidleisio ynddynt.

Pleidlais drwy ddirprwy ar gyfer etholiad penodol

Lawrlwythwch, argraffwch a chwblhewch y ffurflen hon i wneud cais am bleidlais drwy ddirprwy ar gyfer etholiad penodol. Gallai hyn fod oherwydd eich bod ar wyliau neu i ffwrdd gyda’ch gwaith ar y diwrnod pleidleisio.

Ffurflen gais i bleidleisio drwy ddirprwy mewn etholiad neu refferendwm penodol (PDF)

Ar gyfer etholiadau Senedd y DU ac etholiadau Comisiynwyr yr Heddlu a Throseddu, gallwch hefyd o wneud cais ar-lein i bleidleisio drwy ddirprwy drwy wefan GOV.uk.

Pleidlais drwy ddirprwy ar gyfer etholiad penodol

Os ydych chi am wneud cais am bleidlais drwy ddirprwy ar gyfer math penodol o etholiad yn unig (er enghraifft, ar gyfer etholiadau'r cyngor), mae angen i chi gysylltu â'r tîm gwasanaethau etholiadol yn eich cyngor lleol.

Pleidlais drwy ddirprwy hir-dymor neu barhaol

Defnyddiwch un o’r ffurflenni hyn os na fyddwch yn gallu mynd i’r orsaf bleidleisio hyd y gellir rhagweld, neu am gyfnod hir.

Mae’r ffurflen sydd angen i chi ei llenwi yn dibynnu ar eich rheswm dros bleidlais drwy ddirprwy.

• Mae gennych anabledd (PDF)
• Byddwch i ffwrdd ar gwrs addysgol (PDF)
• Byddwch i ffwrdd gyda gwaith (PDF)
• Rydych wedi cofrestru fel pleidleisiwr tramor (PDF)
• Rydych yn gweithio i’r British Council neu fel Gwas y Goron (PDF)
• Rydych yn gwasanaethu dramor yn y Lluoedd Arfog (PDF)
• Rydych wedi cofrestru fel etholwr dienw (PDF)

Ar gyfer etholiadau Senedd y DU ac etholiadau Comisiynwyr yr Heddlu a Throseddu, gallwch hefyd wneud cais ar-lein drwy GOV.uk os ydych yn byw dramor neu'n bleidleisiwr yn y lluoedd arfog.

Ar ôl i chi gwblhau'r ffurflen a sicrhau eich bod wedi'i llofnodi, bydd angen i chi ei hanfon i dîm gwasanaethau etholiadol eich cyngor lleol.

Gallwch anfon eich ffurflen drwy'r post. Mae'n bosibl hefyd y bydd y tîm gwasanaethau etholiadol eich cyngor lleol yn derbyn copi wedi'i sganio o'ch ffurflen drwy e-bost, ond dylech gadarnhau hyn gyntaf.

Pan fyddwch yn newid neu’n canslo pleidlais drwy ddirprwy neu bleidlais ddirprwy drwy'r post bresennol, rhaid i'ch cais gyrraedd tîm gwasanaethau etholiadol eich cyngor lleol  erbyn 5pm, 11 diwrnod gwaith cyn y bleidlais. 

Os byddwch wedi enwebu dirprwy, ond yna'n newid eich meddwl ac yn dymuno pleidleisio eich hun, mae gennych sawl opsiwn.

Un opsiwn yw y gallwch wneud cais i ganslo eich pleidlais drwy ddirprwy.

• Yng Nghymru a Lloegr, cysylltwch â'ch cyngor lleol.
• Yn yr Alban, cysylltwch â'ch swyddfa cofrestru etholiadol.

Y dyddiad cau ar gyfer canslo pleidlais drwy ddirprwy yng Nghymru, Lloegr a'r Alban yw 5pm, 11 diwrnod gwaith cyn yr etholiad.

Os bydd pleidlais ddirprwy drwy'r post eisoes wedi cael ei chwblhau a'i dychwelyd, ni all y trefniadau pleidleisio drwy ddirprwy ar gyfer yr etholiad hwnnw gael eu canslo.

Un opsiwn arall yw y gallwch bleidleisio eich hun. Gallwch wneud hyn ar yr amod eich bod yn pleidleisio cyn eich dirprwy. Ni allwch wneud hyn os bydd eich dirprwy eisoes wedi pleidleisio drwy'r post ar eich rhan.

Fel arall, gallwch wneud cais am bleidlais bost. Y dyddiad cau ar gyfer gwneud hynny yw 5pm, 11 diwrnod gwaith cyn yr etholiad y byddwch yn pleidleisio ynddo. Bydd y cais hwn am bleidlais bost yna'n canslo  eich cais i bleidleisio drwy ddirprwy.