Cofnodion Bwrdd y Comisiwn: Dydd Mercher 2 Rhagfyr 2020

Ni chafwyd unrhyw ymddiheuriadau. 

Croesawodd y Cadeirydd bawb i'r cyfarfod a hysbysodd y Bwrdd fod Tŷ'r Cyffredin wedi cymeradwyo adnewyddu cyfnodau Elan Closs Stephens a Sue Bruce yn y swydd a bod y Warant Frenhinol wedi'i derbyn ar gyfer Alasdair Morgan. 

Ni chafwyd unrhyw ddatganiadau o fuddiant newydd.

Nododd y Comisiynwyr y broses statudol hir ar gyfer penodi Comisiynwyr. Gallai hyn effeithio ar y cworwm yng nghyfarfodydd y Bwrdd ond nid oedd hynny'n debygol ar hyn o bryd. 

Penderfynwyd: Y dylid cymeradwyo cofnodion cyfarfod Bwrdd y Comisiwn ar 21 Hydref 2020. 

Cyflwynodd y Prif Weithredwr a'r Cyfarwyddwr Cyllid a Gwasanaethau Corfforaethol yr adroddiad a'r papur atodol yn dadansoddi'r newidiadau arfaethedig. Roedd y newidiadau yn ymwneud yn bennaf â'r penderfyniad i ohirio etholiadau Mai 2020 ac, o ganlyniad i hynny, y ffaith bod modd dychwelyd swm sylweddol o arian i Drysorlys EM. 

Nodwyd bod anawsterau yn ymwneud â chyflenwyr, a oedd y tu allan i reolaeth y Comisiwn, wedi arwain at oedi cyn rhoi prosiect newydd Cyllid Gwleidyddol Ar-lein ar waith. Roeddent yn hyderus y gallai'r prosiect gael ei gwblhau'n llwyddiannus gan ddefnyddio adnoddau mewnol, gan gynnwys rhai recriwtiaid ychwanegol. Y bwriad bellach oedd cyflwyno'r system ym mis Medi 2021. Byddai hyn yn gofyn am adnoddau ychwanegol ar ben cyllideb y prosiect. Ni ellid diystyru cymryd camau yn erbyn y cyflenwyr. Roedd Cadeirydd y Pwyllgor Archwilio wedi cael ei ffrifio'n fanwl. 

Cytunwyd y byddai'r Bwrdd yn cael diweddariadau rheolaidd pellach ar brosiect Cyllid Gwleidyddol Ar-lein. 

Penderfynwyd: Y dylai'r Comisiynwyr gymeradwyo’r newidiadau sydd eu hangen ar gyfer cyllideb 2020/21 a'u cyflwyno i Bwyllgor y Llefarydd. 

Derbyniodd y Comisiynwyr yr adroddiad, gan nodi'r sefydlogrwydd yn yr Adran Adnodau Dynol. Trafodwyd statws rhai achosion cyfredol a oedd yn ymwneud â chofrestru pleidiau. 

Trafododd y Comisiynwyr ffyrdd o fynd ati i adnewyddu'r swyddfeydd yn Bunhill Row ac effaith canllawiau iechyd y cyhoedd ar gyfer Covid-19 gan gynnwys gweithio gartref. 

Penderfynwyd: Y dylai'r adroddiad gael ei nodi. 

Cyflwynodd y Prif Weithredwr yr adroddiad ar y trefniadau dros dro arfaethedig o 1 Ionawr 2021 ymlaen, nes i Gadeirydd newydd gael ei benodi. 

Nododd y Comisiynwyr y sefyllfa o ran recriwtio'r Cadeirydd newydd yn ogystal â Phrif Gomisiynydd newydd yng Ngogledd Iwerddon. 

Penderfynwyd: Nes i Gadeirydd newydd y Comisiwn gael ei benodi a dechrau ar ei ddyletswyddau, y dylai Rob Vincent weithredu fel y prif Gomisiynydd fel y bo'n briodol, gan gynnwys cadeirio cyfarfodydd y Bwrdd, rhyngweithio â'r Comisiynwyr eraill, gweithio'n agos gyda'r Prif Weithredwr a Chyfarwyddwyr y Comisiwn ac ymgysylltu â rhanddeiliaid allanol allweddol. 

Penderfynwyd: Y gofynnir, o bosibl, i Gomisiynwyr eraill, yn enwedig Sarah Chambers, gynorthwyo yn ôl yr angen.

Rhoddodd cyfarwyddwyr y Comisiwn gyflwyniad a oedd yn ymdrin â'r prif faterion allweddol canlynol: 

• Cynllunio er mwyn sicrhau bod etholiadau Mai 2021 mor ddiogel â phosibl yng nghyd-destun Covid-19, gan gynnwys ymchwil barn y cyhoedd arfaethedig i agweddau ar bleidleisio yn y cyd-destun hwn yng Nghymru a Lloegr. 
• Ymgysylltu â llywodraethau, gan gynnwys deddfwriaeth newydd gan Lywodraeth Cymru a Llywodraeth yr Alban. 
• Cefnogi gweinyddwyr etholiadol 
• Cefnogi pleidleiswyr, gan gynnwys drwy ymgyrchoedd cyhoeddus 
• Cefnogi a rheoleiddio ymgyrchwyr 

Trafododd y Comisiynwyr effeithiau cyfyngiadau Covid-19, yn arbennig mewn gorsafoedd pleidleisio, rheoli disgwyliadau a rhoi tawelwch meddwl i aelodau o'r cyhoedd ynglŷn â phleidleisio'n bersonol. 

Penderfynwyd: Y dylai'r cyflwyniad gael ei nodi. 

Cafodd y Comisiynwyr adroddiad cefndir ynghyd â chyflwyniad a gyflwynwyd gan y Pennaeth Cyfathrebu Digidol a Dysgu, gan nodi'r pwyntiau allweddol canlynol: 

• Partneriaethau cryf â'r gweinyddiaethau datganoledig 
• Hyrwyddo a lledaenu deunyddiau digidol a ffisegol 
• Adborth gan randdeiliaid, a oedd wedi bod yn gadarnhaol iawn hyd yma •     Cynlluniau ar gyfer y dyfodol 

Croesawodd y Comisiynwyr y cynnydd a oedd wedi'i wneud yn y maes gwaith hwn a thrafodwyd darparwyr dysgu, cost deunyddiau, adnoddau a chyllidebau yn y dyfodol. 

Nodwyd y byddai adborth gan addysgwyr a myfyrwyr 16-18 oed yn cael ei geisio drwy arolygon a thrwy gynlluniau i gynnal grwpiau ffocws ym mis Ebrill 2021. 

Penderfynwyd: Y dylai'r adroddiad a'r cyflwyniad gael eu nodi. 

Y Pwyllgor Cydnabyddiaeth ac Adnoddau Dynol (EC 93/20) 

Rhoddodd y Pwyllgor Cydnabyddiaeth ac Adnoddau Dynol ddiweddariad cryno ar gyfarfod diwethaf y pwyllgor hwnnw a gynhaliwyd ar 2 Rhagfyr 2020, a oedd yn ymdrin â'r canlynol: 

• Sesiwn adborth gan staff 
• Strategaeth pobl 
• Gwaith ym maes Cydraddoldeb, Amrywiaeth a Chynhwysiant • Ymarfer meincnodi cyflogau 

Penderfynwyd: Y dylai'r diweddariad gael ei nodi. 

Y Pwyllgor Archwilio (EC 94/20) 

Rhoddodd y Pwyllgor Archwilio ddiweddariad cryno ar gyfarfodydd diwethaf y pwyllgor hwnnw a gynhaliwyd ar 11 Tachwedd a 1 Rhagfyr, a oedd yn ymdrin â'r canlynol: 

• Cynlluniau archwilio mewnol ac allanol 
• Gweithdy ar yr awydd i gymryd risgiau 
• Adolygiad o'r Cynllun Parhad Busnes 
• Rhestr o bolisïau 
• Diweddariad y Swyddfa Archwilio Genedlaethol 
• Argymhellion yr Adolygiad o Effeithiolrwydd y Bwrdd 
• Adroddiad at wraidd y mater – risg ariannol 

Nodwyd y byddai'r adroddiad at wraidd y mater ar risg ariannol yn cael ei gynnwys ym mlaengynllun busnes y Bwrdd i'w drafod mewn cyfarfod yn y dyfodol. 

Cam gweithredu: Diweddaru Blaengynllun busnes y Bwrdd drwy ychwanegu'r ‘Adroddiad at wraidd y mater – risg ariannol’ ato 

Penderfynwyd: Y dylai'r diweddariad gael ei nodi. 

Cyflwynodd y Prif Weithredwr yr adroddiad, gan dynnu sylw at effaith pandemig Covid-19 ar waith y Comisiwn. Roedd y Comisiwn wedi dod drwy'r pandemig hwn yn dda, ond roedd yn wynebu heriau o hyd. Rodd gan y Comisiynwyr ddiddordeb yn effaith pandemig y Coronafeirws ar gynhyrchiant, beth y gallai'r ‘normal newydd’ ei olygu ar ôl i'r pandemig ddod i ben a'r cyfle roedd hyn yn ei gynnig i edrych o'r newydd ar ffyrdd o wneud pethau. Rhoddwyd diweddariad ar benderfyniad y Llywodraeth i roi'r cyfrifoldeb am reoleiddio niweidiau ar-lein i Ofcom. 

Nodwyd y byddai cyflwyniad ysgrifenedig y Comisiwn i ymchwiliad y Pwyllgor Dethol Gweinyddiaeth Gyhoeddus a Materion Cyfansoddiadol yn Senedd y DU yn cael ei ddosbarthu i bob Comisiynydd. 

Diolchodd y Comisiynwyr i'r Prif Weithredwr a'r timau am y diweddariad cynhwysfawr. Nodwyd y posibilrwydd o symleiddio diweddariad y Prif Weithredwr er mwyn lleihau'r adnoddau sydd angen eu defnyddio i'w lunio, heb leihau'r wybodaeth allweddol ynddo. 

Cam gweithredu: Y Cyfarwyddwr Rheoleiddio i ddosbarthu cyflwyniad ysgrifenedig y Comisiwn i ymchwiliad y Pwyllgor Dethol Gweinyddiaeth a Materion Cyfansoddiadol. 

Penderfynwyd: Y dylai'r adroddiad gael ei nodi. 

Penderfynwyd: Y dylai system olrhain camau gweithredu Bwrdd y Comisiwn gael ei nodi. 

Penderfynwyd: Y dylai Blaengynllun busnes y Bwrdd gael ei nodi. 

Diolchodd y Cadeirydd i Anna Carragher ar ran Bwrdd y Comisiwn a'r Tîm Gweithredol am ei chyfraniad at Fwrdd y Comisiwn dros y naw mlynedd diwethaf Nodwyd ei bod yn debygol mai hi oedd yr aelod o'r Bwrdd a oedd wedi gwasanaethu am y cyfnod hwyaf hyd yma. Roedd Anna wedi dod â chyfoeth o brofiad gyda hi ac roedd ei gwaith yng Ngogledd Iwerddon wedi bod o gymorth mawr i'r Comisiwn. 

Diolchodd y Prif Weithredwr i'r Cadeirydd, John Holmes, ar ran y Tîm Gweithredol a'r staff yn gyffredinol am ei arweinyddiaeth dros y pedair blynedd diwethaf. Diolchodd Alasdair Morgan i'r Cadeirydd ar ran y Comisiynwyr eraill a dymunodd yn dda iddo i'r dyfodol.