Canllawiau i Ymgeiswyr ac Asiantiaid yn is-etholiadau Senedd y DU ym Mhrydain Fawr

Y dyddiad cynharaf y gallwch ddod yn ymgeisydd yn swyddogol yw'r diwrnod y daw'r swydd yn wag.

Er enghraifft, os yw'r swydd wag oherwydd ymddiswyddiad AS, bydd y swydd wag yn digwydd pan fyddant yn dechrau swydd anghymwys o dan y Goron. Mae hyn oherwydd na all Aelod Seneddol ymddiswyddo, ond byddai derbyn swydd stiward neu feili tri Chantref Chiltern Ei Fawrhydi neu Faenor Northstead, sy'n swyddi o dan y Goron, yn arwain at anghymhwyso ac, o ganlyniad, swydd wag.

Os yw Aelod Seneddol wedi marw, mae'r swydd wag yn digwydd ar y dyddiad y bu farw.

Byddwch yn dod yn ymgeisydd yn swyddogol ar y diwrnod y daw'r swydd yn wag os byddwch eisoes wedi datgan eich bod yn ymgeisydd yn yr etholiad (neu os bydd rhywun arall wedi datgan eich bod yn ymgeisydd) ar neu cyn y dyddiad hwn.

Os byddwch chi neu eraill, ar ôl y dyddiad hwn, yn datgan y byddwch yn ymgeisydd yn yr etholiad, byddwch yn dod yn ymgeisydd ar y dyddiad y gwneir datganiad o'r fath, neu ar y dyddiad y byddwch yn cyflwyno'ch papurau enwebu, pa un bynnag sydd gynharaf.

Unwaith y byddwch wedi dod yn ymgeisydd yn swyddogol, mae gennych hawl i gopi o'r gofrestr etholiadol.

Mae gennych hawl hefyd i gael copi o’r rhestrau o bleidleiswyr absennol ar gyfer yr etholaeth rydych yn sefyll ynddi.

Yn ogystal, gallwch ddefnyddio ystafelloedd ac ysgolion a ariennir yn gyhoeddus ar gyfer cyfarfodydd cyhoeddus.

Gallwch ddechrau ymgyrchu cyn i chi ddod yn ymgeisydd yn swyddogol. Ceir rhagor o wybodaeth yn ein canllawiau ar ymgyrchu.