Ymgyrch cofrestru pleidleiswyr newydd yn dathlu’r elfen ‘teimlo'n dda’ o gymryd rhan mewn democratiaeth

Mae ymgyrch newydd gan y Comisiwn Etholiadol yn lansio heddiw ac yn galw ar bob pleidleisiwr i gofrestru i bleidleisio os ydyn nhw am ddweud eu dweud mewn etholiadau ar ddydd Iau 2 Mai.

Bwriad yr ymgyrch yw annog pobl i ddathlu ac ymfalchïo mewn bod ar y gofrestr etholiadol. Mae’n galw ar bobl i gofrestru cyn yr etholiadau yng Nghymru a Lloegr ddydd Iau 2 Mai, cyn i’r dyddiad cau ar gyfer cofrestru ddod i ben ar 16 Ebrill. Mae'n nodi newid o ymgyrchoedd blaenorol sydd wedi pwysleisio pa mor gyflym a hawdd yw cofrestru, i ganolbwyntio yn lle hynny ar yr elfen ‘teimlo'n dda’ o gymryd rhan mewn democratiaeth. 

Gwyliwch hysbyseb yr ymgyrch newydd yma. 

Nod yr hysbyseb yw apelio at lawer o'r grwpiau sy'n llai tebygol o fod wedi'u cofrestru, gan gynnwys pobl ifanc, lleiafrifoedd ethnig, a phleidleiswyr anabl. 

Meddai Craig Westwood, Cyfarwyddwr Cyfathrebu: 

“Mae etholiadau yn gyfle pwysig i bobl gael dweud eu dweud ar y materion sydd o bwys iddyn nhw. Ac eto mae cymaint â 7 miliwn o bobl yn colli’r cyfle hwn oherwydd nad ydyn nhw ar y gofrestr etholiadol, sy’n cynrychioli miliynau o leisiau coll.

“Cyn etholiadau mis Mai, a gydag etholiad cyffredinol ar y gorwel, mae’n bwysig bod pobol yn cael eu cofrestru fel bod eu llais yn cael ei glywed yn y blwch pleidleisio. Mae gan unrhyw un sydd am fwrw pleidlais yn etholiadau mis Mai tan y dyddiad cau ar 16 Ebrill i gofrestru.”

Mae cofrestru pleidleiswyr yn agored i holl ddinasyddion Prydain ac Iwerddon a dinasyddion cymwys y Gymanwlad sy'n byw yn y DU, sy'n 18 oed neu'n hŷn. Bydd angen i unrhyw un a oedd ar y gofrestr yn flaenorol ac sydd wedi symud tŷ yn ddiweddar neu y mae eu manylion wedi newid, gofrestru eto.

Bydd ymgyrch ymwybyddiaeth y cyhoedd y Comisiwn yn cael ei chynnal ar draws y cyfryngau torfol a sianeli digidol wedi’u targedu, gan gynnwys teledu, fideo ar alw, arddangosiadau y tu allan i’r cartref ac arddangosiadau digidol. Mae'r ymgyrch yn cael ei chynnal o heddiw tan y dyddiad cau ar gyfer cofrestru.  

Diwedd

I gael rhagor o wybodaeth, cysylltwch â swyddfa cyfryngau’r Comisiwn Etholiadol drwy ffonio 020 7271 0704, neu 07789 920 414 y tu allan i oriau swyddfa. Fel arall gallwch e-bostio  [email protected]