Ymgynghoriad ar ganllawiau statudol drafft: argraffnodau digidol

Cynhaliom ymgynghoriad ar ganllawiau statudol drafft ar argraffnodau digidol rhwng mis Hydref a mis Rhagfyr 2022.

Mae'r drefn argraffnod digidol bellach ar waith (o fis Tachwedd 2023 ymlaen), a gallwch weld ein canllawiau statudol yma.

Crynodeb

Ychwanegir ‘argraffnodau’ at ddeunydd gwleidyddol neu ddeunydd sy'n gysylltiedig ag etholiad er mwyn dangos pwy sy'n gyfrifol amdano. Mae hyn yn helpu i sicrhau tryloywder ar gyfer pleidleiswyr ynghylch pwy sy'n gwario arian i ddylanwadu arnynt.

Mae Deddf Etholiadau 2022 yn cynnwys darpariaethau sy'n mynnu bod argraffnodau ar ddeunydd ymgyrchu digidol.  

Mae'r Ddeddf yn cyflwyno dyletswydd newydd ar y Comisiwn i baratoi canllawiau statudol yn esbonio'r drefn o ran argraffnodau digidol a'r modd y bydd y Comisiwn a'r heddlu yn eu dilyn i arfer eu swyddogaethau gorfodi. Ar ôl i'r canllawiau gael eu paratoi, cânt eu cyflwyno i'r Ysgrifennydd Gwladol dros Ffyniant Bro, Tai a Chymunedau. Yna, gall y Gweinidog addasu'r canllawiau, cyn eu cyflwyno gerbron y senedd i gael eu cymeradwyo.

Bydd angen i bleidiau ac ymgyrchwyr ddeall y cyfreithiau newydd ar gyfer argraffnodau digidol a chydymffurfio â nhw ledled y DU, ni waeth beth fo'u maint na'u profiad. Bydd eich safbwyntiau yn ein helpu i sicrhau bod y canllawiau a gyflwynwn i'r Ysgrifennydd Gwladol mor glir a defnyddiol â phosibl. 

Pan ddaw'r canllawiau statudol i rym ym mis Tachwedd 2023, rhaid i'r Comisiwn a'r heddlu ystyried y canllawiau wrth iddynt orfodi'r drefn. Ar gyfer ymgyrchwyr, bydd dangos eu bod wedi cydymffurfio â'r canllawiau yn amddiffyniad statudol i unrhyw drosedd o dan y cyfreithiau newydd.

Sut i ymateb

Bydd yr ymgynghoriad ar agor rhwng 31 Hydref 2022 a 20 Rhagfyr 2022.

Gallwch ymateb:

  • drwy lenwi ein ffurflen ar-lein 
  • drwy e-bostio eich sylwadau i [email protected] neu
  • drwy ysgrifennu atom yn y cyfeiriad canlynol:

Regulatory Support Team
The Electoral Commission
3 Bunhill Row
London EC1Y 8YZ

Drwy gydol y cyfnod ymgynghori, byddwn yn parhau i ymgysylltu â'r gymuned etholiadol a'r gymuned ymgyrchu. Rydym yn fodlon cwrdd ag unrhyw grwpiau neu unigolion sydd â diddordeb ar gais. 

Os oes gennych unrhyw gwestiynau, mae croeso i chi gysylltu ar 0207 271 0527.

Sut y gwnaethom ddatblygu'r canllawiau drafft

Gwnaethom siarad ag amrywiaeth o bleidiau gwleidyddol ac ymgyrchwyr nad ydynt yn bleidiau ledled y DU i lywio'r canllawiau drafft. 

Gwnaethom eu holi ynghylch:

  • eu dealltwriaeth o'r darpariaethau 
  • y modd maent yn defnyddio deunydd digidol yn eu hymgyrchu gwleidyddol 
  • pa lwyfannau digidol a ddefnyddir ganddynt i gyrraedd pleidleiswyr  
  • sut maent yn gweld ymgyrchu digidol yn datblygu yn y dyfodol

Gweld y canllawiau drafft.

 

Cefndir

Pwy ydym ni 

Y Comisiwn Etholiadol yw'r corff annibynnol sy'n goruchwylio etholiadau ac yn rheoleiddio cyllid gwleidyddol yn y DU. Rydym yn gweithio i hyrwyddo hyder y cyhoedd yn y broses ddemocrataidd a sicrhau ei huniondeb.

Rydym yn cefnogi ymgeiswyr, pleidiau ac ymgyrchwyr drwy ddarparu canllawiau ac adnoddau cynhwysfawr i'w helpu i ddeall beth y dylent ei wneud i gydymffurfio â'r gyfraith, ac sy'n eu galluogi i ganolbwyntio eu hymdrechion ar ymgysylltu â phleidleiswyr. 

Ceir rhagor o wybodaeth am ein rôl a'n cyfrifoldebau ar ein gwefan.

Deddfwriaeth gyfredol ar argraffnodau

Mae cyfreithiau sefydledig ar y gofyniad i gael argraffnodau ar ddeunydd argraffedig sy'n ymwneud ag etholiadau, refferenda a deisebau adalw yn y DU. 

Yn 2020, cyflwynodd llywodraeth yr Alban ofynion argraffnodau ar ddeunydd etholiadol digidol a ddefnyddir yn etholiadau Senedd yr Alban ac etholiadau cyngor yn yr Alban. 

Ceir rhagor o wybodaeth am y cyfreithiau hyn yn ein canllawiau cyfredol. 

Deddf Etholiadau 2022 

Mae Deddf Etholiadau'r DU 2022 yn cynnwys darpariaethau ar y gofyniad i gael argraffnodau ar rai mathau o ddeunydd digidol. Bydd y cyfreithiau digidol newydd ar argraffnodau yn gymwys: 

  • ledled y DU
  • i bob etholiad a gadwyd yn ôl

Mae Adran 54 o Ddeddf Etholiadau 2022 yn cynnwys dyletswydd benodol ar y Comisiwn i lunio canllawiau statudol ar y drefn argraffnodau digidol newydd a ddaw i rym ym mis Tachwedd 2023. 

Yn wahanol i'r rhan fwyaf o ganllawiau'r Comisiwn, mae'n rhaid i ganllawiau statudol gael eu cymeradwyo gan y Gweinidog perthnasol, a Senedd y DU.