Cynhaliwyd Wythnos Croeso i Dy Bleidlais 2026 ym mis Mawrth
Ynghyd â dros 60 o bartneriaid cyflawni, rydym yn amcangyfrif bod Wythnos Croeso i Dy Bleidlais wedi ymgysylltu â dros 700,000 o bobl ifanc ac wedi cefnogi dros 30,000 o addysgwyr a rhanddeiliaid.
Helpodd aelodau o'n rhwydwaith llais ieuenctid i osod y thema 'Pam Mae Pleidleisio'n Bwysig', ac fe wnaethom gefnogi pobl ifanc i ddysgu sut y gall eu pleidlais a'u llais gael effaith ar eu bywydau a'u cymunedau.
Sut y cymerodd pobl ran yn 2026
Bu ysgolion, grwpiau ieuenctid, awdurdodau lleol a miloedd o bobl ifanc ledled y DU yn greadigol wrth gymryd rhan yn yr wythnos. O ymgyrchoedd cofrestru i sesiynau dan arweiniad cyfoedion, cymerodd pobl ifanc ran mewn pob math o gyfleoedd i ddysgu rhagor am bleidleisio a democratiaeth.
Gwelsom:
700,000 o bobl ifanc yn cymryd rhan*
30,000 o addysgwyr a rhanddeiliaid yn cael eu cefnogi i ddarparu addysg ddemocrataidd*
60 o bartneriaid dosbarthu yn cefnogi'r wythnos
440 o sefydliadau yn cofrestru'n uniongyrchol i gymryd rhan
1.3 miliwn o argraffiadau digidol
*Mae’r amcangyfrifon yn seiliedig ar ymatebion i arolygon, adborth partneriaid, a modelu ymgysylltiad ysgolion. Mae'r ffigurau'n cynrychioli'r cyrhaeddiad cyffredinol a gallant gynnwys gwahanol lefelau o ymgysylltiad.
Ar ôl cymryd rhan yn yr wythnos**:
Cytunodd 83% o bobl ifanc eu bod yn fwy tebygol o gofrestru i bleidleisio
Dywedodd 78% o bobl ifanc eu bod yn deall mwy am pam mae pleidleisio'n bwysig
Dywedodd 100% o addysgwyr fod yr wythnos wedi cynyddu gwybodaeth eu pobl ifanc am ddemocratiaeth
Dywedodd 86% o addysgwyr fod hyder eu pobl ifanc i gymryd rhan mewn democratiaeth wedi cynyddu
**Canran ymatebwyr yr arolwg
Cymerodd ein pobl ifanc ran mewn etholiad ffug gyda chyfoedion fel ymgeiswyr gyda maniffestos yn ymwneud â gweithgareddau neu gynllunio o fewn y grŵp ieuenctid. Cymerodd ein pobl ifanc ran mewn dadl a thrafodaeth ynghylch yr etholiad ffug yn ogystal â democratiaeth ac etholiadau cyffredinol. Dywedodd y bobl ifanc eu bod wedi dysgu am brosesau etholiadau a newidiadau yn yr oedran pleidleisio/cofrestru.
Ymarferydd ieuenctid ar gymryd rhan yn Wythnos Croeso i Dy Bleidlais 2026
Defnyddiom ddeunydd y wers ysgol gynradd i drafod a deall rolau dinasyddion, ASau, y Senedd a’r llywodraeth yn well. Ymarferodd gwirfoddolwyr sut i gyflwyno araith i’r senedd a chawsom sesiwn holi ac ateb am y llun o Dŷ’r Cyffredin.
Athro ysgol gynradd ar gymryd rhan yn Wythnos Croeso i Dy Bleidlais 2026
Yng Nghymru
Cynhaliodd aelod o'n rhwydwaith llais ieuenctid dros Gymru ei ffair etholiadau ei hun yng Ngholeg Gwent. Siaradodd y mynychwyr ag ymgeiswyr a chynrychiolwyr o bleidiau gwleidyddol a chofrestrodd 300 o bobl ifanc i bleidleisio.
Ymunodd 45 o fyfyrwyr chweched dosbarth ag ASau yn y Senedd i ofyn cwestiynau i'r ASau am y materion sy'n bwysig iddyn nhw.
Yn Lloegr
Daeth Diwrnod Strategaeth Democracy Classroom â 63 o sefydliadau ieuenctid ac addysg ynghyd. Yn y digwyddiad, cadeiriodd aelodau o'n rhwydwaith llais ieuenctid ar gyfer Lloegr banel gydag uwch staff y Comisiwn Etholiadol i drafod dyfodol democratiaeth.
Cynhaliodd aelodau Senedd Ieuenctid yr Alban hustyngau i 70 o bobl ifanc glywed gan ymgeiswyr ASau.
Creodd ein rhwydwaith llais ieuenctid yn yr Alban gynnwys cyfryngau cymdeithasol am etholiadau mis Mai, ac fe wnaethon nhw ddathlu’r wythnos gydag ymweliad â Senedd yr Alban.
Yng Ngogledd Iwerddon
Cynhaliodd Fforwm Ieuenctid Gogledd Iwerddon ddau ddigwyddiad ynglŷn â ‘Pam mae Pleidleisio’n Bwysig’ yn Derry/Londonderry a Belfast a groesawodd fwy na 180 o bobl ifanc ac addysgwyr.
Ymunodd mwy na 1140 o ddisgyblion ysgol gynradd yng Ngogledd Iwerddon â gwers fyw am bleidleisio a chael llais, a gynhaliwyd gan Just2easy.
