Nodwch, rydym yn dangos gwybodaeth sydd yn berthnasol i Gymru yn unig.
Pwy sy'n eich cynrychioli chi
Gelwir y bobl a etholir i'ch cynrychioli yn eich cyngor lleol yn gynghorwyr lleol.
Rydych chi ac eraill yn eich ardal yn eu hethol am gyfnod o bedair blynedd ond gall is-etholiadau ddigwydd unrhyw bryd.
Rhennir yr ardal a gwmpesir gan eich cyngor lleol yn ardaloedd llai a elwir yn wardiau.
Gall eich cynghorydd lleol wneud y canlynol:
cymryd rhan yn y gwaith o gyfrifo faint i'w wario ar wasanaethau lleol fel parciau, llyfrgelloedd a ffyrdd
datblygu cynlluniau ar gyfer y dyfodol ar gyfer eich ardal
delio ag unrhyw bryder sydd gennych am wasanaethau lleol y mae'r cyngor yn eu darparu
Mae llawer o gynghorwyr yn gweithio'n llawn amser neu'n rhan amser mewn swyddi eraill ar ben eu gwaith fel cynghorwyr.
Gallwch gysylltu â’ch cynghorwyr lleol i ofyn cwestiynau iddynt am yr hyn sy’n digwydd yn eich ardal, neu rannu pryder. Fel arfer gallwch ddod o hyd i’w manylion cyswllt ar wefan eich cyngor.
Gallech hefyd fynd i gyfarfod cyngor yn yr oriel gyhoeddus yn eich neuadd dref neu ddinas leol a gwylio sut y gwneir penderfyniadau. Efallai y byddai’n ddefnyddiol gofyn i gynghorydd lleol esbonio beth sy’n digwydd mewn cyfarfod cyngor cyn i chi fynd er mwyn i chi wybod beth i’w ddisgwyl.
