Dylech ymgynghori â Swyddogion Canlyniadau Lleol yn ardal yr heddlu yn gynnar yn ystod y broses gynllunio ynglŷn â pharatoi papurau pleidleisio er mwyn eu galluogi i gadarnhau eu gofynion a'u trefniadau argraffu â'u cyflenwyr ar gam cynnar yn y broses.
Er nad oes modd cadarnhau cynnwys terfynol y papur pleidleisio nes bod y broses enwebu wedi cau, yn ogystal â chadarnhau'r lliw, bydd angen i chi benderfynu ar yr elfennau canlynol o'r papur pleidleisio ar gam cynnar:
rhifau'r papur pleidleisio
marc adnabod unigryw
y ‘marc swyddogol’
Cewch ddefnyddio marc swyddogol gwahanol at ddibenion gwahanol yn yr etholiad.1
Mae hynny'n golygu y gallech ddewis un marc swyddogol ar gyfer pob papur pleidleisio ar gyfer yr ardal heddlu gyfan, neu gallech ddewis cael marciau swyddogol gwahanol, e.e. ar gyfer papurau pleidleisio yn yr orsaf bleidleisio a phapurau pleidleisio a anfonwyd at bleidleiswyr post.
Yn benodol, bydd angen i chi ystyried sut y gellid sicrhau nad oes unrhyw bapurau pleidleisio yn ardal yr heddlu yn dyblygu ei gilydd. Bydd angen i'r marc adnabod unigryw fod yn unigryw i bob papur pleidleisio drwy'r ardal heddlu gyfan. Os penderfynwch fod y marciau adnabod unigryw i'w defnyddio drwy'r ardal heddlu gyfan yn cynnwys ailadrodd rhif y papur pleidleisio ynghyd â rhagddodiad, dylech ystyried datblygu rhagddodiaid unigryw ar gyfer pob ardal bleidleisio a fyddai wedyn yn rhoi hyblygrwydd i Swyddogion Canlyniadau Lleol o ran sut maent yn rhifo'r papurau pleidleisio o fewn eu hardal bleidleisio.