Mae ymgeiswyr, pleidiau ac ymgyrchwyr yn defnyddio tactegau gwahanol yn ystod y cyfnod cyn etholiad er mwyn ceisio dylanwadu ar sut y byddwch yn pleidleisio.

Gallwch ddod o hyd i atebion i gwestiynau cyffredin am y tactegau ymgyrchu a ddefnyddir mewn etholiadau, gan gynnwys sut mae ymgeiswyr, pleidiau ac ymgyrchwyr yn dylunio neu'n cyflwyno deunydd ymgyrchu.

Pleidiau yn ymdrin â phleidleisiau post neu'n annog pobl i bleidleisio drwy'r post

Nid yw pleidiau'n torri unrhyw reolau os byddant yn annog pleidleiswyr i wneud cais i bleidleisio drwy'r post, gan gynnwys drwy rannu ffurflenni cais am bleidlais bost. Darllenwch fwy am sut y gall pleidiau ac ymgyrchwyr annog pobl i bleidleisio drwy'r post.

Yn etholiadau cyffredinol Senedd y DU, mewn pob etholiad yn Lloegr a Gogledd Iwerddon, ac mewn etholiadau Comisiynwyr yr Heddlu a Throseddu yng Nghymru, gall ymgyrchwyr dim ond trin pleidlais bost aelod agos o’u teulu neu rywun y maent yn darparu gofal rheolaidd ar ei gyfer. Yn yr etholiadau hyn, mae’n drosedd i ymgyrchwyr drin pleidlais bost unrhyw bleidleisiwr arall. Dysgwch fwy am ymdrin â phleidleisiau post.

Gwefannau yn hyrwyddo pleidleisio tactegol

Nid oes cyfraith yn erbyn gwefannau yn hyrwyddo pleidleisio tactegol.

Mae yna derfynau yn y gyfraith ar faint ellir ei wario yn ymgyrchu dros neu yn erbyn plaid wleidyddol mewn etholiadau yn y DU, gan gynnwys ar safleoedd pleidleisio tactegol.

Efallai y bydd angen adrodd am y math hwn o weithgarwch ar ôl etholiad. Darllenwch fwy am wariant etholiadol a'n rôl.

Llenyddiaeth ymgyrchu yn cyrraedd yr un pryd â phleidleisiau post neu bapurau pleidleisio

Gall pleidiau holi cynghorau i ganfod pryd mae pleidleisiau post yn cael eu hanfon er mwyn ceisio anfon eu deunydd ymgyrchu o gwmpas yr un amser. Nid oes unrhyw reolau yn erbyn hyn.

Dosbarthu taflenni ar adegau penodol

Nid oes unrhyw reolau o ran pa amser o'r dydd y gellir dosbarthu deunydd ymgyrchu. Os ydych yn bryderus ynglŷn ag ymddygiad y blaid, dylech gysylltu â hi yn uniongyrchol.

Dyluniad deunydd ymgyrchu

Er ein bod yn annog tryloywder mewn technegau a deunydd ymgyrchu, nid yw dyluniad deunydd yn rhan o gylch gwaith unrhyw reoleiddwyr.

Os oes gennych bryderon am ddyluniad deunydd ymgyrchu, gallech gysylltu â'r blaid, y sefydliad neu'r unigolyn sy'n gyfrifol er mwyn rhannu eich barn.

Pleidiau gwleidyddol neu ymgeiswyr nad ydynt yn defnyddio enw, logo na lliwiau'r blaid yn eu deunydd ymgyrchu

Nid oes unrhyw beth yn y gyfraith sy'n ei gwneud yn ofynnol i logo plaid gael ei gynnwys mewn deunydd ymgyrchu. Nid oes gofyniad yn y gyfraith chwaith i nodi pa liwiau neu frandio y mae angen i blaid neu ymgeisydd eu defnyddio yn eu deunydd.

Deunyddiau ymgyrchu sy'n edrych fel papur newydd

Ni chaiff deunydd ymgyrchu edrych fel cerdyn pleidleisio ac mae'n rhaid iddo gynnwys argraffnod. Nid oes unrhyw beth ychwanegol yn y gyfraith sy'n nodi sut y dylai deunydd ymgyrchu gael ei ddylunio neu beidio â chael ei ddylunio.