Newidiadau i drefniadau pleidleisio drwy ddirprwy

Mae’r newidiadau i bleidleisio drwy ddirprwy yn cynnwys:

• Gallwch nawr wneud cais ar-lein am rai mathau o bleidlais drwy ddirprwy.
• Bydd eich hunaniaeth yn cael ei wirio fel rhan o'r broses ymgeisio. Bydd angen dilysu ID (ac eithrio pleidleisiau drwy ddirprwy brys) i wneud cais ar-lein ac ar bapur. 
• Bellach mae cyfyngiad ar faint o bobl y gall rhywun fod yn ddirprwy ar eu rhan. Gallwch weithredu fel dirprwy ar gyfer dau berson. Os byddwch yn pleidleisio ar ran pleidleiswyr y DU sy’n byw dramor, gallwch weithredu fel dirprwy ar gyfer hyd at bedwar o bobl (ond dim ond dau o’r rheini sy’n gallu byw yn y DU).

Mae’r newidiadau’n berthnasol i:

• Etholiadau Senedd y DU (ac eithrio Gogledd Iwerddon), gan gynnwys is-etholiadau a deisebau adalw
• Etholiadau lleol yn Lloegr
• Etholiadau Comisiynwyr yr Heddlu a Throseddu yng Nghymru a Lloegr

Bydd y cyfyngiad ar faint o bobl y gall pleidleisiwr weithredu fel dirprwy ar eu rhan hefyd yn berthnasol i etholiadau lleol ac etholiadau’r Cynulliad yng Ngogledd Iwerddon.

Nid yw’r newidiadau hyn yn berthnasol i etholiadau Senedd yr Alban nac etholiadau llywodraeth leol yn yr Alban, nac i etholiadau'r Senedd nac etholiadau llywodraeth leol yng Nghymru.

Rydym wedi darparu canllawiau wedi’u diweddaru a chymorth i weinyddwyr etholiadol i'w helpu i ddeall a chyflawni'r newidiadau.

Rydym yn cefnogi awdurdodau lleol i gyfleu’r newidiadau hyn i bleidleiswyr sydd am wneud cais am bleidlais drwy ddirprwy, gan gynnwys amlygu iddynt yr opsiwn i wneud cais am bleidlais drwy ddirprwy ar-lein lle mae’n bodoli.

Rydym wedi dweud wrth bleidiau gwleidyddol ac ymgyrchwyr am y newidiadau i bleidleisio drwy ddirprwy.