Hygyrchedd mewn gorsafoedd pleidleisio

Os ydych yn dymuno, gallwch fynd â'ch ffôn i'r bythau pleidleisio i ddefnyddio apiau chwyddwydr neu destun i leferydd, neu dortsh y ffôn i wella goleuni. Wrth ddefnyddio eich ffôn, peidiwch â thynnu unrhyw luniau y tu mewn i’r orsaf bleidleisio.  

Gallwch ddod â chymhorthion eich hun i'ch helpu i fwrw eich pleidlais. Gallai hyn gynnwys:

• tortsh
• chwyddwydr
• ap ffôn clyfar testun i leferydd

Sicrhewch eich bod yn hysbysu staff yr orsaf bleidleisio eich bod yn defnyddio eich teclyn cymorth eich hun i'ch helpu i fwrw eich pleidlais. 

Sut i ddod o hyd i’ch gorsaf bleidleisio

Bydd enw eich gorsaf bleidleisio ar eich cerdyn pleidleisio a anfonir atoch cyn yr etholiad. Gallwch hefyd ddod o hyd i’ch gorsaf bleidleisio drwy fewnbynnu eich cod post ar ein teclyn canfod gorsaf bleidleisio.

Dod â chydymaith

Os oes angen cymorth ychwanegol arnoch i fwrw eich pleidlais, gallwch ddod â chydymaith i'ch cynorthwyo. Rhaid i'ch cydymaith fod yn 18 oed [Cymru/Alban 16] neu’n hŷn. Bydd angen iddynt lenwi datganiad yn yr orsaf bleidleisio. Bydd y Swyddog Llywyddu, sef y person sy'n gyfrifol am yr orsaf bleidleisio, yn egluro'r broses hon i chi yn yr orsaf bleidleisio.

Dod â'ch anifail cymorth

Mae croeso i anifeiliaid cymorth mewn gorsafoedd pleidleisio. 

Mae staff gorsafoedd pleidleisio yna i’ch cefnogi chi. Gallant eich helpu drwy:

• egluro'r broses bleidleisio
• darparu cymorth i chi symud o gwmpas y man pleidleisio
• darparu cyfarpar i chi er mwyn eich helpu i fwrw eich pleidlais

Bydd y staff yn gwisgo bathodynnau i'ch helpu i'w hadnabod nhw.

Mae dyletswydd ar y tîm gwasanaethau etholiadol i sicrhau bod eich gorsaf bleidleisio mor hygyrch â phosibl. Mae hyn yn golygu y dylai gynnwys:

• rampiau
• clychau drws
• bythau pleidleisio lefel isel
• adnoddau gafael pensil
• cadeiriau neu seddi

Os oes parcio ar gael yn eich gorsaf bleidleisio, dylai mannau parcio fod ar gadw i bleidleiswyr anabl.

Dylech gysylltu â'ch tîm gwasanaethau etholiadol cyn yr etholiad i gael gwybod pa gymorth sydd ar gael. 

Gallwch ofyn i staff eich gorsaf bleidleisio am:

• chwyddwydrau
• copi print bras o'r papur pleidleisio i'w ddefnyddio fel ffynhonnell gyfeirio
• golau ychwanegol
• dyfais bleidleisio gyffyrddadwy

Gallwch hefyd ofyn am gymorth gan staff gorsafoedd pleidleisio i gael eich tywys i'r bwth pleidleisio ac i farcio eich pleidlais, os oes angen. 

Os oes gennych unrhyw gwestiynau ynghylch hygyrchedd yn eich gorsaf bleidleisio, gallwch gysylltu â'ch tîm gwasanaethau etholiadol a fydd yn gallu eich cynghori.

Gofyn am gymorth pellach

Os oes angen unrhyw addasiadau rhesymol arnoch nad ydynt eisoes wedi'u darparu, gallwch ofyn i'ch tîm gwasanaethau etholiadol.  

Ni ellir cymeradwyo pob cais ond efallai y cewch gynnig rhywbeth arall yn ei le.