Pleidleisio drwy ddirprwy

Os ydych yn gwybod na fyddwch yn gallu cyrraedd yr orsaf bleidleisio ar y diwrnod pleidleisio, gallwch ofyn i rywun rydych yn ymddiried ynddynt bleidleisio ar eich rhan. Gelwir hyn yn bleidlais drwy ddirprwy ac yn aml cyfeirir at y person sy'n bwrw eich pleidlais fel dirprwy.

Gall y person sy'n pleidleisio ar eich rhan naill ai fynd i'ch gorsaf bleidleisio i fwrw eich pleidlais, neu gallant wneud cais i bleidleisio ar eich rhan trwy'r post.

Darganfyddwch sut mae pleidleisio trwy ddirprwy
 

I wneud cais am bleidlais drwy ddirprwy, bydd rhaid i chi lenwi ffurflen a nodi pam na allwch fynd i’ch gorsaf bleidleisio yn bersonol.

Gall hyn fod oherwydd y byddwch ar wyliau, neu am fod cyflwr ffisegol arnoch sy’n golygu na allwch fynd i’ch gorsaf bleidleisio ar y diwrnod pleidleisio.

Bydd angen i chi gwblhau cais newydd am bleidlais drwy ddirprwy os ydych wedi symud tŷ. 

Pleidlais drwy ddirprwy ar gyfer etholiad penodol

Defnyddiwch y ffurflen hon i wneud cais am bleidlais drwy ddirprwy ar gyfer etholiad penodol. Gallai hyn fod oherwydd eich bod ar wyliau neu i ffwrdd gyda’ch gwaith ar y diwrnod pleidleisio.

Lawrlwythwch y ffurflen ar gyfer pleidleisio drwy ddirprwy mewn etholiad neu refferendwm penodol (PDF)

Pleidlais drwy ddirprwy hir-dymor neu barhaol

Defnyddiwch un o’r ffurflenni hyn os na fyddwch yn gallu mynd i’r orsaf bleidleisio hyd y gallwch ragweld, neu am gyfnod hir.

Mae’r ffurflen sydd angen i chi ei llenwi yn dibynnu ar eich rheswm dros bleidlais drwy ddirprwy.

• Mae gennych anabledd (PDF)
• Byddwch i ffwrdd ar gwrs addysg (PDF)
• Byddwch i ffwrdd gyda gwaith (PDF)
• Rydych wedi cofrestru fel pleidleisiwr tramor (PDF)
• Rydych yn gweithio dramor i'r Cyngor Prydeinig neu fel un o Weision y Goron (PDF)
• Rydych yn gwasanaethu dramor yn y Lluoedd Arfog (PDF)

Mae’r ffurflen gais yn cynnwys cyfarwyddiadau ynghylch sut i’w llenwi’n gywir.

Bydd angen i chi roi eich dyddiad geni a’ch llofnod ar eich ffurflen gais.
 

Ar ôl i chi lenwi’r ffurflen a sicrhau eich bod wedi ei llofnodi, bydd angen i chi ei hanfon at y tîm gwasanaethau etholiadol yn eich cyngor lleol. 

Gallwch anfon eich ffurflen trwy'r post. Efallai y bydd y tîm gwasanaethau etholiadol yn eich cyngor lleol hefyd yn fodlon derbyn copi o’r ffurflen wedi ei sganio trwy e-bost, ond dylech wirio gyda nhw yn gyntaf.

Mewn rhai amgylchiadau, lle bo argyfwng sy’n golygu na allwch bleidleisio’n bersonol, gallwch wneud cais am bleidlais drwy ddirprwy brys.

Rhaid i hyn fod yn rhywbeth nad oeddech yn ymwybodol ohono cyn y dyddiad cau ar gyfer pleidlais drwy ddirprwy arferol.

• Rydych wedi cael argyfwng meddygol (PDF)
• Byddwch i ffwrdd gyda gwaith (PDF)
• Os na allwch bleidleisio'n bersonol oherwydd COVID-19 (PDF). Gellir defnyddio'r ffurflen hon hefyd i newid dirprwy cyfredol os na allant bleidleisio’n bersonol ar eich rhan oherwydd COVID-19.

Gellir cyflwyno’r ceisiadau hyn hyd at 5pm ar y diwrnod pleidleisio.

Os ydych wedi dewis dirprwy ond yna’n newid eich meddwl ac am bleidleisio eich hunan, mae gennych sawl opsiwn. 

Un opsiwn yw gwneud cais i ganslo eich pleidlais drwy ddirprwy. 

• Yng Nghymru a Lloegr, cysylltwch â’ch cyngor lleol.
• Yn yr Alban, cysylltwch â'ch swyddfa cofrestru etholiadol.

Y dyddiad cau i ganslo pleidlais drwy ddirprwy yng Nghymru, yr Alban a Lloegr yw cyn 5pm, 11 diwrnod gwaith cyn yr etholiad.

Os oes pleidlais bost drwy ddirprwy eisoes wedi’i dychwelyd, ni ellir canslo’r trefniadau pleidleisio drwy ddirprwy ar gyfer yr etholiad hwnnw.

Opsiwn arall i chi yw pleidleisio’n bersonol. Gallwch wneud hyn cyn belled â’ch bod yn pleidleisio cyn eich dirprwy. Nid yw hyn yn opsiwn os yw eich dirprwy eisoes wedi pleidleisio drwy’r post ar eich rhan.

Fel arall gallwch wneud cais am bleidlais bost. Y dyddiad cau i wneud hyn yw 5pm, 11 diwrnod gwaith cyn yr etholiad y byddwch yn pleidleisio ynddo. Bydd y cais hwn i bleidleisio drwy’r post yn disodli’r cais i bleidleisio drwy ddirprwy.