Gwneud cais i bleidleisio drwy ddirprwy

Er mwyn pleidleisio mewn unrhyw etholiad yn y DU, mae'n rhaid eich bod wedi cofrestru i bleidleisio. Dysgwch a ydych yn gymwys i gofrestru a sut i wneud cais

Os nad ydych yn siŵr a oes gennych bleidlais drwy ddirprwy yn barod, cysylltwch â thîm gwasanaethau etholiadol eich cyngor lleol i gael gwybod.

Os gwyddoch na fyddwch yn gallu cyrraedd yr orsaf bleidleisio ar ddiwrnod yr etholiad, gallwch ofyn i rywun yr ydych yn ymddiried ynddo i fwrw eich pleidlais ar eich rhan. Gelwir hyn yn bleidlais drwy ddirprwy a chyfeirir yn aml at y person sy’n bwrw’r pleidlais fel eich dirprwy.

Gall y person sy’n bwrw eich pleidlais ar eich rhan naill ai fynd i’ch gorsaf bleidleisio i fwrw eich pleidlais, neu gall wneud cais i bleidleisio ar eich rhan drwy’r post.

Dysgwch sut i bleidleisio drwy ddirprwy

Mae’r cais yn cynnwys cyfarwyddiadau ar sut i’w lenwi’n gywir. Mae angen i chi ddarparu eich dyddiad geni, eich rhif Yswiriant Gwladol a’ch llofnod ar eich ffurflen gais.

Wrth gwblhau’r cais, mae angen i chi roi rheswm pam na allwch gyrraedd eich gorsaf bleidleisio yn bersonol.

Mae angen i chi gwblhau cais pleidlais drwy ddirprwy newydd os ydych wedi symud tŷ neu wedi newid eich enw.

Gallwch ddewis gwneud cais am bleidlais drwy ddirprwy ar gyfer etholiad penodol, math penodol o etholiad, neu bob etholiad y mae gennych hawl i bleidleisio ynddynt. Os nad ydych yn siŵr a oes gennych bleidlais ddirprwy eisoes, cysylltwch â’r tîm gwasanaethau etholiadol yn eich cyngor lleol. 

Pan fyddwch wedi cwblhau'r ffurflen ac wedi gwneud yn siŵr eich bod wedi ei llofnodi, bydd angen i chi ei hanfon at y tîm gwasanaethau etholiadol yn eich cyngor lleol.

Gallwch anfon eich ffurflen drwy'r post. Efallai y bydd tîm gwasanaethau etholiadol eich cyngor lleol hefyd yn derbyn copi wedi'i sganio o'ch ffurflen trwy e-bost, ond dylech wirio hyn gyda nhw yn gyntaf.

Wrth wneud cais am bleidlais drwy ddirprwy newydd, mae'n rhaid i chi ddychwelyd eich cais am bleidlais drwy ddirprwy erbyn 5pm, chwe diwrnod gwaith cyn yr etholiad.

Os oes gennych bleidlais drwy ddirprwy neu bleidlais bost yn barod

Os ydych yn gwneud newidiadau neu’n canslo pleidlais drwy ddirprwy, pleidlais bost neu bleidlais bost drwy ddirprwy sy’n bodoli eisoes, rhaid i chi wneud hynny erbyn 5pm, 11 diwrnod gwaith cyn yr etholiad.

Os ydych wedi gwneud cais am bleidlais drwy ddirprwy ar gyfer etholiad penodol a bod angen i chi ei newid, rhaid i chi gyflwyno cais newydd i bleidleisio drwy ddirprwy erbyn 5pm, chwe diwrnod gwaith cyn yr etholiad. Bydd y cais newydd hwn yn cymryd lle eich cais blaenorol.

Os oes gennych bleidlais bost eisoes a'ch bod am ei newid i bleidlais drwy ddirprwy, rhaid i chi ganslo eich pleidlais bost erbyn 5pm, 11 diwrnod gwaith cyn yr etholiad. Yna gallwch gyflwyno cais am bleidlais drwy ddirprwy erbyn 5pm, chwe diwrnod gwaith cyn yr etholiad.

Os byddwch wedi enwebu dirprwy, ond yna'n newid eich meddwl ac yn dymuno pleidleisio eich hun, mae gennych sawl opsiwn.

Un opsiwn yw y gallwch wneud cais i ganslo eich pleidlais drwy ddirprwy.

• Yng Nghymru a Lloegr, cysylltwch â'ch cyngor lleol.
• Yn yr Alban, cysylltwch â'ch swyddfa cofrestru etholiadol.

Y dyddiad cau ar gyfer canslo pleidlais drwy ddirprwy yng Nghymru, Lloegr a'r Alban yw 5pm, 11 diwrnod gwaith cyn yr etholiad.

Os bydd pleidlais ddirprwy drwy'r post eisoes wedi cael ei chwblhau a'i dychwelyd, ni all y trefniadau pleidleisio drwy ddirprwy ar gyfer yr etholiad hwnnw gael eu canslo.

Un opsiwn arall yw y gallwch bleidleisio eich hun. Gallwch wneud hyn ar yr amod eich bod yn pleidleisio cyn eich dirprwy. Ni allwch wneud hyn os bydd eich dirprwy eisoes wedi pleidleisio drwy'r post ar eich rhan.

Fel arall, gallwch wneud cais am bleidlais bost. Y dyddiad cau ar gyfer gwneud hynny yw 5pm, 11 diwrnod gwaith cyn yr etholiad y byddwch yn pleidleisio ynddo. Bydd y cais hwn am bleidlais bost yna'n canslo  eich cais i bleidleisio drwy ddirprwy.