Amcan pump: System etholiadol fodern a chynaliadwy
Mae angen i'n system etholiadol ddilyn datblygiadau mewn technoleg ac yn yr amgylchedd ehangach.
Mae angen i ni fanteisio ar y cyfleoedd i sicrhau mwy o gydymffurfiaeth, tryloywder a'r arbedion ariannol y gall technoleg eu cynnig, gan weithio i gynnal hyder pleidleiswyr yn y system etholiadol. Mae angen i ni hefyd foderneiddio'r system etholiadol er mwyn sicrhau ei bod yn gynaliadwy yn amgylcheddol. Byddwn yn gweithio tuag at gyflawni system etholiadol fodern a chynaliadwy drwy wneud y canlynol:
• manteisio ar ddata a thechnoleg i ddiwallu anghenion pleidleiswyr, ymgyrchwyr a gweinyddwyr etholiadau
• deall y risgiau newidiol i'r system etholiadol sy'n gysylltiedig â chamddefnyddio data a thechnoleg, galw am weithredu arnynt, a gweithredu arnynt ein hunain
• parhau i feithrin cydberthnasau cadarn a symleiddio arferion gwaith gyda phob corff sy'n rhan o'r system etholiadol
• cefnogi llywodraethau a'r gymuned etholiadol ehangach i fabwysiadu strategaeth a chynllun gweithredu sy'n cyrraedd y safonau amgylcheddol sy'n ofynnol gan ein system etholiadol.
Gwaith a wnaed i gyflawni'r nod hwn
- Yn ogystal â rhoi cyngor arbenigol a chynnig argymhellion i wella'r system gyfredol, gwnaethom barhau i archwilio dichonoldeb moderneiddio'r broses bleidleisio.
- Gwnaethom gwblhau a chyhoeddi astudiaethau dichonoldeb ar amrywiaeth o opsiynau pleidleisio hyblyg, gan esbonio sut y gellid rhoi ffyrdd newydd o bleidleisio ar waith.
- Gwnaethom gyhoeddi ein gwaith ymchwil diweddaraf ar gywirdeb a chyflawnrwydd, gan ddangos nad yw hyd at 8 miliwn o bobl ledled y DU wedi'u cofrestru i bleidleisio'n gywir. Fel rhan o'r gwaith hwn, gwnaethom nodi astudiaethau achos yn dangos sut y gellid moderneiddio'r system cofrestru etholiadol drwy ddefnyddio dulliau cofrestru mwy awtomatig. Mae'r ymchwil hon yn cefnogi ein galwadau am brosesau cofrestru mwy awtomataidd.
- Rydym wedi gweithio i sicrhau bod yr adroddiadau a'r data rydym yn eu cyhoeddi yn hawdd eu defnyddio ac yn rhyngweithiol, fel y gall darllenwyr eu deall a'u defnyddio'n hawdd.
- Gwnaethom barhau i fuddsoddi amser ac adnoddau mewn meithrin cydberthnasau â rheoleiddwyr a rhanddeiliaid eraill, er mwyn deall eu safbwyntiau a nodi cyfleoedd i gydweithio.
- Byddwn yn monitro, yn cynghori ac yn cefnogi diwygiadau etholiadol ledled y DU a thu hwnt.
Nid yw hyd at 8 miliwn o bobl ledled y DU wedi'u cofrestru i bleidleisio'n gywir (Mawrth 2023).
Dangosyddion perfformiad
| Dangosydd | Targed | 2023-24 |
|---|---|---|
| Bodloni gofynion deddfwriaeth amgylchedd gyfredol ac sy'n datblygu neu newydd | Dd/G – Caiff hyn ei ddatblygu pan gyhoeddir targed Llywodraeth y DU | Dd/G |
Bwriedir i'r dangosydd hwn helpu'r Comisiwn i fesur ei effaith amgylcheddol ac adrodd arni, ac i fodloni ei ofynion mewn perthynas â deddfwriaeth amgylcheddol gyfredol a newydd. Caiff targedau a llinell sylfaen eu datblygu yn ystod tair blynedd gyntaf y cynllun corfforaethol, yn dibynnu ar dargedau cyhoeddedig y llywodraeth.
Electoral Reform Society
Rydym yn cytuno'n llwyr â dadansoddiad y Comisiwn Etholiadol mewn perthynas â'n system cofrestru etholiadol sydd wedi dyddio. Rydym wedi bod yn galw am ddiwygiadau ers tro er mwyn sicrhau bod cynifer o bobl â phosibl wedi'u cofrestru i bleidleisio. Rydym yn credu mai cofrestru pleidleiswyr yn awtomatig, lle caiff dinasyddion eu cofrestru'n awtomatig ar y gofrestr etholiadol yn seiliedig ar wybodaeth a ddelir eisoes ar gronfeydd data eraill y llywodraeth, yw'r dull gweithredu gorau.
Gwaith parhaus a gwaith yn y dyfodol i gyflawni'r nod hwn
- Parhau i weithio gyda rheoleiddwyr a rhanddeiliaid eraill i ddeall eu safbwyntiau a meysydd posibl i gydweithio fel ein bod yn gweithio gyda'n gilydd ar faterion sy'n ymwneud â chynnal etholiadau, ymgyrchu a hyder yn y system cyllid gwleidyddol.
- Parhau i fonitro materion sy'n effeithio ar etholiadau ac ymgyrchoedd modern, gan gynnwys technoleg sy'n dod i'r amlwg, megis deallusrwydd artiffisial.
- Parhau i ddefnyddio ein gwaith ymchwil ar gywirdeb a chyflawnrwydd i eirioli dros system fwy modern ar gyfer cofrestru pleidleiswyr, yn enwedig yng ngoleuni nifer y bobl nad ydynt wedi'u cofrestru'n gywir ar hyn o bryd.