Meini prawf ar gyfer cofrestru enw, disgrifiadau neu arwyddluniau plaid

Fel canllaw, ni allwn gofrestru enw, disgrifiad nac arwyddlun sydd, yn ein barn ni:

  • yn debygol o gamarwain pleidleiswyr
  • yr un peth ag enw, disgrifiad neu arwyddlun cofrestredig arall sydd ar yr un gofrestr
  • yr un peth ag enw, disgrifiad neu arwyddlun gan blaid ddadgofrestredig a oedd ar yr un gofrestr ac sydd wedi'i ddiogelu
  • yn gallu peri i bleidleiswyr ei ddrysu ag enw, disgrifiad neu arwyddlun plaid arall sydd eisoes wedi'i gofrestru neu ei ddiogelu
  • yn debygol o fynd yn groes i gyfarwyddiadau neu ganllawiau pleidleisio a roddwyd ar gyfer pleidleisio neu eu llesteirio
  • yn anweddus neu'n sarhaus
  • yn cynnwys geiriau gwaharddedig penodol
  • yn acronym, neu'n cynnwys acronym neu dalfyriad nad yw'n adnabyddus nac yn cael ei ddefnyddio'n eang, ac nad yw wedi'i sillafu fesul llythyren
  • wedi'i gysylltu mewn unrhyw ffordd â deunydd ar-lein neu sy'n cyfeirio at gynnwys ar-lein
  • yn cynnwys cyfeiriad at enw unigolyn oni bai bod yr unigolyn yn uniongyrchol gysylltiedig â'ch plaid
  • ag arwyddlun sy'n cynnwys testun na ellir ei ddarllen ar y maint y mae arwyddluniau yn ymddangos ar bapurau pleidleisio (2cm sgwâr)
  • yn hirach na chwe gair
  • nad yw mewn sgript Rufeinig (h.y. yr wyddor Lladin)
  • yn debygol o gyfateb i drosedd os caiff ei gyhoeddi

Rhifolion

Rydym yn annhebygol o gymeradwyo enw, disgrifiad neu arwyddlun os yw'n dechrau neu'n gorffen gyda rhif. Bydd angen i chi ei sillafu fel gair. Mewn rhai etholiadau, gofynnir i bleidleiswyr roi ymgeiswyr mewn trefn o ran eu dewis gan ddefnyddio rhifau, ac mae perygl y bydd cael rhif yn yr un enw yn gamarweiniol. 

Ieithoedd

Gallwch wneud cais i ddefnyddio iaith heblaw Saesneg. Gallwch gofrestru enw, disgrifiadau ac arwyddluniau eich plaid yn Gymraeg a Saesneg ar gyfer cofrestr Prydain Fawr neu yn Saesneg a Gwyddeleg ar gyfer cofrestr Gogledd Iwerddon.

Yng Nghymru, gall y fersiynau cofrestredig Cymraeg a Saesneg ymddangos ar bapurau pleidleisio. Mewn rhannau eraill o'r DU, dim ond mewn un iaith y gall enw'r blaid ymddangos ar y papur pleidleisio.

Os ydych am gofrestru enw, disgrifiadau neu arwyddluniau mewn iaith ar wahân i Saesneg, rhaid i chi ddarparu cyfieithiad Saesneg cywir fel rhan o'ch cais. Caiff pob cyfieithiad ei wirio i gadarnhau ei fod yn gywir. Rhaid i enw plaid a'r disgrifiadau fod mewn sgript Rufeinig (yr wyddor Lladin). 

‘Dim o'r uchod’

Ni chewch gofrestru ‘Dim o'r uchod’ nac ymadroddion tebyg, naill ai ar eu pen eu hunain nac ar y cyd â geiriau neu ymadroddion eraill.

Hawlfraint a nodau masnach

Nid ydym yn archwilio i weld a oes achos o dorri hawliau eiddo deallusol wrth gofrestru nodau adnabod plaid. Felly, cyn i chi wneud cais, dylech sicrhau nad yw eich nodau adnabod yn torri unrhyw gyfreithiau hawlfraint a nodau masnach. 

Os byddwch yn cofrestru nodau adnabod eich plaid ac yna'n darganfod eu bod yn torri cyfreithiau hawlfraint neu nodau masnach, gallai'r perchennog cofrestredig wneud her gyfreithiol yn eich erbyn. 

I gael rhagor o wybodaeth, ewch i wefan Swyddfa Eiddo Deallusol y Llywodraeth.

Mae'r prawf hwn yn edrych ar b'un a fyddai nod adnabod plaid (enw, disgrifiad neu arwyddlun) yn debygol o arwain pleidleisiwr i naill ai pleidleisio mewn ffordd nas bwriadwyd ganddo (er enghraifft, dros blaid heblaw am ei ddewis blaid) neu fel arall farcio ei bapur pleidleisio mewn ffordd nas bwriadwyd ganddo.

Dylech chwilio ar y rhyngrwyd i weld a oes unrhyw grwpiau neu sefydliadau presennol sydd ag enw neu logo sydd yr un peth â'r nodau adnabod rydych yn dymuno eu cofrestru, neu'n debyg iddynt. Ni allwn gofrestru nod adnabod os byddwn o'r farn ei fod yn debygol o arwain pleidleisiwr i gredu ei fod yn pleidleisio dros sefydliad heblaw'r blaid, neu sefydliad sy'n gysylltiedig â'r blaid.  

Mae hefyd yn ofynnol i ni ystyried a fyddai nod adnabod yn mynd yn groes i gyfarwyddiadau neu ganllawiau ar gyfer pleidleisio (er enghraifft 'ticiwch yma’). Byddwn yn gwrthod nod adnabod os byddwn o'r farn y byddai pleidleisiwr yn debygol o wneud camgymeriad ar y papur pleidleisio a fyddai'n annilysu ei bleidlais, er enghraifft drwy bleidleisio dros ormod o ymgeiswyr.

Gall pleidiau ddewis cofrestru ar gofrestr Prydain Fawr neu gofrestr Gogledd Iwerddon, neu'r ddwy. Ni allwn gofrestru nod adnabod sydd yr un peth â nod adnabod plaid arall ar yr un gofrestr (Prydain Fawr neu Ogledd Iwerddon). 

Ym Mhrydain Fawr, gall pleidiau ddewis ym mha ran neu rannau o'r DU y maent am gofrestru (Cymru, Lloegr a'r Alban). Ni allwn gofrestru nod adnabod sydd, yn ein barn ni, yn debygol o beri i bleidleiswyr ddrysu â nod adnabod plaid arall sydd wedi'i gofrestru ar yr un rhan o'r gofrestr. 

Mae'r un prawf yn gymwys i gofrestr Gogledd Iwerddon yn ei chyfanrwydd. 

Ar ôl dadgofrestru, caiff nodau adnabod plaid eu diogelu am gyfnod o amser. 

Os gwnaeth y blaid ddadgofrestru o'i gwirfodd a bod ei hincwm/gwariant ar gyfer blwyddyn ariannol y blaid cyn ei dadgofrestru yn £25,000 neu fwy, yna bydd ei nodau adnabod yn cael eu diogelu tan ddiwedd blwyddyn ariannol y blaid yn dilyn y flwyddyn pan gafodd ei dadgofrestru. Ym mhob achos arall, caiff nodau adnabod y blaid eu diogelu tan ddiwedd y flwyddyn ariannol pan gafodd y blaid ei dadgofrestru. Nid yw'r broses gofrestru yn diogelu eich nodau adnabod rhag cael eu defnyddio gan bobl eraill mewn mannau eraill ar wahân i bapur pleidleisio. Er enghraifft, nid yw'n atal pobl eraill rhag defnyddio eich nodau adnabod yn eu deunydd ymgyrchu os dymunant wneud hynny. 

Os ydych am atal pobl rhag gwneud hyn, dylech geisio cyngor cyfreithiol annibynnol ar ffyrdd eraill o ddiogelu eich hawliau eiddo deallusol.

Mae'n ofynnol i ni sicrhau y gall pleidleisiwr wahaniaethu rhwng nodau adnabod gwahanol bleidiau. Mae'r prawf hwn yn ystyried p'un a fyddai pleidleisiwr, yn ein barn ni, yn drysu nod adnabod un blaid â nod adnabod plaid arall sydd eisoes wedi'i gofrestru.

Bydd ein hasesiad o b'un a yw'r nod adnabod yn peri dryswch fel arfer yn ystyried a yw'r nod adnabod yr un peth yn weledol (er enghraifft y geiriau Saesneg ‘stationary’ neu ‘stationery’, delweddau tebyg o gychod) neu'r un peth mewn cyd-destun (er enghraifft, yn Saesneg, ‘Party of the Oak’ a ‘The Oak Party’). 

Ar gyfer arwyddluniau, byddwn yn ystyried p'un a yw'r elfennau a ddyluniwyd a'r testun yn wahanol i nodau adnabod eraill.

Rydym yn asesu pob cais fesul achos ond rydym yn debygol o wrthod enw, disgrifiad neu arwyddlun am ei fod yn sarhaus os ydyw, yn ein barn ni:

  • yn cynnwys iaith neu derminoleg sarhaus
  • yn cysylltu rhywbeth y derbynnir yn gyffredinol ei fod yn sarhaus â grŵp penodol o bobl

Rydym yn ystyried bod yn rhaid i bleidiau allu mynegi eu barn wleidyddol a bod yn rhaid i bleidleisiwr ddefnyddio papur pleidleisio er mwyn arfer ei hawl i bleidleisio. Rydym hefyd yn ystyried y cyd-destun a'r amgylchiadau lle y gellir defnyddio enw, disgrifiad neu arwyddlun.

Mae hyn yn berthnasol i eiriau unigol, lluosog a geiriau mewn ieithoedd eraill.

1. Ei Mawrhydi, Ei Fawrhydi, Brenin, Brenhines, Tywysog, Tywysoges, Dug, Duges, Brenhinol, Brenhiniaeth.

Ni ellir defnyddio'r geiriau hyn ar eu pen eu hunain. Dim ond mewn perthynas ag enw lle, sefydliad neu ardal llywodraeth leol y gellir defnyddio'r rhain. Er enghraifft, gallwch ddefnyddio ‘Royal Tunbridge Wells’ ond nid ‘Royal Forever Party’ yn Saesneg.

 

2. Prydain, Prydeinig, Lloegr, Seisnig, Cenedlaethol, Yr Alban, Sgotaidd, Albanaidd, Y Deyrnas Unedig, Cymru, Cymreig, Gibraltar, Gibraltaraidd, Rhanbarth cyfunol.

Ni ellir defnyddio'r geiriau hyn ar eu pen eu hunain. Gallwch ddefnyddio'r rhain gyda gair neu ymadrodd arall ac eithrio enw neu ddisgrifiad plaid sydd eisoes wedi'i chofrestru yn y rhan berthnasol o'r DU. Er enghraifft, ni allwch gofrestru ‘English One Big Party’ yn Saesneg os yw ‘One Big Party’ wedi'i gofrestru eisoes.

 

3. Annibynnol, Swyddogol, Answyddogol.​​​​​​​

Ni ellir defnyddio'r geiriau hyn ar eu pen eu hunain. Gallwch ddefnyddio'r rhain os yw'r gair yn cael ei ddefnyddio gyda gair neu ymadrodd arall ond nid:

  • gydag enw neu ddisgrifiad cofrestredig sy'n bodoli eisoes
  • gyda'r gair ‘Plaid’ yn unig (er enghraifft ‘The Independent Party’ yn Saesneg
  • gydag unrhyw air arall yn y grŵp hwn.

 

4. Trethdalwyr, Trigolion, Tenantiaid.​​​​​​​

Ni ellir defnyddio'r geiriau hyn ar eu pen eu hunain. Dim ond mewn perthynas ag enw llywodraeth leol neu ardal ddaearyddol. Er enghraifft, gallwch ddefnyddio ‘Residents of York Party’ ond nid ‘Residents Action Group’ yn Saesneg.

Os nad yw acronym neu dalfyriad yn adnabyddus neu'n cael ei ddefnyddio'n eang mewn iaith bob dydd, ni chaniateir iddo gael ei ddefnyddio fel nod adnabod eich plaid fel arfer. Ymhlith yr enghreifftiau o acronymau adnabyddus a ddefnyddir mewn iaith gyffredin mae 'DU', 'UE' a 'GIG'.

Byddwn yn ystyried rhai acronymau adnabyddus a ddefnyddir yn eang fel y rhai a nodir uchod fel un gair.

Os nad ydym o'r farn bod acronym yn adnabyddus ac yn cael ei ddefnyddio'n eang, rhaid i'r geiriau y bwriedir iddo eu cynrychioli gael eu sillafu fesul llythyren a'u hysgrifennu mewn llythrennau bach. Gellir wedyn ychwanegu'r acronym yn ei ymyl, a bydd pob gair, gan gynnwys yr acronym, yn cyfrif tuag at y cyfyngiad cyffredinol o chwe gair. 

Gall y geiriau a ddefnyddir mewn nod adnabod plaid ddechrau gyda phriflythyren.

Er y byddwn yn ystyried pob achos yn ôl ei deilyngdod, ni fyddwn yn gyffredinol yn derbyn y defnydd o enw unigolyn fel nod adnabod. 

Y rheswm dros hyn yw bod cyfarwyddiadau ar bapurau pleidleisio yn aml yn datgan bod y papur pleidleisio ar gyfer ethol ymgeisydd i etholaeth/ward benodol neu ardal arall. Os bydd enw person, heblaw am enw un o'r ymgeiswyr, yn ymddangos ar bapurau pleidleisio ar gyfer unrhyw ardal benodol, mae perygl y bydd yn gwrth-ddweud y cyfarwyddiadau ar gyfer pleidleisio.

Mae'n ofynnol i ni wrthod unrhyw nodau adnabod sy'n gwrth-ddweud, neu'n llesteirio dealltwriaeth etholwr o gyfarwyddiadau a roddir i'w helpu i bleidleisio ar y papur pleidleisio neu mewn man arall.