Dosbarthu neu gasglu Dogfennau Etholwyr Dienw

Rhaid anfon Dogfen Etholwr Dienw drwy'r post i gyfeiriad yr ymgeisydd.1  

Rhaid i Ddogfen Etholwr Dienw gael ei hanfon mewn amlen neu orchudd nad yw'n datgelu bod yr etholwr wedi'i gofrestru'n ddienw.2 Felly, dylech anfon Dogfennau Etholwyr Dienw at etholwyr sydd wedi cofrestru'n ddienw mewn amlen blaen.  

Mae'n bosibl y bydd ymgeiswyr yn nodi ar eu cais eu bod yn meddwl, am reswm penodol, fod angen iddynt gasglu eu dogfen yn bersonol.3    

Os bydd yr ymgeisydd yn nodi bod angen esboniad Braille, hawdd ei ddeall neu brint bras o'r Ddogfen Etholwr Dienw arno, rhaid i'r Swyddog Cofrestru Etholiadol hefyd drefnu i esboniad Braille, hawdd ei ddeall neu brint bras o'r ddogfen a gyflwynwyd gael ei anfon gyda'r ddogfen neu ei ddarparu pan gaiff y ddogfen ei chasglu.4 Bydd cynlluniau hawdd eu deall a phrint bras ar gael ar-lein a chyflenwir stoc o gopïau caled Braille i bob Swyddog Cofrestru Etholiadol drwy'r cyflenwr sydd wedi'i gaffael yn ganolog a benodwyd gan yr Adran Ffyniant Bro, Tai a Chymunedau. Os bydd angen i chi archebu rhagor o stoc, bydd angen i chi gysylltu â'r cyflenwr yn uniongyrchol. 

Rhaid i chi fod yn fodlon bod angen casglu'r ddogfen yn seiliedig ar y rhesymau a roddwyd gan yr ymgeisydd.  

Os byddwch yn penderfynu caniatáu i'r Ddogfen Etholwr Dienw gael ei chasglu, rhaid i chi ddweud wrth yr ymgeisydd:

• fod y ddogfen yn barod i'w chasglu5  
• ble a phryd y gellir casglu'r ddogfen6
• mai dim ond yn bersonol y gellir casglu'r ddogfen, a hynny gan yr ymgeisydd7
• bod yn rhaid i'r ymgeisydd ddod â'i dystysgrif cofrestru dienw8  gydag ef a'i dangos ar gais pan fydd yn casglu ei ddogfen9  

Gellir casglu'r ddogfen o unrhyw le y bydd y Swyddog Cofrestru Etholiadol a'r ymgeisydd yn cytuno arno. Gallai hyn gynnwys casglu'r ddogfen o'ch swyddfeydd neu orsaf bleidleisio. Os nad chi yw'r Swyddog Canlyniadau hefyd, byddai angen i chi weithio gyda'r Swyddog Canlyniadau perthnasol i benderfynu ar y broses ar gyfer casglu'r ddogfen o orsaf bleidleisio.

Dylech sicrhau bod prosesau ar waith i gynnal trywydd archwilio clir a sicrhau diogelwch Dogfennau Etholwyr Dienw wrth iddynt gael eu cludo neu pan fyddant yn aros i gael eu casglu o unrhyw fan casglu.