Pleidiau gwleidyddol yn derbyn rhoddion o bron i £21 miliwn yn chwarter cyntaf 2023
Pleidiau gwleidyddol yn derbyn rhoddion o bron i £21 miliwn yn chwarter cyntaf 2023
Adroddodd pleidiau gwleidyddol sydd wedi’u cofrestru yn y DU eu bod wedi derbyn £20,887,106 mewn rhoddion a chronfeydd cyhoeddus yn ystod chwarter cyntaf 2023, yn ôl ffigurau a gyhoeddwyd gan y Comisiwn Etholiadol heddiw.
Mae hyn yn cymharu â £12,792,415 a adroddwyd yn yr un cyfnod yn 2022 (mis Ionawr i fis Mawrth).
Dywedodd Louise Edwards, Cyfarwyddwr Rheoleiddio a Thrawsnewid Digidol y Comisiwn Etholiadol:
“Rydym yn cyhoeddi manylion y rhoddion hyn fel bod pleidleiswyr yn deall sut y caiff pleidiau gwleidyddol eu cyllido. Rydym yn gwybod bodd tryloywder cyllid pleidiau ac ymgyrchwyr yn bwysig i bobl ond mae ein hymchwil yn nodi mai dim ond 24 y cant o bobl sy’n credu bod cyllid pleidiau yn dryloyw.
“Mae’n glir nad yw cyhoeddi’r wybodaeth hon yn ddigon. Rydym yn parhau i argymell i Lywodraeth y DU ei bod yn diwygio’r system, er mwyn helpu i amddiffyn pleidiau rhag y rheiny sydd am osgoi’r gyfraith, a rhoi mwy o hyder i bleidleiswyr. "
Mae'n ofynnol i bleidiau gwleidyddol gyflwyno ffurflenni rhoddion a benthyciadau chwarterol i'r Comisiwn Etholiadol. Yn y ffurflenni hyn, mae'r pleidiau yn adrodd:
• rhoddion a dderbyniwyd sy'n uwch na'r trothwy o £7,500 (dros £1,500 ar gyfer unedau cyfrifyddu)
• rhoddion llai gan roddwr unigol sydd, gyda'i gilydd, yn fwy na'r trothwy adrodd
• rhoddion gwaharddedig a dderbyniwyd ganddynt a'r camau a gymerwyd mewn perthynas â'r rhain.
Gall pleidiau hefyd adrodd rhoddion a ddylai fod wedi cael eu hadrodd mewn chwarteri blaenorol.
Y pleidiau gwleidyddol a adroddodd roddion yn Ch1 2023, gan gynnwys cronfeydd cyhoeddus, oedd:
| Plaid | Cyfanswm a adroddwyd | Rhoddion a dderbyniwyd (ac eithrio cronfeydd cyhoeddus) | Cronfeydd cyhoeddus a dderbyniwyd | Cyfanswm a dderbyniwyd yn ystod y chwarter hwn |
|---|---|---|---|---|
| Cynghrair - Plaid Gynghrair Gogledd Iwerddon | £51,281 | £15,000 | £36,281 | £51,281 |
| Y Blaid Geidwadol ac Unoliaethol (Prydain Fawr) | £12,277,478 | £12,143,082 | £134,396 | £12,277,478 |
| Plaid yr Unoliaethwyr Democrataidd - D.U.P | £87,165 | £0 | £87,165 | £87,165 |
| Y Blaid Werdd (Prydain Fawr) | £215,704 | £168,926 | £46,778 | £215,704 |
| Y Blaid Lafur | £5,893,841 | £4,407,459 | £1,435,826 | £5,843,285 |
| Y Democratiaid Rhyddfrydol | £1,669,749 | £1,335,433 | £302,044 | £1,637,477 |
| Plaid Cymru | £30,467 | £0 | £30,467 | £30,467 |
| Plaid Werdd yr Alban | £9,479 | £0 | £9,479 | £9,479 |
| Plaid Genedlaethol yr Alban (SNP) | £291,339 | £4,000 | £287,339 | £291,339 |
| SDLP (Plaid Democratiaid Cymdeithasol a Llafur) | £50,140 | £0 | £50,140 | £50.140 |
| Sinn Féin | £182,697 | £100,000 | £82,697 | £182,697 |
| The Reclaim Party | £75,000 | £75,000 | £0 | £75,000 |
| True & Fair Party | £87,500 | £87,500 | £0 | £87,500 |
| Plaid Unoliaethwyr Ulster | £18,095 | £0 | £18,095 | £18,095 |
| Plaid Cydraddoldeb Menywod | £30,000 | £30,000 | 0 | £30,000 |
| Cyfansw | £20,969,934 | £18,366,400 | £2,520,706 | £20,887,106 |
Gallai’r swm a adroddir gan blaid wleidyddol i’r Comisiwn fod yn wahanol i’r swm a dderbynnir ganddi mewn chwarter. Mae hyn oherwydd y gall y swm a adroddir gan blaid gynnwys rhoddion a ddychwelwyd gan eu bod yn waharddedig a / neu roddion a adroddwyd ar gyfer y chwarter anghywir.
Mae'n debygol y bydd pleidiau wedi derbyn rhoddion eraill, gan wahanol gyrff neu unigolion, sydd yn is na’r trothwyon ar gyfer adrodd i’r Comisiwn. O'u cymryd fel cyfanswm gall y rhain fod yn ffynonellau incwm sylweddol i bleidiau.
Methodd tair plaid â bodloni'r dyddiad cau adrodd ar gyfer y chwarter hwn. Bydd y Comisiwn yn ystyried pob un o’r materion hyn, yn ogystal â rhoddion a adroddwyd yn hwyr, yn unol â'i Bolisi Gorfodi, os yw’n briodol. Bydd unrhyw gosbau a roddir yn cael eu cyhoeddi ar ddyddiad hwyrach.
Benthyca
Cafodd £156,406 o fenthyciadau newydd eu hadrodd yn chwarter cyntaf 2023. Cafodd benthyciadau â gwerth o £505,000 eu talu’n llawn.
Rhoddion a dderbyniwyd gan dderbynwyr a reoleiddir yn Ch1 2023
Mae'r Comisiwn hefyd yn cyhoeddi manylion rhoddion a dderbyniwyd gan dderbynwyr a reoleiddir. Mae derbynwyr a reoleiddir yn aelodau o bleidiau gwleidyddol cofrestredig, deiliaid swyddi dewisol perthnasol, a chymdeithasau aelodau.
Yn chwarter cyntaf 2023, derbyniwyd £1,145,095 mewn rhoddion gan 93 o dderbynwyr a reoleiddir. Mae'r cyfanswm yn cynnwys rhoddion arian parod a rhoddion nad ydynt yn arian parod, ynghyd â rhoddion tuag at ymweliadau tramor. Mae manylion llawn y rhoddion arian parod a’r rhoddion nad ydynt yn arian parod ar gael ar ein gwefan.
| Math o dderbyniwr a reoleiddir | Gwerth yr arian parod a'r rhoddion nad ydynt yn arian parod a dderbyniwyd | Gwerth rhoddion a dderbyniwyd tuag at ymweliadau tramor | Cyfanswm gwerth y rhoddion a dderbyniwyd |
|---|---|---|---|
| Maer | £70,136 | £0 | £70,136 |
| Aelod o Blaid Wleidyddol Gofrestredig | £10,000 | £0 | £10,000 |
| Cymdeithas Aelodau | £357,750 | £0 | £357,750 |
| MLA - Aelod o Awdurdod Deddfwriaethol Gogledd Iwerddon | £0 | £1,989 | £1,989 |
| AS - Aelod Seneddol | £423,898 | £2,792 | £2,792 |
| ASA - Aelod o Senedd yr Alban | £0 | £2,792 | £2,792 |
| Cyfansymiau | £861,784 | £283,311 | £1,145,095 |
Rhagor o wybodaeth
Mae crynodeb o’r rhoddion a adroddwyd gan bleidiau, gan gynnwys y prif roddwyr a manylion adroddiadau hwyr, ar gael ar wefan y Comisiwn.
Mae manylion llawn rhoddion a benthyciadau a adroddwyd yn Ch1 2023 ar gael ar ein cofrestr cyllid gwleidyddol.
Diwedd
Am ragor o wybodaeth, cysylltwch â swyddfa cyfryngau’r Comisiwn Etholiadol drwy ffonio 020 7271 0704, tu allan i oriau swyddfa 07789 920 414 neu drwy e-bostio [email protected]
Nodiadau i olygyddion
- Mae'r Comisiwn Etholiadol wedi argymell ers tro y dylai Llywodraeth a Senedd y DU ystyried gyda ni sut y gellir gwella’r rheolau ar roddion a benthyciadau er mwyn atal arian tramor rhag cael ei ddefnyddio yng ngwleidyddiaeth y DU. Rydym yn parhau i argymell diwygiadau a fyddai’n rhoi i bleidleiswyr mwy o hyder yng nghyllid gwleidyddol y DU, gan gynnwys:
o cyflwyno dyletswydd ar bleidiau am ddiwydrwydd dyladwy ac asesiad risg gwell o ran rhoddion, sydd wedi’i addasu o reoliadau gwyngalchu arian
o cyflwyno cyfreithiau i sicrhau na all pleidiau dderbyn arian gan gwmnïau nad ydynt wedi gwneud digon o arian yn y DU i ariannu eu rhodd neu fenthyciad - Mae Deddf Pleidiau Gwleidyddol, Etholiadau a Refferenda 2000 (PPERA) yn gofyn bod pleidiau gwleidyddol yn adrodd am roddion a benthyciadau arian parod, a’r rheiny nad ydynt yn arian parod, yn chwarterol i'r Comisiwn Etholiadol. Mae rhaid i bleidiau gwleidyddol adrodd am bob rhodd a benthyciad dros £7,500 sy'n ymwneud â'r blaid ganolog, neu bob un dros £1,500 sy'n ymwneud ag uned gyfrifyddu. Mae hyn yn cynnwys cyfansymiau rhoddion a benthyciadau o'r un ffynhonnell yn ystod y flwyddyn galendr. Unwaith y bydd y blaid ganolog wedi adrodd rhodd neu gydgrynhoi rhodd o dros £7,500 mae’n rhaid iddynt adrodd bob rhodd dilynol o fwy na £1,500 o’r ffynhonnell hwnnw.
- Gan mai dim ond rhoddion a benthyciadau dros y trothwyon hyn sy’n cael eu hadrodd gan bleidiau, nid yw'r ffigyrau yn cynnwys yr holl roddion a benthyciadau a dderbyniwyd gan bleidiau gwleidyddol. Cofnodir rhoddion a benthyciadau o dan y trothwyon hyn yng nghyfrifon blynyddol pleidiau gwleidyddol. Mae gwybodaeth am ddatganiadau o gyfrifon mwyaf diweddar pleidiau gwleidyddol ar gael yng nghronfa ddata’r Comisiwn.
- Cronfeydd cyhoeddus yw rhoddion gan Dŷ'r Cyffredin, Tŷ'r Arglwyddi, Senedd yr Alban a'r Comisiwn Etholiadol. Mae grantiau 'Short' a 'Cranborne' ar gael i’r gwrthbleidiau yn Nhŷ'r Cyffredin neu Dŷ'r Arglwyddi fel ei gilydd.
- Mae rhai rhoddion gan y Comisiwn Etholiadol yn ymddangos ar y gofrestr. Y rhain yw: Grantiau Datblygu Polisi, a sefydlwyd gan Ddeddf Pleidiau Gwleidyddol, Etholiadau a Refferenda 2000 ar gyfer pleidiau sydd â dau neu ragor o aelodau cyfredol yn Nhŷ'r Cyffredin. Bwriad y grantiau yw cynorthwyo pleidiau i ddatblygu'r polisïau y byddant yn eu cyflwyno mewn maniffesto etholiadol. Mae'r ddeddfwriaeth yn darparu swm o £2 miliwn yn flynyddol ar gyfer hyn. Daeth Grantiau Datblygu Polisi yn adroddadwy fel rhoddion am y tro cyntaf yn nhrydydd chwarter 2006 o ganlyniad i Ddeddf Gweinyddiaeth Etholiadol 2006.
- Roedd 350 o bleidiau gwleidyddol wedi'u cofrestru ym Mhrydain Fawr a Gogledd Iwerddon yn ystod chwarter cyntaf 2023. Roedd gofyn bod 48 ohonynt yn cyflwyno adroddiad rhoddion chwarterol a bod 32 ohonynt yn cyflwyno gwybodaeth benthyca erbyn y dyddiad cau. Eithriwyd y pleidiau gwleidyddol eraill gan iddynt gyflwyno pedwar cofnod o ddim yn olynol yn flaenorol. Cyn belled â’u bod heb gael rhoddion yn ystod y chwarter diwethaf, maent wedi’u heithrio rhag cyflwyno adroddiad.
- Mae rhagor o wybodaeth am yr hyn yw derbynnydd a reoleiddir a'u gofynion adrodd cyfreithiol ar gael ar ein gwefan. Mae Aelodau Seneddol yn adrodd am y rhoddion a dderbyniwyd ganddynt yng Nghofrestr Buddiannau Ariannol yr Aelodau. Yna mae’r cofrestrydd yn anfon y manylion hyn i’r Comisiwn. Mae’r Comisiwn yn nodi unrhyw roddion sydd yn disgyn o fewn y rheolau ar dderbynwyr a reoleiddir ac rydym yn cyhoeddi’r rhain. Mae gan y Comisiwn rôl o reoleiddio mewn perthynas â rhoddion a ganiateir. Mae aelodau Senedd yr Alban yn adrodd am y rhoddion a dderbyniwyd ganddynt yng Nghofrestr Buddiannau Senedd yr Alban.
- Mae pob derbynnydd arall a reoleiddir yn adrodd am ei roddion yn uniongyrchol i ni. Yna byddwn yn cyhoeddi'r wybodaeth hon yn fisol fel rhan o'n rôl wrth ddarparu mwy o dryloywder ym maes cyllid gwleidyddol yn y DU.
- Mae’r ymchwil wnaeth canfod fod 24 y cant o bobl o’r farn bod cyllido pleidiau yn dryloyw ar gael ar wefan y Comisiwn Etholiadol: Ymchwil agweddau’r cyhoedd ar draws y DU 2023.