Dadansoddi perfformiad 2019/20: Amcan dau

I sicrhau tryloywder, fe wnaethom:

• gyhoeddi cyfrifon blynyddol gan bleidiau cofrestredig, gwybodaeth ynghylch rhoddion a benthyciadau, a manylion gwariant ymgyrchu, y mae’n ofynnol i bleidiau eu darparu i ni
• gofrestru pleidiau gwleidyddol ac ymgyrchwyr eraill a chyhoeddi manylion mewn cofrestrau ar-lein
• barhau i adolygu disgrifiadau pleidiau, i sicrhau bod pleidleiswyr yn gallu adnabod y blaid y mae ymgeiswyr yn sefyll drosti
• barhau i ddatblygu porth ar-lein ar gyfer cofrestru pleidiau a chyllid pleidiau, yr ydym yn bwriadu ei lansio yn 2021 ac a fydd yn gwella sut mae pleidiau ac ymgyrchwyr yn cofrestru a dychwelyd ffurflenni ariannol
• graffu ar gynigion tryloywder hysbysebu gan gwmnïau cyfryngau cymdeithasol gan gynnwys Facebook, Google, Twitter a Snapchat, i sicrhau eu bod yn darparu gwell tryloywder o ran gweithgarwch ymgyrchu digidol

I gefnogi rheoleiddio da fe wnaethom:

• ddarparu cyngor a chanllawiau i helpu pleidiau, ymgeiswyr ac ymgyrchwyr i gydymffurfio â’r rheolau
• weithredu a gosod cosbau pan dorrwyd y rheolau parthed cyllid gwleidyddol
• amddiffyn heriau cyfreithiol i’n penderfyniadau gorfodi
• ddatblygu codau ymarfer newydd ar gyfer pleidiau ac ymgeiswyr
• barhau i eirioli dros newidiadau i’r gyfraith i gryfhau ein pwerau ymchwilio a chosbi - gan gynnwys cynyddu’r ddirwy fwyaf y gallwn ei gosod am dorri rheolau PPERA o’r lefel gyfredol, sef £20,000
• weithio â Chynulliad Cenedlaethol Cymru i adolygu eu Rheolau Sefydlog a sicrhau bod ganddynt gynllun cadarn i ddatblygu rheolau a chanllawiau newydd ar gyfer yr etholiadau yn 2012 a dod ag adrodd deuol i ben
   

Sicrhau tryloywder

Trwy gydol y flwyddyn, rydym wedi canolbwyntio ar gyflawni’r cyfrifoldebau rydym yn atebol iddynt i seneddau’r DU. Cadwasom gofrestrau’r pleidiau gwleidyddol, gan sicrhau mai dim ond pleidiau sy’n bodloni’r gofynion cyfreithiol sydd ar y gofrestr, ac fe wnaethom barhau i adolygu disgrifiadau’r pleidiau i helpu pleidleiswyr i adnabod y blaid y mae ymgeiswyr yn sefyll drosti.

Cafwyd dau achos o ymgeiswyr yn ceisio cael eu ffurflenni ariannol wedi eu tynnu o’n cronfa ar-lein trwy’r llysoedd. Tynnodd un ymgeisydd ei gais yn y llys yn ôl, ac fe wnaeth y llys wrthod y cais arall.

Rheoleiddio da

Wrth i Etholiad cyffredinol Senedd y DU agosáu, gwnaethom gofrestru’r nifer uchaf erioed o ymgyrchwyr di-blaid. Fe wnaethom hefyd ddatblygu ein dull monitro ymgyrchoedd fel ei fod yn fwy rhagweithiol ac yn canfod ac ymyrryd yn gyflym pan fo problem. Fe wnaeth hyn eu rhwystro rhag gwaethygu a rhwystro ymgyrchwyr rhag torri’r rheolau. Byddwn yn parhau i ganolbwyntio ar hyn.

Fe wnaethom barhau i ddefnyddio ein pwerau ymchwilio a chosbi i ganfod ac ymateb i achosion o ddiffyg cydymffurfio a rhwystro diffyg cydymffurfio yn y dyfodol. Rhoesom ddirwyon o £25k a £40k fel ei gilydd i ddwy blaid gofrestredig am fethiannau lluosog. Clywodd y llysoedd dair apêl yn erbyn cosbau yn 2019. Tynnwyd un yn ôl, gwrthodwyd un, a chadarnhawyd un. Dyna ddod â chyfanswm yr apeliadau yn erbyn cosbau rydym wedi eu rhoi i 5; mae’r llysoedd wedi cadarnhau un ohonynt. Mae’r apeliadau wedi darparu cyfraith achosion ddefnyddiol ac rydym wedi dysgu gan bob achos er mwyn gwella ein dull gorfodi.

Am nifer o flynyddoedd rydym wedi argymell bod llywodraethau’r DU yn newid cyfreithiau i gryfhau ein pwerau ymchwilio a chosbi. Eleni, gwelsom newid o’r fath yn yr Alban, lle gwnaeth Senedd yr Alban, trwy Ddeddf Refferenda (yr Alban), gynyddu lefelau’r dirwyon sydd ar gael i ni (o £20,000 i £500,00); yn ogystal rhoesant bwerau ehangach i ni gaffael gwybodaeth y tu hwnt i ymchwiliadau ffurfiol; a sefydlwyd rheolau sy’n gofyn am wasgnodau ar ddeunyddiau ymgyrchu digidol.\