Dadansoddi perfformiad 2019/20: Amcan pedwar

I gefnogi’n sefydliad, fe wnaethom:

• gynnal rhaglen profi, uwchraddio a meincnodi yn erbyn safonau perthnasol er mwyn gwarchod ein hisadeiledd digidol yn erbyn bygythiadau seibr
• ddatblygu ein harferion gwaith i adlewyrchu’r disgwyliadau ar gyflogwr modern, a sicrhau bod ein systemau digidol yn cefnogi’r newidiadau hyn
• uwchraddio’r systemau technoleg gwybodaeth sy’n cefnogi ein swyddogaethau rheoleiddio a gweinyddu etholiadol
• barhau i weithio’n agos â’r Ganolfan Seibrddiogelwch Genedlaethol i wella’r modd rydym yn monitro ein rhwydweithiau a’n platfformau
• lansio gwefan newydd sy’n bodloni anghenion defnyddwyr yn fwy effeithiol ac yn darparu gwybodaeth mewn ffyrdd mwy hygyrch a haws i’w defnyddio
• roi ar waith systemau caffael, rheoli prosiectau a llywodraethu ar-lein newydd i wneud ein prosesau yn fwy effeithlon a thryloyw
• ddatblygu strategaeth pobl newydd i gefnogi defnyddio ein hadnoddau yn y modd mwyaf effeithlon
• wella ein sylfaen sgiliau trwy raglen dysgu a datblygu gynhwysfawr a buddsoddi mewn adnoddau technegol arbenigol
• weithio gyda seneddau yr Alban a Chymru i ddatblygu model gweithredu sy’n ein galluogi i adrodd iddynt
• ddarparu canllawiau ac offerynnau i staff i’n helpu i wella ein prosesau sicrhau ansawdd
   

Cefnogi’r sefydliad

Yn ystod y flwyddyn ddiwethaf, rydym wedi parhau i drawsffurfio’r modd rydym yn gweithio trwy fuddsoddi’n sylweddol yn ein hisadeiledd digidol er mwyn gwella ei ddycnwch a chefnogi arferion gwaith hyblyg. Rydym hefyd wedi parhau i weithio â’r Ganolfan Seibrddiogelwch Genedlaethol i wella’r modd rydym yn monitro ein rhwydweithiau a’n platfformau; gwnaeth hyn helpu gyda’n ffocws ar seibrddiogelwch yn ystod pleidleisiau 2019.

Mae ein gwefan newydd yn darparu gwell gwasanaeth i’n rhanddeiliaid. Fel ein prif sianel gyfathrebu, roedd yn bwysig i ni wella ei defnyddioldeb a’i hygyrchedd, er mwyn cyfathrebu a gweithio mewn ffyrdd gwell.

Rydym wedi cyflwyno offerynnau digidol newydd eraill i’n helpu i gynnal ein sefydliad. Mae hyn yn cynnwys system caffael ar-lein, i’w gwneud yn haws i gyflenwyr gymryd rhan yn ein tendrau, a system gynllunio sy’n ein galluogi i adrodd am ein cynnydd yn erbyn yn ein hamcanion corfforaethol a monitro risgiau yn fwy effeithiol. Mae ein system llywodraethu newydd yn darparu ffordd fwy effeithiol i gyfathrebu â Bwrdd y Comisiwn i roi trosolwg glir o’n perfformiad.

Mae ein strategaeth pobl newydd yn cynnwys gweithrediadau i hwyluso diwylliant lle gall cyflogeion berfformio eu rolau yn fwy effeithiol. Fe wnaethom ddechrau’r gwaith hwn trwy adolygu ein prosesau rheoli perfformiad a datblygu. Rydym wedi symud i ffwrdd o werthuso a rhestru perfformiad cyflogeion ar adegau penodedig yn ystod y flwyddyn, gan newid i drefn barhaus, a reolir trwy amcanion. Mae hyn yn mynd i’r afael ag adborth a gawsom o’n harolwg staff yn 2018, gan blethu’n well â’n diwylliant.

Gwnaethom ganolbwyntio ar fentrau i fynd i’r afael â throsiant staff. Fe wnaeth hyn gynnwys newid ein harferion recriwtio i gymryd yn ganiataol y byddai pob swydd yn barhaol, oni bai bod achos cryf dros gyfiawnhau contract tymor penodol. Fe wnaethom hefyd gynorthwyo staff i adleoli i’n swyddfeydd eraill, lle’r oedd hynny yn gyson â’u hamgylchiadau a’n hanghenion busnes.

Fe wnaethom barhau i gefnogi grwpiau staff y gwnaethom eu sefydlu i fynd i’r afael â meysydd penodol, megis y grŵp ymgysylltu â staff, i sicrhau bod ein cyflogeion yn gallu mewnbynnu i’n polisïau a rhaglenni corfforaethol. Mae hefyd gennym grwpiau sydd wedi ymrwymo i gefnogi staff gyda bwlio, aflonyddu, a materion iechyd meddwl, ac rydym wedi cynnal cysylltiadau cryf â’n hundeb llafur, yr Undeb Gwasanaethau Cyhoeddus a Masnachol.

Fe wnaethom fuddsoddi mwy mewn dysgu a datblygu, a sicrhau bod staff yn ymwybodol o gyfleoedd hyfforddi. Fe wnaethom hefyd benodi darparwr i gyflawni rhaglen datblygu arweinyddiaeth a rheoli ar gyfer pob rheolwr a fydd yn cael ei chynnal trwy gydol 2020

Mae seneddau’r Alban a Chymru wedi bod yn ystyried deddfwriaeth a fydd yn sicrhau ein bod yn atebol iddynt hwy am ein gwaith mewn etholiadau datganoledig. Rydym wastad wedi adrodd yn wirfoddol i’r ddau senedd am ein gwaith polisi mewn perthynas â materion datganoledig, ond bydd y ddeddfwriaeth newydd y golygu bod ein trefniadau atebolrwydd yn cyfateb i’r rheiny sydd gennym parthed Senedd y DU.