Guidance for Returning Officers administering a Greater London Authority (GLA) election

Gall pleidleiswyr post ddychwelyd eu pleidlais bost yn bersonol i unrhyw orsaf bleidleisio yn eu hardal etholiadol.1  

Ar gyfer etholiadau a gynhelir ar neu ar ôl 1 Mai 2024, ar gyfer pob etholiad a gynhelir, bydd cyfyngiadau ar nifer y pleidleisiau post y gall unigolyn eu cyflwyno, a chyfyngiadau ar bwy y gall yr unigolyn sy’n cyflwyno’r pleidleisiau post fod. I gael rhagor o wybodaeth, gweler ein canllawiau ar y broses o gyflwyno pleidleisiau post a chyfeiriwch at y llawlyfr i orsafoedd pleidleisio.

Llawlyfr gorsafoedd pleidleisio – etholiad Cynulliad Llundain Fwyaf (PDF) - rydym yn diweddaru’r adnodd hwn i adlewyrchu mesurau newydd a gyflwynwyd gan Ddeddf Etholiadau 2022.

Dylech friffio staff gorsafoedd pleidleisio er mwyn nodi pa bleidleisiau post a all gael eu dychwelyd i'w gorsaf bleidleisio. I gael rhagor o wybodaeth am hyfforddi staff, gweler ein canllawiau ar Hyfforddi Swyddogion Llywyddu, Clercod Pleidleisio ac arolygwyr gorsafoedd pledleisio. 

Dylech ddarparu pecynnau i orsafoedd pleidleisio ar gyfer:

• derbyn pleidleisiau post
• ffurflenni dychwelyd dogfennau pleidleisio drwy’r post a dderbyniwyd ar gyfer pleidleisiau post (ar gyfer etholiadau ar neu ar ôl 1 Mai 2024)
• pleidleisiau post a dderbyniwyd ac a wrthodwyd (ar gyfer etholiadau ar neu ar ôl 1 Mai 2024)

Dylai nifer ac arddull y pecynnau fod yn seiliedig ar ffurflenni'r pleidleisiau cyfatebol diwethaf, ond dylech gadw mewn cof y potensial ar gyfer ymgysylltu a diddordeb hwyr yn yr etholiad, ac unrhyw faterion lleol neu genedlaethol a allai effeithio ar y nifer sy'n pleidleisio.
 

Dylid cadw cofnodion o'r holl becynnau o'r fath fel y gellir rhoi cyfrif am bob un. Dylai'r pecynnau gael eu labelu'n glir a nodi:

• eu bod yn cynnwys pleidleisiau post
• eu bod yn cynnwys naill ai pleidleisiau post a dderbyniwyd neu a wrthodwyd neu ffurflenni dychwelyd dogfennau pleidleisio drwy’r post (ar gyfer pleidleisiau ar neu ar ôl 1 Mai 2024)
• enw'r orsaf bleidleisio dynodwr yr orsaf bleidleisio

Diogelwch pleidleisiau post a ddychwelwyd  

Dylech sicrhau bod modd selio'r pecynnau'n ddiogel. 

Mae gan asiantiaid pleidleisio yr hawl i atodi eu sêl i becynnau wedi'u selio cyn iddynt gael eu symud o'r orsaf bleidleisio ac, felly, rhaid caniatáu iddynt wneud hynny.2  

Fel rhan o'ch hyfforddiant, dylech bwysleisio i Swyddogion Llywyddu pa mor bwysig yw sicrhau diogelwch pleidleisiau post a gaiff eu dychwelyd i orsafoedd pleidleisio. Dylid rhoi'r pleidleisiau post yn y pecynnau a ddarperir yn syth a dylech sicrhau bod y pecynnau'n cael eu storio'n ddiogel drwy gydol y dydd.

Dylech drefnu i bleidleisiau post gael eu casglu o orsafoedd pleidleisio drwy gydol y dydd gan y bydd hyn yn helpu i leihau'r nifer y bydd angen ymdrin â hwy ar ôl diwedd y cyfnod pleidleisio. Gall arolygwyr gorsafoedd pleidleisio gyflawni'r ddyletswydd hon. Dylech sicrhau bod prosesau ar waith i gynnal trywydd archwilio clir a sicrhau diogelwch pecynnau o bleidleisiau post a gasglwyd wrth iddynt gael eu cludo.