Sicrhau system y gellir ymddiried fwyfwy ynddi a system gynyddol dryloyw o reoleiddio ym maes cyllid gwleidyddol, goruchwylio cydymffurfiaeth, hyrwyddo dealltwriaeth ymhlith y rhai sy'n cael eu rheoleiddio a mynd ar drywydd achosion o dorri rheolau.

Mae'r nod hwn yn cwmpasu ein rôl reoleiddio. Rydym yn canolbwyntio ar ddau faes sydd wrth wraidd democratiaeth iach: sicrhau tryloywder cyllid gwleidyddol, a rheoleiddio effeithiol. Mae'r meysydd hyn yn hanfodol i sicrhau bod gan bleidleiswyr hyder yn ein hetholiadau. Rydym felly, yn ôl yr arfer, wedi canolbwyntio ar ein rhanddeiliaid ym mhob agwedd ar ein gwaith rheoleiddio.

Cyflawniadau allweddol

Er mwyn sicrhau tryloywder, gwnaethom y canlynol: 

  • cyhoeddi adroddiadau ariannol gan bleidiau ac ymgyrchwyr 
  • gweithio gyda phleidiau i gyflwyno adroddiadau ariannol ac addasu ein patrwm o gyhoeddiadau arferol o ganlyniad i'r heriau a wynebwyd gan bleidiau wrth gyflwyno adroddiadau yn sgil y pandemig
  • cofrestru pleidiau gwleidyddol ac ymgyrchwyr eraill a chyhoeddi manylion mewn cofrestrau ar-lein
  • parhau i weithio ar ein system Cyllid Gwleidyddol Ar-lein newydd, gan gynnwys symud yn llwyddiannus i'w datblygu'n fewnol

Er mwyn cefnogi rheoleiddio da, gwnaethom y canlynol:

  • cwblhau ein harolwg mwyaf erioed o ymgyrchwyr er mwyn deall eu hanghenion o ran ein hadnoddau i gefnogi cydymffurfiaeth â'r gyfraith
  • parhau i ddatblygu ein dull rheoleiddio er mwyn rhoi mwy o gymorth i bleidiau ac ymgyrchwyr
  • diwygio llawer o'r dogfennau canllaw ar y cyfreithiau cyllid gwleidyddol ar ein gwefan er mwyn eu symud i fformat gwe newydd, gan wneud cynnydd tuag at ein nod o symud pob canllaw i'r fformat hwn dros y blynyddoedd nesaf
  • dod o hyd i ffyrdd newydd hyblyg o barhau i ganolbwyntio ar gefnogi pleidiau ac ymgyrchwyr yn ystod y pandemig
  • adeiladu ar ein gwaith ar wybodaeth reoleiddio i ysgogi rhyngweithiadau rhagweithiol ag ymgyrchwyr unigol 
  • gweithredu a rhoi sancsiynau pan gafwyd achosion o dorri cyfraith cyllid gwleidyddol
  • diweddaru a gwella ein prosesau gorfodi, gan ddefnyddio arferion gorau a dysgu gan achosion blaenorol. Bydd hyn yn atgyfnerthu ymchwiliadau effeithiol, amserol a diduedd.

Mesurau perfformiad

Mesurau Perfformiad
Cyhoeddwyd 100% o ddatganiadau o gyfrifon o fewn 60 diwrnod gwaith i'r dyddiad cau statudol 100% 
Cyflawnwyd
Cyhoeddwyd 100% o adroddiadau rhoddion a benthyciadau a dderbyniwyd erbyn y dyddiad cau statudol o fewn 30 diwrnod gwaith 100%
Cyflawnwyd
Cynhaliwyd gwiriadau caniatâd ar 25% o ffurflenni rhoddion a benthyciadau chwarterol ac a reoleiddir pleidiau 38.34% 
Cyflawnwyd
Nifer y cynhyrchion/adnoddau canllawiau rheoleiddio a gyflwynir gennym i helpu'r gymuned a reoleiddir i gydymffurfio â'r rheolau  118
Cyflwynwyd 90% o ymatebion i geisiadau am gyngor rheoleiddio ar adroddiadau ariannol o fewn targedau yn seiliedig ar eu cymhlethdod 
(Cyngor cyffredin: 5 diwrnod gwaith, cyngor cymhlethdod canolig: 10 diwrnod gwaith, safbwyntiau cynghori ffurfiol a chyngor arall ar faterion newydd a chymhleth: 20 diwrnod gwaith)		 92.79% 
Cyflawnwyd
Caiff 90% o ymgeiswyr eu hysbysu am ganlyniad eu cais i gofrestru o fewn y targedau yn seiliedig ar eu cymhlethdod
(ceisiadau syml: 35 diwrnod gwaith, ceisiadau cymhleth: 45 diwrnod gwaith, ymgyrchwyr nad ydynt yn bleidiau: 5 diwrnod gwaith)		 93.91%     
Cyflawnwyd
Caiff 90% o ymchwiliadau eu cynnal o fewn targedau yn seiliedig ar eu cymhlethdod
(achosion syml: 90 diwrnod calendr, achosion cymhleth: 180 diwrnod calendr, achosion cymhleth iawn: targedau unigol a osodwyd fesul achos)		 69.05%1  
Nis Cyflawnwyd
Cyflwynwyd 90% o hysbysiadau terfynol o fewn 21 diwrnod calendr i'r dyddiad cau ar gyfer cyflwyno sylwadau, neu 21 diwrnod i'r dyddiad y derbyniwyd sylwadau os daethant i law ar ôl y dyddiad cau, pa un bynnag sydd hwyraf 88.89%2  
Nis Cyflawnwyd

Ein gweithgareddau yn ystod y flwyddyn

Sicrhau tryloywder

  • Gwnaethom gynnal cofrestrau partïon gwleidyddol, gan asesu ceisiadau gan newydd-ddyfodiaid er mwyn sicrhau mai dim ond pleidiau sy'n cyflawni'r profion cyfreithiol sydd ar y gofrestr. Gwnaethom hefyd brosesu newidiadau i fanylion rhai presennol cyn gynted â phosibl. Gwnaeth y ddau weithgaredd alluogi'r pleidiau hynny i gyflwyno ymgeiswyr i sefyll etholiad, a sicrhau bod cofrestrau ar-lein pleidiau yn gyfredol. 
  • Gwnaethom barhau i gyhoeddi data cyllid gwleidyddol cyn gynted â phosibl ar ôl iddynt gael eu cyflwyno i ni gan bleidiau ac ymgyrchwyr. Mae cyhoeddi'r wybodaeth hon yn golygu bod gan bleidleiswyr y wybodaeth sydd ei hangen arnynt i ddeall sut y caiff y rhai sy'n gofyn am eu pleidlais eu hariannu a sut maent yn gwario eu harian. Ym mis Awst, gwnaethom gyhoeddi 721 o ddatganiadau o gyfrifon gan bleidiau ac unedau cyfrifyddu, sef cyhoeddiad unigol mwyaf y flwyddyn. 
  • Er i'r pandemig barhau i effeithio ar bleidiau ac ymgyrchwyr, gwnaethom lwyddo i gyhoeddi data rhoddion a benthyciadau, a datganiadau o gyfrifon yn ôl yr arfer i raddau helaeth. Gwnaethom hefyd gyhoeddi data ar wariant ymgeiswyr yn etholiadau Senedd Cymru a Senedd yr Alban yn 2021.

Cefnogi prosesau rheoleiddio da

  •  Gwnaethom ymgysylltu â phleidiau ac ymgyrchwyr i ystyried ffyrdd newydd ac arloesol o gefnogi cydymffurfiaeth â'r gyfundrefn cyllid gwleidyddol. Anfonwyd dros 1,000 o negeseuon at bleidiau, ymgyrchwyr, rhoddwyr a reoleiddir, cymdeithasau aelodau a chymdeithasau anghorfforedig yn gofyn iddynt gwblhau arolwg i'n helpu i ddeall eu hanghenion. Cawsom 347 o ymatebion, gan roi dealltwriaeth fanwl i ni sy'n newid y ffordd rydym yn cefnogi cydymffurfiaeth. 
  • Gwnaethom barhau i ddatblygu'r fersiwn well ac wedi'i diweddaru o Cyllid Gwleidyddol Ar-lein, a fydd yn ei gwneud hi'n haws i bleidiau ac ymgyrchwyr rannu'r wybodaeth ofynnol â ni. 
  •  Diwygiwyd llawer o'r tudalennau canllaw ar ein gwefan, ac mae mwy i ddilyn, o ddogfennau i destun ar y we, gan weithio tuag at ganllawiau sy'n fwy rhyngweithiol a chysylltiedig. O ganlyniad, gwnaethom wella'r cyfleuster chwilio fel y gellir dod o hyd i'n canllawiau yn haws. Gwnaethom hefyd gyhoeddi cyfres benodol o ganllawiau ar gyfer etholiadau mis Mai 2022 yn gynt na'r disgwyl. 
  • •Roedd ein gwaith i helpu pleidiau ac ymgyrchwyr i gydymffurfio â chyfraith etholiadol, nifer is o etholiadau a reoleiddir, a'n dull cefnogol parhaus o ymdrin ag achosion o ddiffyg cydymffurfio mewn perthynas â COVID oll yn ffactorau a gyfrannodd at ostyngiad mewn gwaith achos gorfodi yn ystod y flwyddyn. Ond oherwydd bod angen i bleidleiswyr ac ymgyrchwyr wybod y byddwn yn gweithredu os na chaiff y rheolau eu dilyn, rydym wedi defnyddio ein pwerau gorfodi a sancsiynu i nodi achosion o ddiffyg cydymffurfio ac ymateb iddynt, ac atal achosion o ddiffyg cydymffurfio yn y dyfodol lle y bo'n briodol. Rhoddwyd cosbau ariannol gwerth £42,370 yn ystod 2021/22 a chafodd gwerth £15,700 o gyllid nas caniatawyd ei fforffedu’n wirfoddol, gan ddileu'r rhain o'r system cyllid gwleidyddol.
  • Mabwysiadwyd dull rhagweithiol wrth gasglu gwybodaeth ac ymyrryd yn ystod yr ymgyrch yn etholiadau Senedd Cymru a Senedd yr Alban er mwyn atal neu leihau achosion o ddiffyg cydymffurfio. Gwnaethom hefyd fonitro cydymffurfiaeth yn agos, yn ogystal â'r ffyrdd y cydymffurfiodd pleidiau ac ymgyrchwyr â'r gyfundrefn argraffnodau digidol newydd a oedd mewn grym ar gyfer etholiad Senedd yr Alban. Bydd hyn yn helpu i lywio canllawiau a dulliau rheoleiddio yn y dyfodol.