Darparu gwerth am arian, gan wneud y defnydd gorau o'n hadnoddau a'n harbenigedd er mwyn darparu gwasanaethau sy'n berthnasol i'r hyn sydd bwysicaf i bleidleiswyr.

Mae'r nod hwn yn darparu ffocws ar gyfer gweithgareddau sy'n cefnogi'r sefydliad ac yn sicrhau bod y bobl fedrus, yr adnoddau, y dechnoleg, y systemau a'r trefniadau llywodraethu priodol gennym. Y nod yw darparu gwasanaethau sy'n effeithlon, yn effeithiol ac yn ddarbodus. 

Cyflawniadau allweddol

Er mwyn cefnogi ein sefydliad, gwnaethom y canlynol:

  • rhoi ein trefniadau atebolrwydd newydd gyda Senedd Cymru a Senedd yr Alban ar waith, a ddaeth i rym ar 1 Ebrill 2021.
  • adolygu ac ailwampio'r ffordd rydym yn darparu gwasanaethau cyfreithiol 
  • cynnal arolwg o'r holl staff a defnyddio'r canlyniadau i nodi meysydd lle dylai'r Uwch-grŵp Arwain flaenoriaethu datblygiad yn unol â'n cynllun corfforaethol. Mae mentrau allweddol yn cynnwys datblygu siarter ymddygiadol ac ailddatblygu ein dull dysgu a datblygu.  
  • cwblhau ymgynoriadau mewnol ac allanol ar ein strategaeth Cydraddoldeb, Amrywiaeth a Chynhwysiant newydd, y mae fersiwn derfynol yn cael ei chynhyrchu ar hyn o bryd
  • datblygu cynllun gweithredu cydraddoldeb hiliol drwy'r Tasglu Hil yn y Gwaith
  • adnewyddu ein hamgylchedd gwaith er mwyn cefnogi ffyrdd mwy hyblyg o weithio 
  • parhau i ddatblygu ein dull sicrhau ansawdd i'n helpu i wella ein prosesau yn barhaus

Mesurau perfformiad

Mesur Perfformiad
Cyflawni ein prosiect Ffyrdd o Weithio er mwyn sicrhau newidiadau busnes a weithredir yn ddigidol i adlewyrchu'r disgwyliadau sydd ar gyflogwyr modern, a sicrhau y gall y cyfleusterau TGCh craidd gefnogi'r newidiadau hyn. Cwblhawyd
Boddhad rhanddeiliaid a staff gydag adnoddau TG Nis Cwblhawyd / Yn mynd rhagddo1  
Gweithio gyda Senedd Cymru a Senedd yr Alban i roi ein trefniadau atebolrwydd newydd ar waith, gan gynnwys fformiwla cyllido newydd a chynlluniau busnes ar gyfer Cymru a'r Alban Cwblhawyd
Rhoi ein Strategaeth Pobl newydd ar waith Yn mynd rhagddo
Cynnal sgoriau ymgysylltu â staff uchel yn yr arolwg staff blynyddol a sicrhau bod dangosyddion megis trosiant staff ar lefelau priodol

Sgôr ymgysylltu â staff: 67%
(Cyfartaledd y Gwasanaeth Sifil: 64%)
Trosiant staff: 14.2%
Nodi opsiynau, costau a buddiannau e-gaffael a gweithredu system newydd yn unol â hynny Cwblhawyd
Monitro amrywiannau sylweddol ym mhob cyllideb a, lle y bo'n briodol, lleihau'r amrywiannau hyn yn ystod pum mlynedd ein Cynllun Corfforaethol Cwblhawyd
Cynnal prosiect i archwilio pa mor dda rydym yn rheoli ymholiadau cwsmeriaid ar draws pob rhan o waith y Comisiwn Cwblhawyd

Cefnogi'r sefydliad

Fel gyda phob sefydliad, mae pandemig Covid-19 wedi trawsnewid y ffordd rydym yn gweithio ac wedi cyflwyno heriau mawr. Ein nod drwy'r cyfnod hwn fu cynnal llesiant staff, fel y gallem barhau i gyflawni gwasanaeth di-dor i bleidleiswyr a'n rhanddeiliaid etholiadol.  Cafodd prosesau dychwelyd i'r swyddfa, fel roedd amodau yn ei ganiatáu, eu rheoli'n ofalus, gan gydbwyso diogelwch staff a manteision cydweithredu wyneb yn wyneb. Dangosodd ymatebion i'r arolwg staff a gynhaliwyd yn hydref 2021 fod 94% o'r ymatebwyr yn teimlo bod y Comisiwn wedi ymateb yn effeithiol i bandemig Covid-19. Serch hynny, rydym wedi dysgu a dogfennu gwersi o'n hymateb i'r pandemig, ac rydym yn adolygu ein cynlluniau rheoli argyfwng yn unol â hynny.

Mae gweithio o bell wedi tynnu sylw at yr angen am fuddsoddiad sylweddol yn ein seilwaith technoleg gwybodaeth er mwyn ei ddiweddaru, cefnogi ffyrdd hybrid o weithio a darparu amgylchedd gwaith effeithlon sy'n addas i ddefnyddwyr. 

Dyma'r flwyddyn gyntaf lle roeddem yn cael ein hariannu gan Senedd Cymru a Senedd yr Alban, ac yn uniongyrchol atebol iddynt, ochr yn ochr â'n cydberthynas hirsefydledig â Senedd y DU. Rydym wedi gweithio'n agos gyda swyddogion yn y tair senedd er mwyn sicrhau bod y trefniadau unigryw hyn yn llwyddiant, ac rydym wedi cytuno ar ddulliau manwl er mwyn sicrhau effeithlonrwydd a thryloywder. 

Rydym wedi gwneud cynnydd pellach mewn perthynas â chydraddoldeb, amrywiaeth a chynhwysiant, er y bydd hyn yn parhau i fod yn flaenoriaeth allweddol wrth i ni ddatblygu'r strategaeth pobl fel sail i'n cynllun corfforaethol newydd. Mae ein Tasglu Hil yn y Gwaith yn parhau i sicrhau bod lleisiau ein staff Du, Asiaidd ac ethnig leiafrifol yn cael eu clywed ac yn rym dros newid. Rydym wedi ymgynghori ar strategaeth Cydraddoldeb, Amrywiaeth a Chynhwysiant newydd a gwella ein proses ar gyfer cwblhau Asesiadau o'r Effaith ar Gydraddoldeb. Ac mae gennym grwpiau dynodedig hefyd i gefnogi staff sy'n wynebu bwlio ac aflonyddu, i gefnogi'r rhai sydd â phroblemau iechyd meddwl ac i hyrwyddo urddas a pharch yn y gwaith.

Effaith Covid-19

Lle bo cyfyngiadau gan y llywodraeth yn ofynnol, rydym wedi parhau i weithio gartref yn bennaf am lawer o'r flwyddyn. Wrth i'r cyfyngiadau gael eu llacio, gwnaethom ddechrau dychwelyd i'r swyddfa yn raddol sy'n adeiladu ar ein defnydd hirsefydledig o ddulliau gweithio gartref er mwyn datblygu dull hybrid. Gwnaethom groesawu gweithio hybrid mewn ffordd sy'n ein galluogi i gydbwyso anghenion y busnes a llesiant staff. Nid aethpwyd i unrhyw gostau ariannol ychwanegol sylweddol er mwyn cwblhau'r gwaith hwn.

Ymrwymiad i Gydraddoldeb, Amrywiaeth a Chynhwysiant

Mae'r Comisiwn yn gwasanaethu democratiaeth amrywiol ac mae'n ymrwymedig i gydraddoldeb, amrywiaeth a chynhwysiant. Rydym wedi cymryd sawl cam yn ystod y flwyddyn i'n helpu i gyflawni'r ymrwymiad hwn:

  • Rydym wedi cynhyrchu strategaeth Cydraddoldeb, Amrywiaeth a Chynhwysiant newydd, y gwnaethom ymgynghori arni yn ystod gaeaf 2021-22. Rydym yn ddiolchgar i'r rheini a gyflwynodd sylwadau a byddwn yn cyhoeddi fersiwn derfynol o'r strategaeth yn ystod 2022-23;
  • Gwnaethom adnewyddu ein dull o gwblhau Asesiadau o'r Effaith ar Gydraddoldeb fel rhan o'n gwaith parhaus i gydymffurfio â Dyletswydd Cydraddoldeb y Sector Cyhoeddus;
  • Gwnaethom ymgysylltu ag ymgynghorwyr allanol er mwyn ein helpu i godi ein hymwybyddiaeth a gwella ein gwybodaeth am faterion Cydraddoldeb, Amrywiaeth a Chynhwysiant, ac nawr mae gennym uwch-arweinydd parhaol;
  • Rydym wedi parhau gyda gwaith ein Tasglu Siarter Hil yn y Gwaith