Mesur ein perfformiad

Dangosyddion system allweddol

Mae ein dangosyddion system allweddol yn darparu asesiad o iechyd y system etholiadol ehangach. Maent yn ddangosyddion eang, nad ydynt o fewn ein rheolaeth yn llwyr, a lle yr ydym yn gweithio gyda llawer o bartneriaid. Fodd bynnag, mae’r gweithgareddau a nodir yn y Cynllun Corfforaethol hwn wedi’u dylunio i helpu i fynd i’r afael â’r heriau a amlygwyd, boed hynny’n hyder y cyhoedd mewn etholiadau yn y DU a’u hymgysylltiad â hwy, neu fygwth ymgeiswyr etholiadol. Ein nod yw gweithio gyda’r ystod eang o randdeiliaid a fydd yn dylanwadu ar y dangosyddion hyn ac felly rydym yn disgwyl gweld tuedd gadarnhaol dros amser. Mae’r rhanddeiliaid hyn yn cynnwys llywodraethau’r DU, gweinyddwyr etholiadol, sefydliadau cymdeithas sifil, pleidiau gwleidyddol, ymgyrchwyr, rheoleiddwyr eraill, a’r heddlu. 

Er enghraifft, bydd gwella cywirdeb a chyflawnder cofrestrau etholiadol i’r lefelau a nodir yn Atodiad B (Tabl 1) yn gofyn am ymdrechion parhaus a mwy cadarn gan Swyddogion Cofrestru Etholiadol (ERO) i gysylltu ac annog pobl i gofrestru. Ond bydd 
hefyd yn gofyn i lywodraethau ddatblygu offer newydd i helpu Swyddogion Cofrestru Etholiadol – yn enwedig mathau newydd o gofrestru awtomatig ac integredig sy’n dibynnu ar ffynonellau cadarn o ddata sy’n cael eu dal yn ganolog gan lywodraethau neu asiantaethau ar hyn o bryd.

Rydym wedi cynnig lefelau realistig – ond uchelgeisiol – y dylai’r system gyfan anelu at eu cyrraedd dros oes pum mlynedd y Cynllun Corfforaethol hwn (hyd at 2029/30). Byddwn yn casglu data ar gyfer Prydain Fawr, Cymru, Lloegr, yr Alban a Gogledd Iwerddon yn ôl yr angen, a byddwn yn diweddaru Pwyllgor y Llefarydd ar y Comisiwn Etholiadol, Senedd yr Alban a’r Senedd bob blwyddyn ar y cynnydd. Mae ein dangosyddion system allweddol wedi’u cynnwys yn Atodiad B (Tabl 1).

Dangosyddion perfformiad allweddol

Ein dangosyddion perfformiad allweddol yw ein safonau gwasanaeth, sy’n mesur y ffordd rydym yn darparu gwasanaethau i’r cyhoedd, gwasanaethau etholiadol lleol, 
ymgeiswyr, ymgyrchwyr, pleidiau gwleidyddol, seneddau a llywodraethau. Rydym yn defnyddio cymysgedd o fetrigau meintiol ( mesuradwy a phenodol) ac ansoddol (sy’n dangos cynnydd neu welliant).

Bydd y dangosyddion hyn yn ein galluogi i gadw golwg ar ein perfformiad o ran cyflawni’r buddion a amlinellir yn ein blaenoriaethau strategol o flwyddyn i flwyddyn. Gan ddilyn arferion gorau ac adeiladu ar sail ein profiad, rydym wedi gosod targedau penodol ar gyfer blwyddyn gyntaf y cynllun hwn (2025/26). Am y tro cyntaf, rydyn ni hefyd yn gosod targedau uchelgeisiol ar gyfer y bumed flwyddyn a fydd yn adlewyrchu effaith cyflawni’r Cynllun Corfforaethol hwn dros ei gyfnod o bum mlynedd. Byddwn yn rhoi’r wybodaeth ddiweddaraf i Bwyllgor y Llefarydd ar y Comisiwn Etholiadol, Senedd yr Alban a’r Senedd yn flynyddol ar gynnydd. Mae ein dangosyddion perfformiad wedi’u cynnwys yn Atodiad B (Tabl 2).

Mesurau rhaglenni a phrosiectau 

Yn ogystal â’r ddau grŵp o ddangosyddion, bydd gennym hefyd fesurau ar gyfer rhaglenni a phrosiectau. Bydd ein Bwrdd Sicrwydd Portffolio (PAB) yn cymeradwyo’r buddion ariannol a/neu anariannol y mae pob prosiect a rhaglen wedi’u cynllunio i’w cyflawni a’r cerrig milltir ar gyfer cyflawni. Bydd y rhain yn cael eu holrhain yn fisol a’u trafod bob chwarter gyda Phwyllgor Archwilio a Sicrhau Risg Bwrdd y Comisiwn.

Sut byddwn ni’n monitro ac yn asesu ein dangosyddion 

Byddwn yn monitro ac yn asesu ein dangosyddion ar gyfer pob ardal o’r DU – Cymru, Lloegr, yr Alban a Gogledd Iwerddon – i ystyried datganoli a’n hatebolrwydd i seneddau gwahanol. Byddwn yn rhoi’r wybodaeth ddiweddaraf i bob senedd am y tueddiadau bob blwyddyn.
 

Rhagdybiaethau ariannol

Chwyddiant: Cynnydd o 2.5% mewn cyflogau yn 2025/26 (yn seiliedig ar darged CPIH); cynnydd nad yw’n ymwneud â chyflogau o 3.5% RPI yn 2025/26. Nid oes unrhyw ragdybiaethau mewn perthynas â chwyddiant wedi cael eu cymhwyso o 2026/27, o ystyried lefelau uchel o ansicrwydd cynhenid o ran rhagamcanu.

Adolygiad cyflogau: IGweithredu’r cynnydd yn yr adolygiad cyflogau yn 2025/26, gyda thâl perfformiad yn cael ei weithredu o 2026/27.

Costau craidd: Dim newidiadau mewn gweithgareddau llinell sylfaen a nifer y staff ar ôl 2025/26. Mae gweithgarwch newid a nifer y staff cysylltiedig yn cael eu hadlewyrchu yng nghostau cyffredinol y prosiect. Mae’r cynnydd mewn costau yn adlewyrchu chwyddiant yn 2025/26, ac effaith yr adolygiad cyflogau (fel uchod). 

Costau digwyddiadau: Mae’r costau’n amrywio yn dibynnu ar yr adnoddau sydd eu hangen ar gyfer etholiadau (a refferenda o bosibl) ym mhob blwyddyn. Mae’r cynnydd mewn blynyddoedd diweddarach yn gysylltiedig yn bennaf â’r tybiaethau o ran amseriad etholiad cyffredinol nesaf Senedd y DU.

Gwariant cyfalaf: Tybir y bydd yn aros yn weddol sefydlog dros y cyfnod. 

Buddion: Ar hyn o bryd nid yw’r ffigurau’n cynnwys y buddion ariannol posibl sy’n gysylltiedig â phrosiectau’r Cynllun Corfforaethol. Bydd y buddion ariannol a ragwelir yn cael eu hadlewyrchu mewn rowndiau cyllido blynyddol yn y dyfodol.

Wrth gefn: Mae £1.1m o arian wrth gefn yn cael ei gynnwys ar gyfer costau Craidd a Digwyddiadau bob blwyddyn i dalu am gostau ychwanegol, gan gynnwys unrhyw isetholiadau ychwanegol a digwyddiadau annisgwyl eraill.