Mae’n rhaid i chi gynhyrchu ac arddangos, yn Gymraeg a Saesneg, yr hysbysiad ‘Canllawiau i bleidleiswyr’ a’r hysbysiad ‘Cyfarwyddiadau i bleidleiswyr’. Rhagnodir gofynion arddangos a chynnwys yr hysbysiadau hyn mewn deddfwriaeth.1
Mae’n rhaid i’rdatganiad ynghylch pleidiau a phobl a enwebwyd gael ei argraffu mewn print amlwg a’i arddangos tu mewn a thu allan i bob gorsaf bleidleisio.2
Defnyddio Cymraeg neu Saesneg mewn gorsafoedd pleidleisio
Wrth i chi friffio staff yr orsaf bleidleisio dylech nodi’n glir y dylid defnyddio Cymraeg neu Saesneg yn unig wrth gynorthwyo neu roi cyfarwyddiadau i etholwyr mewn gorsafoedd pleidleisio. Bydd hyn yn sicrhau tryloywder mewn gweithredoedd, ac yn galluogi unrhyw arsylwr neu asiant pleidleisio yn yr orsaf bleidleisio i fonitro’r broses bleidleisio.
Efallai y bydd angen cymorth ar rai pleidleiswyr mewn iaith arall oherwydd sgiliau prin yn y Gymraeg neu’r Saesneg. Dylech ystyried pa gymorth rydych yn gallu ei ddarparu i bleidleiswyr yn eich ardal, fel darparu cyfieithiadau o hysbysiadau’r orsaf bleidleisio.
Mewn rhai achosion eithriadol efallai na fydd yr hysbysiadau wedi’u cyfieithu'n ddigonol nac yn briodol. Er enghraifft, efallai y bydd gan bleidleisiwr lefelau isel o lythrennedd neu â chwestiwn sy’n disgyn y tu hwnt i gwmpas yr hysbysiadau. Yn yr amgylchiadau hynny, gall staff yr orsaf bleidleisio ddarparu cymorth mewn iaith ar wahân i Gymraeg neu Saesneg os ydynt yn gallu.
Pan roddir cymorth mewn iaith arall, dylai staff yr orsaf bleidleisio egluro i staff eraill ac unrhyw asiantiaid pleidleisio neu arsylwr sy’n bresennol pa gwestiwn a ofynnwyd a’r ymateb a roddwyd.
Dylech atgoffa staff yr orsaf bleidleisio i gysylltu â’r Swyddog Canlyniadau (neu’r Swyddog Cofrestru Etholiadol os yn berthnasol) os oes ganddyn nhw unrhyw ymholiadau gan etholwyr nad ydynt yn gallu delio â hwy.