Dylid paratoi gorsafoedd pleidleisio gyda'r pleidleisiwr mewn golwg. Yn arbennig, dylech gymryd i ystyriaeth anghenion pleidleiswyr gydag amrywiaeth o anableddau.
Dylech ystyried lleoliad yr holl ddodrefn a chyfarpar angenrheidiol, yn ogystal â lle dylid arddangos yr holl hysbysiadau, ynghyd â lleoliad arwyddion o fewn yr orsaf bleidleisio ac arwyddion allanol.
Dylech ddatblygu cynlluniau ar gyfer gosod a pharatoi pob un o’ch gorsafoedd pleidleisio a all gynorthwyo'r sawl sy’n gosod y gorsafoedd pleidleisio. Dylech ystyried llif a phrofiad y pleidleiswyr, gan gynnwys sut bydd pleidleisiwr yn symud drwy’r broses bleidleisio, o fynd i mewn i'r orsaf bleidleisio i'w gadael. Dylai gosodiad yr orsaf bleidleisio alluogi’r pleidleisiwr i fwrw ei bleidlais yn gyfrinachol, a dylai hefyd alluogi staff yr orsaf bleidleisio i ganfod a oes rhywun yn ceisio dylanwadu ar sut mae etholwr yn pleidleisio, neu gael gwybodaeth am hynny.
Bydd angen i chi sicrhau bod pwy bynnag sy’n gyfrifol am osod a pharatoi gorsafoedd pleidleisio yn gwybod sut i wneud hynny a’r hyn y dylai’r gosodiad ei gyflawni.
Os oes rhywun ac eithrio staff yr orsaf bleidleisio yn paratoi'r orsaf bleidleisio, dylai staff eich gorsaf bleidleisio wirio ei bod wedi'i gosod yn briodol. Dylent gyfeirio at unrhyw gynlluniau gosod rydych wedi eu cynhyrchu ac at y rhestr wirio gosod gorsafoedd pleidleisio yn llawlyfr gorsafoedd pleidleisio'r Comisiwn wrth wneud hynny.
Mae’r llawlyfr gorsafoedd pleidleisio hefyd yn ymdrin â lleoli offer ac arddangos hysbysiadau ac yn cynnig enghreifftiau o osodiadau ar gyfer ystafell gydag un orsaf bleidleisio ac ystafell gyda mwy nag un orsaf bleidleisio.
Gallwch ddod o hyd i lawlyfr gorsafoedd pleidleisio'r Senedd yn adran pleidleisio mewn gorsaf bleidleisio ein tudalen adnoddau.
Gellir defnyddio ymweliadau arolygwyr gorsafoedd pleidleisio i wirio gosodiad yr orsaf bleidleisio ac i sicrhau bod yr holl hysbysiadau'n parhau i gael eu harddangos yn briodol drwy gydol y diwrnod pleidleisio. Rydym wedi llunio'r rhestr wirio ganlynol i gefnogi eu hymweliadau.
Gallwch ddod o hyd i'r Rhestr wirio ar gyfer arolygwtr gorsafoedd pleidleisio yn adran pleidleisio mewn gorsaf bleidleisio ein tudalen adnoddau.