Canllawiau i Swyddogion Canlyniadau sy’n gweinyddu etholiad y Senedd

Mae’n ofynnol i chi ddarparu gorsafoedd pleidleisio â deunyddiau ac offer penodol a bydd angen i chi drefnu hyn ymlaen llaw i sicrhau bod popeth yn ei le i gynnal pleidlais mewn gorsaf bleidleisio.

Crynodeb o eitemau i’w darparu i orsafoedd pleidleisio

Mae’n rhaid i chi ddarparu gorsafoedd pleidleisio â:1

• blwch/ blychau pleidleisio 
• papurau pleidleisio (yn cynnwys papurau pleidleisio a gyflwynwyd)
• beiros neu bensiliau i alluogi pleidleiswyr i farcio eu papurau pleidleisio
• sgriniau pleidleisio 
• rhan berthnasol y gofrestr
• rhestr pleidleiswyr absennol - pleidleiswyr post, pleidleiswyr drwy ddirprwy a phleidleiswyr post drwy ddirprwy
• ffurflen i gofnodi manylion etholwyr sydd wedi cael papurau pleidleisio ar ôl cywiro gwall clerigol (a all gael ei hatodi i gofrestr yr orsaf bleidleisio)
• rhestr(au) rhifau cyfatebol
• cyfrifon papurau pleidleisio 
• copi sampl mawr o’r papur pleidleisio, i’w arddangos tu mewn i’r orsaf bleidleisio
• copi sampl mawr o’r papur pleidleisio i’w roi i etholwyr i fynd gyda nhw i fwth pleidleisio er mwyn cyfeirio ato
• dyfais bleidleisio i’w defnyddio gan bleidleiswyr dall neu’n wan eu golwg
• hysbysiad o ganllawiau i bleidleiswyr (’Sut i bleidleisio yn yr etholiadau hyn’) (i’w arddangos tu mewn a thu allan i bob gorsaf bleidleisio)
• cyfarwyddiadau ar gyfer hysbysiadau pleidleiswyr (i’w harddangos tu mewn i’r bwth pleidleisio)
• datganiad gan gymdeithion pleidleiswyr ag anableddau
• rhestr o bleidleisiau a gyflwynwyd
• rhestr o bleidleisiau a nodwyd gan y Swyddog Llywyddu
• datganiad o nifer y pleidleisiau a nodwyd gan y Swyddog Llywyddu
• rhestr o bleidleiswyr ag anableddau a gafodd gymorth gan gymdeithion
• pecynnau, gyda seliau, i roi’r eitemau sydd i’w dychwelyd i chi ynddynt, fel papurau pleidleisio drwy’r post a ddychwelwyd i’r orsaf bleidleisio, ac er mwyn pecynnu'r ddogfennaeth etholiad ar ddiwedd y cyfnod pleidleisio
• y datganiad ynghylch pleidiau a phersonau a enwebwyd (i'w argraffu mewn print amlwg a’i arddangos tu mewn a thu allan i bob gorsaf bleidleisio) 
• unrhyw offer ychwanegol rydych wedi eu pennu’n angenrheidiol i wneud pleidleisio'n haws ac yn fwy hygyrch i bleidleiswyr anabl e.e. bathodynnau i adnabod staff yr orsaf bleidleisio 

Rhaid i chi hefyd wneud trefniadau o’r fath a ystyriwch yn addas i sicrhau y darperir staff, ymgeiswyr ac asiantiaid a benodwyd i fynychu’r orsaf gyda’r gofynion cyfrinachedd perthnasol canlynol.2

Yn ogystal, dylech ddarparu:

• amlenni gyda seliau, i roi unrhyw bapurau pleidleisio a gyflwynwyd ond sydd heb eu rhoi yn y blwch/blychau pleidleisio gan yr etholwr
• ffurflen neu restr i gofnodi etholwyr a nodwyd fel pleidleiswyr post ond sy’n honni nad ydynt wedi gofyn am hyn
• papur nodiadau at ddefnydd staff yr orsaf bleidleisio
• eitemau ysgrifennu yn ôl yr angen, e.e. clipiau papur, pinnau bawd, tac gludiog, tâp gludiog
• sachau plastig i ddychwelyd offer ysgrifennu a chyfarpar i’r lleoliad dilysu
• amlenni i greu pecynnau cymysg

Dylai gorsafoedd pleidleisio sydd wedi gosod dolen sain ei defnyddio lle bo’n bosibl i gefnogi hygyrchedd y broses etholiadol i bleidleiswyr sydd wedi colli eu clyw. Byddai angen hyfforddi staff yr orsaf bleidleisio ar sut i ddefnyddio’r rhain yn y sesiwn friffio.

Rydym wedi cynhyrchu arolwg templed ar gyfer pleidleiswyr gorsafoedd pleidleisio sydd angen cymorth ychwanegol wrth bleidleisio, y dymunwch eu darparu mewn gorsafoedd pleidleisio efallai. Ceir rhagor o wybodaeth yn ein cyfarwyddiadau i Swyddogion Canlyniadau ynghylch cymorth gyda phleidleisio i bleidleiswyr anabl yn yr adran adolygu’r etholiad .

Dylech wirio bod holl offer gorsafoedd pleidleisio'n addas at y diben a bod gennych niferoedd digonol. Dylai hyn gynnwys rhoi ystyriaeth i sawl blwch pleidleisio i’w ddefnyddio gan na fyddai un blwch yn ddigonol o bosibl petai nifer fawr o bleidleiswyr yn galw. Rhaid i'r holl flychau pleidleisio a ddarparwyd i'w defnyddio mewn gorsafoedd pleidleisio gael eu cloi neu eu selio fel sy'n briodol gan staff yr orsaf bleidleisio ar ddechrau'r cyfnod pleidleisio.3

Dylid nodi pob blwch yn glir gyda'r etholiad y mae’n berthnasol iddo. 

Dylech fod wedi paratoi offer a deunyddiau eich gorsaf bleidleisio mewn da bryd cyn diwrnod pleidleisio, er mwyn eu danfon i orsafoedd pleidleisio neu eu casglu gan Swyddogion Llywyddu.