Canllawiau i Swyddogion Canlyniadau sy’n gweinyddu etholiad y Senedd

Fel Swyddog Canlyniadau, rydych yn destun i dorri darpariaethau dyletswydd swyddogol. Golyga hyn os ydych chi neu’ch dirprwyon penodedig, heb achos rhesymol, yn euog o weithred neu esgeulustod sydd yn torri dyletswydd swyddogol, byddwch chi (a/neu eich dirprwyon) yn agored, ar euogfarn ddiannod, i ddirwy ddigyfyngiad.1  

Mae gennych y pŵer i gymryd camau ag sy'n briodol yn eich barn chi i unioni gweithredoedd neu anweithred sy’n codi mewn cysylltiad â'ch swyddogaethau etholiadol nad ydynt yn unol â’r rheolau neu unrhyw ofynion eraill sy’n berthnasol i’r etholiad.2

Mae’r pŵer hwn yn eich galluogi i unioni gwallau gweithdrefnol a wneir gennych chi fel Swyddogion Canlyniadau, neu gan unrhyw ddirprwy Swyddogion Canlyniadau, Swyddogion Cofrestru Etholiadol, Swyddogion Llywyddu neu bobl sy’n darparu nwyddau neu wasanaethau i chi/nhw. Nid yw'r pŵer hwn yn ymestyn i gywiro gwallau a wneir gan ymgeiswyr neu asiantiaid. I gael rhagor o wybodaeth am gamgymeriadau a wneir yn ystod y broses enwebu gan ymgeiswyr ac asiantiaid, gweler ein canllawiau ar gywiro gwallau bach.

Mae gwall gweithdrefnol yn cyfeirio at wall mae rhywun wedi’i wneud yn ystod y broses o gynllunio neu gynnal yr etholiad, a all effeithio ar broses neu ganlyniad yr etholiad. Er enghraifft, gwybodaeth anghywir ar gardiau neu bapurau pleidleisio, neu bapurau pleidleisio post neu orsaf bleidleisio yn cael eu darparu mewn camgymeriad neu nad ydynt yn cael eu darparu pan ddylent. Nid yw’r esiamplau uchod yn gynhwysfawr a dylech gysylltu â thîm Comisiwn Cymru am gymorth a chyngor os ydych o’r farn eich bod wedi gwneud camgymeriad y gellid ei gywiro gan ddefnyddio’r pŵer hwn. Dylech hefyd geisio cyngor cyfreithiol annibynnol eich hun.

Lle’r ydych yn unioni gweithred neu anweithred gweithdrefnol yn llawn drwy ddefnyddio eich pŵer i gywiro gwall gweithdrefnol, ni fyddwch yn euog o drosedd neu dorri dyletswydd swyddogol3 .  Dylech gofio nad yw’r pŵer i unioni gwallau gweithdrefnol yn eich galluogi chi fel Swyddog Canlyniadau i ail-gyfrifo canlyniad yr etholiad ar ôl i’r canlyniad gael ei ddatgan.