Cyflawni'r canfasio blynyddol – Cymru

Cynhyrchwyd y canllawiau canlynol i gefnogi Swyddogion Cofrestru Etholiadol (ERO) wrth gynllunio ar gyfer y canfasio blynyddol a'i gyflawni.

Datblygwyd y canllawiau mewn ymgynghoriad agos â chydweithwyr ar draws y gymuned etholiadol, gan gynnwys Y Weinyddiaeth Tai, Cymunedau a Llywodraeth Leol, Cymdeithas Gweinyddwyr Etholiadol (AEA), Cymdeithas Aseswyr yr Alban (SAA), Gweithgor Cofrestru Etholiadau a Refferenda (ERRWG) a Gweithgor Ymarferwyr Etholiadol Cymru (WEPWG).

Mae'n adlewyrchu rhwymedigaethau cyfreithiol y Swyddog Cofrestru Etholiadol, a beth rydym ni, yr AEA, yr SAA a'r ERRWG yn credu y dylai Swyddogion Cofrestru Etholiadol ddisgwyl gan eu staff wrth baratoi ar gyfer a darparu’r canfas.

Mae'r canllawiau wedi'u cyfeirio at y Swyddogion Cofrestru Etholiadol a'r dyletswyddau y maent yn eu cyflawni. Gan y gall y dyletswyddau hyn, yn ymarferol, gael eu cyflawni gan ddirprwyon a/neu staff penodedig, byddwn yn defnyddio'r term 'chi' drwy gydol y canllaw hwn i olygu'r Swyddog Cofrestru Etholiadol a phwy bynnag sy'n cyflawni swyddogaethau'r Swyddog ar eu rhan.

Safonau Perfformiad

Yn ogystal â'n rôl yn darparu cyngor a chanllawiau, rydym yn gosod safonau ac yn monitro perfformiad Swyddogion Cofrestru Etholiadol trwy ein fframwaith safonau perfformiad.

Mae ein canllawiau i'ch cefnogi i gyflawni eich swyddogaethau yn cynnwys yr hyn y disgwyliwn y bydd angen i Swyddogion Cofrestru Etholiadol ei gael ar waith a'r hyn y byddem yn disgwyl ei weld ar gyfer canlyniadau allweddol y safonau sydd i'w cyflawni. Dylech fod yn ymwybodol o'r fframwaith hwn wrth gynllunio a chyflawni eich swyddogaethau cofrestru.

I gael rhagor o wybodaeth am y fframwaith, gweler ein canllawiau safonau perfformiad ar gyfer Swyddogion Cofrestru Etholiadol.

Sut i ddefnyddio’r canllawiau hyn

Trwy gydol y canllaw hwn rydym yn defnyddio 'rhaid' i gyfeirio at ofyniad cyfreithiol penodol a 'gall / dylai' ar gyfer arfer argymelledig.

Cynhyrchwyd y canllawiau yn seiliedig ar, a dylid ei ddarllen yn unol â'r gofynion a nodir yn adran 9D o Ddeddf Cynrychiolaeth y Bobl 1983 ac yn Rheoliadau Cynrychiolaeth y Bobl (Cymru a Lloegr) 2001.

Mae'r ôl-nodiadau yn y canllaw hwn yn cyfeirio at y darpariaethau perthnasol sydd wedi'u diwygio gan Reoliadau Cynrychiolaeth y Bobl (Canfasio Blynyddol) (Diwygio) 2019 a Rheoliadau Cynrychiolaeth y Bobl (Canfasio Blynyddol) (Diwygio) (Cymru) 2020.

Er mwyn eich helpu i ddefnyddio'r canllaw hwn rydym wedi cynhyrchu dogfen Holi ac Ateb a ddylai ateb unrhyw ymholiadau cychwynnol sydd gennych.