Dylech sicrhau bod cyfathrebu cyson a thryloyw ynghylch coladu'r canlyniad. Os yw dilysu a/neu gyfrif yn cael ei wneud mewn lleoliad(au) canolog, bydd angen i chi ddarparu gwybodaeth i'r rhai sy'n bresennol am y prosesau hynny.
Pan gynhelir cyfrifon lleol unigol, dylech goladu'r datganiadau dilysu lleol a chyfansymiau cyfrif gan bob awdurdod lleol cyfansoddol a chyfrifo'r canlyniad cyffredinol ar gyfer yr etholaeth. Eich lle chi yw penderfynu ar y ffordd orau o reoli'r broses hon yn eich etholaeth.
Pan fydd cyfrifon lleol unigol yn cael eu cynnal, dylech gysylltu â dirprwyon penodedig wrth gynllunio a datblygu'r broses ar gyfer coladu, gwirio a chymeradwyo cyfansymiau lleol, a rhoi arweiniad iddynt ar sut bydd hyn yn gweithio'n ymarferol. Dylech o leiaf ddatblygu a gweithredu protocolau yn ôl yr angen ar gyfer cyfleu gwybodaeth rhyngoch chi, unrhyw ddirprwyon penodedig a'r staff sy'n gweithio ar y broses coladu canlyniadau.
Dylech gynhyrchu a rhannu templedi ymlaen llaw o'r holl ddogfennau y bydd angen i ddirprwyon penodedig eu llenwi wrth goladu cyfansymiau lleol (boed hynny'n electronig neu ar ffurf copi caled) i sicrhau bod yr holl wybodaeth yn cael ei chofnodi a'i throsglwyddo mewn ffordd gyson ac i ddarparu trywydd archwilio clir. Dylai unrhyw system a ddefnyddir fod â mesurau wrth gefn rhag ofn y bydd unrhyw broblemau neu fethiannau yn y system. Dylech benderfynu a oes angen i chi roi systemau neu raglenni TG ar waith i hwyluso hyn.
Dylech hefyd wneud trefniadau ar gyfer profi'r broses ac unrhyw systemau cefnogi rydych yn bwriadu eu defnyddio, a ddylai gynnwys o leiaf un ymarferiad o'r broses sy'n cynnwys eich staff a dirprwyon penodedig a'u staff er mwyn sicrhau bod pawb sy'n gysylltiedig yn deall ac yn gyfarwydd â sut mae'r broses yn gweithio a beth yw eu cyfrifoldebau. Bydd hyn hefyd yn golygu bod modd nodi a datrys unrhyw broblemau cyn y digwyddiad ei hun.
Chi fydd yn penderfynu ar ddyraniad y seddi drwy gymhwyso y dull cyfrifo d'Hondt i gyfanswm cyffredinol y pleidleisiau o'r holl ardaloedd lleol. Bydd cwblhau'r cyfrifiad d’Hondt hwn yn eich galluogi i ddatgan dyraniad y seddi i'r pleidiau cywir ac ymgeiswyr unigol.