Cyn gynted ag y bo’n ymarferol ar ôl i blaid gyflwyno’r ernes briodol, y papurau enwebu, gan gynnwys y ffurflen enwebu, y ffurflenni cyfeiriad cartref, y ffurflenni cydsynio ag enwebiad i bob ymgeisydd ar y rhestr, mae’n rhaid ichi eu harchwilio a phenderfynu a yw’r blaid wedi’i henwebu’n ddilys.1
Mae’r blaid a phob ymgeisydd ar y rhestr plaid yn sefyll ag enwebiad oni bai a hyd nes:
eich bod yn penderfynu bod y papur enwebu'n annilys
bod ymgeisydd yn marw
bod ymgeisydd yn tynnu’n ôl
Mewn achos lle mae ymgeisydd rhestr plaid yn marw neu’n tynnu’n ôl, mae’r ymgeisydd hwnnw yn cael ei dynnu i ffwrdd o’r rhestr plaid. Pan mae ymgeiswyr eraill ar y rhestr plaid o hyd, mae’r rhestr honno yn parhau ag enwebiad dilys.
Seiliau i bennu bod ymgeisydd rhestr plaid heb enwebiad
Wrth archwilio’r papur enwebu, mae gennych yr hawl i benderfynu bod ymgeisydd rhestr plaid wedi peidio â bod yn ymgeisydd enwebedig. Y rhesymau dros y penderfyniad hwn yw:
nad yw manylion ymgeisydd yn y rhestr honno fel sy'n ofynnol yn ôl y gyfraith
mae ymgeisydd wedi'i anghymhwyso dan adran 16(A1) o Ddeddf Llywodraeth Cymru 2006 rhag bod yn Aelod o'r Senedd, a rhag bod yn ymgeisydd i fod yn Aelod o'r Senedd
Pan fyddwch yn penderfynu bod ymgeisydd ar restr plaid heb fod ag enwebiad, nid yw’n atal unrhyw ymgeisydd arall ar y rhestr plaid rhag sefyll ag enwebiad.
Seiliau i bennu bod papur enwebu plaid yn annilys
Yn ôl y gyfraith, yr unig seiliau sydd gennych i benderfynu bod papur enwebu yn annilys yw:
nad yw'r ffurflen enwebiad yn cynnwys enw plaid neu ddisgrifiad, yn groes i reol 6(3) o reolau etholiadau Senedd Cymru
nad yw’r ffurflen enwebu yn cynnwys rhestr plaid neu mae mwy nag 8 ymgeisydd wedi’u cynnwys ar y rhestr plaid
nad yw'r ffurflen enwebu yn cynnwys tystysgrif sy'n awdurdodi defnyddio enw neu ddisgrifiad plaid, yn groes i reol 7(1) a (5) o reolau etholiadau Senedd Cymru
nad yw'r ffurflen wedi'i llofnodi fel sy'n ofynnol gan reol 6(8) o reolau etholiadau Senedd Cymru
bod pob ymgeisydd ar y rhestr plaid wedi peidio â bod ag enwebiad oherwydd eu bod wedi tynnu'n ôl neu yn sgil eu marwolaeth neu nad ydynt yn unol â gofynion y gyfraith