Canllawiau i Swyddogion Canlyniadau sy’n gweinyddu etholiad y Senedd

Rhaid i chi ddarparu pleidleisiau drwy’r post i etholwyr cyn gynted ag y bo’n ymarferol.1 Yn ymarferol, mae hyn yn golygu unrhyw adeg ar ôl i’r manylion sydd i’w hargraffu ar y papurau pleidleisio gael eu cadarnhau h.y. ar ôl y dyddiad cau ar gyfer cyflwyno papurau enwebu, sef 4pm, 19 diwrnod gwaith cyn diwrnod y bleidlais ar gyfer etholiadau’r Senedd.2

Gall y Bwrdd Rheoli Etholiadol (EMB) roi cyfarwyddiadau neu argymhellion ynghylch pryd dylid anfon y cyhoeddiad cyntaf o bleidleisiau post at etholwyr.

Bydd anfon pleidleisiau post yn gynnar yn cynyddu’r amser sydd ar gael i etholwyr - yn enwedig ar gyfer y rheiny sydd angen cael eu hanfon dramor a phleidleiswyr yn y lluoedd arfog - i dderbyn, cwblhau a dychwelyd eu pleidleisiau post. Gallwch ddod o hyd i ragor o wybodaeth yn ein canllawiau ar ddarparu a dosbarthu pleidleisiau post. 

Dim ond i rywun sydd eisoes wedi'i ychwanegu at y gofrestr y cewch chi anfon pleidlais bost. Mae’n ofynnol i’r Swyddog Cofrestru Etholiadol gyhoeddi dau hysbysiad addasu etholiad interim cyn cyhoeddi’r hysbysiad addasu terfynol ar y pumed diwrnod gwaith cyn y bleidlais.3 Mae hyn yn cefnogi’r broses o anfon pleidleisiau drwy’r post yn gynnar yn yr amserlen i’r etholwyr hynny sydd wedi gwneud cais i gofrestru yn agos at y dyddiad cau ar gyfer cofrestru. Am ragor o wybodaeth, gweler ein canllawiau i Swyddogion Cofrestru Etholiadol ar hysbysiadau addasu etholiad. 

Os nad chi yw’r Swyddog Cofrestru Etholiadol hefyd, dylech gysylltu â nhw i gael y rhestr pleidleiswyr drwy’r post a’r rhestr pleidleiswyr drwy ddirprwy cyn gynted â phosibl ar ôl cyhoeddi’r hysbysiad addasu etholiad interim cyntaf i gynnwys yr etholwyr hyn wrth anfon pleidleisiau drwy’r post am y tro cyntaf.4 Rhaid i’r hysbysiad hwn gael ei gyhoeddi ar ddiwrnod y dyddiad cau ar gyfer papurau enwebu.5  

Bydd angen i chi hefyd gysylltu â’r Swyddog Cofrestru Etholiadol i gael unrhyw ddiweddariadau dilynol ar ôl i’r ail hysbysiad addasu etholiad interim a’r hysbysiad addasu terfynol gael eu cyhoeddi. 

Am ragor o wybodaeth am hysbysiadau addasu interim gweler ein canllawiau ar gyfer Swyddogion Cofrestru Etholiadol. 

Mae ein hamserlen etholiad templed ar gyfer etholiadau'r Senedd hefyd yn cynnwys y dyddiadau cyhoeddi perthnasol ar gyfer yr hysbysiadau hyn. 

Gallwch ddod o hyd i amserlen etholiad y Senedd yn adran pleidleisio absennol ein tudalen adnoddau.  

Dyddiad cau ar gyfer ceisiadau pleidleisio absennol a cheisiadau am newidiadau i drefniadau presennol

Y dyddiad cau ar gyfer ceisiadau newydd am bleidlais drwy’r post a dirprwy drwy’r post yw 5pm, 11 diwrnod gwaith cyn y diwrnod pleidleisio.6 Dyma’r dyddiad cau hefyd:

• i ganslo pleidleisiau drwy’r post presennol
• i etholwyr wneud newidiadau (h.y. diwygio’r cyfeiriad danfon) i unrhyw drefniadau pleidlais absennol presennol (h.y. pleidlais drwy’r post, drwy ddirprwy a dirprwy drwy’r post)

Fodd bynnag, os yw etholwr wedi’i restru fel pleidleisiwr post ac eisoes wedi dychwelyd ei bapur pleidleisio drwy’r post, ni all wneud newidiadau ar ôl yr amser hwnnw, hyd yn oed os yw hyn cyn 5pm, 11 diwrnod gwaith cyn y diwrnod pleidleisio.7

Y terfyn amser ar gyfer ceisiadau newydd am bleidlais drwy ddirprwy (nid dirprwy drwy’r post), ac eithrio ceisiadau argyfwng am bleidlais drwy ddirprwy, yw 5pm, 6 diwrnod gwaith cyn y diwrnod pleidleisio.8

Y dyddiad cau ar gyfer ceisiadau am bleidlais drwy ddirprwy mewn argyfwng yw 5pm ar ddiwrnod yr etholiad.9 Am ragor o wybodaeth gweler ein canllawiau ar bleidleisio drwy ddirprwy mewn argyfwng.

Mae’r tabl yn crynhoi’r dyddiadau cau er hwylustod:

Bydd y Swyddog Cofrestru Etholiadol yn rhoi’r rhestr derfynol o bleidleiswyr absennol i chi, h.y. y rhestr o bleidleiswyr post, y rhestr o bleidleiswyr post drwy ddirprwy a’r rhestr o ddirprwyon, ar ôl i’r dyddiad cau ar gyfer ceisiadau fynd heibio. 

Pan wneir cais cofrestru wedi’i gwblhau erbyn y terfyn amser ond nad oes modd gwirio pwy yw’r ymgeisydd yn erbyn cofnodion yr Adran Gwaith a Phensiynau na thrwy baru data lleol, mae gan y Swyddog Cofrestru Etholiadol tan y terfyn amser ar gyfer penderfynu ceisiadau, sef chwe diwrnod gwaith cyn y bleidlais, i gael y dystiolaeth ofynnol gan yr ymgeisydd dan y broses eithriadau a gwneud penderfyniad.

Ni ellir caniatáu pleidlais absennol hyd nes y penderfynir yn gadarnhaol ar y cais cofrestru. Yna bydd angen anfon y bleidlais bost, a bydd angen i’r pleidleisiwr dderbyn, cwblhau a dychwelyd ei bleidlais bost erbyn 10pm ar ddiwrnod y bleidlais.