Os nad chi yw’r Swyddog Cofrestru Etholiadol hefyd, cyn gynted ag y bo’n ymarferol, bydd yn rhoi ichi restr o’r holl etholwyr sydd wedi penodi dirprwy i bleidleisio ar eu rhan erbyn 5pm, 6 diwrnod gwaith cyn y diwrnod pleidleisio. Rhaid i chi roi'r rhannau perthnasol o’r rhestr dirprwyon a’r rhestr dirprwyon drwy’r post i'r Swyddog Llywyddu.
Mae etholwyr sydd â phleidlais ddirprwy wyneb yn wyneb ar waith yn cael eu marcio â ‘P’ ar gofrestr yr orsaf bleidleisio. Fodd bynnag, rhaid i gofrestr yr orsaf bleidleisio gael ei marcio ag ‘A’ yn erbyn enw etholwr y mae ei ddirprwy wedi gwneud cais i bleidleisio drwy’r post gan na all bleidleisio yn yr orsaf bleidleisio mwyach.1
Bydd rhestr ar wahân yn cynnwys manylion dirprwyon drwy’r post.
Etholaethau trawsffiniol
Pan fydd etholaeth yn cwmpasu mwy nag un awdurdod lleol, bydd angen i chi gysylltu â Swyddog(ion) Cofrestru Etholiadol mewn unrhyw awdurdod lleol arall i gael y rhestr o bob etholwr ar gyfer y rhannau perthnasol o'r etholaeth sydd, erbyn 5pm chwe diwrnod gwaith cyn diwrnod y pleidleisio, wedi penodi dirprwy i bleidleisio ar ei ran.
parhad
Cyfyngiadau ar bleidleisio drwy ddirprwy
Ni chaiff unigolyn gael mwy nag un dirprwy ar unrhyw adeg.2
Nid oes gan berson hawl i bleidleisio fel dirprwy yn yr un etholiad Senedd mewn etholaeth benodol ar ran mwy na dau etholwr nad ydynt yn berthnasau agos.3
Gall person weithredu fel dirprwy ar gyfer unrhyw nifer o berthnasau agos. Diffinnir perthynas agos at y dibenion hyn fel priod, partner sifil, rhiant, nain/taid, brawd, chwaer, plentyn neu ŵyr/wyres.4
Byddai dirprwy yn cyflawni trosedd pe bai’n pleidleisio ar ran mwy na dau etholwr nad ydynt yn berthnasau agos mewn unrhyw etholaeth yn yr un etholiad Senedd.5