Beth arall y gallaf ei ystyried er mwyn fy helpu i benderfynu sut i ddyrannu eiddo i lwybrau canfasio?  

Dylech ystyried a oes gennych unrhyw wybodaeth arall, naill ai'n ysgrifenedig neu'n electronig,1   y gallech ei gwirio ar ôl i'r canlyniadau paru data ddod i law i'ch helpu i benderfynu ar y llwybr i'w ddefnyddio ar gyfer pob eiddo.

Etholwyr posibl sydd ar eich System Rheoli Etholiad:

Beth yw'r wybodaeth hon a pham ei bod hi'n ddefnyddiol?Nid yw etholwyr posibl yn etholwyr cofrestredig ond, yn hytrach, maent yn unigolion sydd wedi'u cofnodi yn eich System Rheoli Etholiad, o ganlyniad i broses cloddio data leol neu ffurflen ganfasio a ddychwelwyd yn ôl pob tebyg, a all fod yn gymwys ond nad ydynt wedi cofrestru i bleidleisio yn y cyfeiriad eto.

Mae'r wybodaeth hon yn ddefnyddiol am y gall awgrymu bod angen gwneud newidiadau i'r gofrestr ar gyfer yr eiddo hwnnw, am y gallai unigolion nad ydynt wedi gwneud cais llwyddiannus i gofrestru eto fod yn byw yno.

Gall etholwyr posibl mewn cyfeiriad hefyd ddynodi bod angen cofnodi newidiadau ychwanegol ar gyfer yr unigolion hynny sydd wedi'u cofrestru yn yr eiddo ar hyn o bryd.
Pa gamau y gallwn i eu cymryd?Edrychwch ar ddata lleol er mwyn ceisio cadarnhau a yw'r unigolion hyn i'w gweld yn byw yn yr eiddo o hyd.
Pa effaith y gallai'r wybodaeth hon ei chael ar fy mhenderfyniadau?Os bydd data lleol yn dangos bod unigolyn yn dal i fyw yn y cyfeiriad o bosibl ond nad yw wedi'i gofrestru, y ffordd fwyaf priodol fyddai canfasio'r eiddo drwy Lwybr 2 – y llwybr eiddo heb ei baru.

Os bydd data lleol yn cadarnhau nad yw unigolyn yn byw yn y cyfeiriad mwyach, gall ei enw gael ei dynnu fel etholwr posibl o'r System Rheoli Etholiad a gallai'r eiddo gael ei ganfasio drwy Lwybr 1 – y llwybr eiddo wedi'i baru os bydd pob unigolyn arall mewn eiddo wedi'i baru.

Gwybodaeth oddi wrth SCE arall:

Beth yw'r wybodaeth hon a pham ei bod hi'n ddefnyddiol?Gall fod gan SCEau eraill wybodaeth am unigolion sydd wedi symud i mewn i'ch ardal neu allan ohoni.
Pa gamau y gallwn i eu cymryd?Edrychwch ar unrhyw wybodaeth y mae SCE arall yn ei hanfon atoch am unrhyw newidiadau posibl ychwanegol i eiddo.

Os cewch wybod nad yw etholwr yn byw mewn cyfeiriad mwyach, dylech fynd ati i'w ddileu.
Pa effaith y gallai'r wybodaeth hon ei chael ar fy mhenderfyniadau?Os bydd gwybodaeth gan SCE arall yn dangos bod newidiadau i eiddo, dylech ystyried canfasio'r eiddo gan ddefnyddio Llwybr 2 – y llwybr eiddo heb ei baru.

Ffynonellau eraill data'r cyngor: 

Beth yw'r wybodaeth hon a pham ei bod hi'n ddefnyddiol?Gallai data o adrannau eraill yn yr awdurdod eich helpu i nodi etholwyr posibl ychwanegol neu newidiadau eraill i eiddo.
Pa gamau y gallwn i eu cymryd?Edrychwch ar yr holl ddata sydd wrth law ar gyfer y cyngor am wybodaeth am unrhyw etholwyr posibl ychwanegol neu newidiadau eraill i eiddo. 
Pa effaith y gallai'r wybodaeth hon ei chael ar fy mhenderfyniadau?Os bydd data adrannau eraill y cyngor yn dangos bod etholwyr posibl ychwanegol neu newidiadau eraill i eiddo, dylech ystyried canfasio'r eiddo gan ddefnyddio Llwybr 2 – y llwybr eiddo heb ei baru.

Bydd angen i chi ystyried sut i ddangos tystiolaeth o'ch penderfyniadau a'u dogfennu os bydd gwybodaeth o ffynhonnell arall, heblaw canlyniadau paru data, yn arwain at benderfyniad i newid eiddo o un llwybr i'r llall. 

Diweddarwyd ddiwethaf: 13 Chwefror 2024