Rhoddion a benthyciadau pleidiau gwleidyddol ym Mhrydain Fawr
Sut i roi gwybod am roddion a benthyciadau
Rhaid i ni dderbyn eich adroddiadau o fewn 30 diwrnod o ddiwedd pob chwarter adrodd. Byddwn yn ymchwilio i unrhyw fethiant i gyflwyno adroddiad o fewn y terfyn amser yn unol â'n Polisi Gorfodi.
Dyma'r terfynau amser ar gyfer cyflwyno adroddiadau chwarterol:
| Chwarter | Dyddiad y dylid cyflwyno'r adroddiad |
|---|---|
| Un (1 Ionawr – 31 Mawrth) | 30 Ebrill |
| Dau (1 Ebrill – 30 Mehefin) | 30 Gorffennaf |
| Tri (1 Gorffennaf – 30 Medi) | 30 Hydref |
| Pedwar (1 Hydref – 31 Rhagfyr) | 30 Ionawr |
Cyflwyno eich adroddiadau
Gallwch gyflwyno eich adroddiadau chwarterol ar CPE Ar-lein. Fel arall, gallwch lawrlwytho'r ffurflenni adrodd isod ac anfon y ffurflenni wedi'u cwblhau atom drwy e-bost i [email protected] neu gallwch eu hanfon atom drwy'r post.
Eithriadau o ran adroddiadau chwarterol
Os nad ydych wedi cael unrhyw roddion, wedi trefnu unrhyw fenthyciadau newydd nac wedi gwneud unrhyw newidiadau i'ch benthyciadau presennol, bydd angen i chi gyflwyno adroddiadau chwarterol o hyd. Gelwir hwn yn ‘adroddiad dim trafodion’. Gallwch gyflwyno adroddiadau dim trafodion drwy CPE Ar-lein neu, os byddwch yn defnyddio'r ffurflenni papur, bydd angen ffurflen RP10QN arnoch ar gyfer rhoddion a ffurflen RP10QNB ar gyfer benthyciadau.
Os byddwch yn cyflwyno pedwar adroddiad dim trafodion yn olynol, byddwch wedi'ch eithrio rhag cyflwyno adroddiadau pellach hyd nes y byddwch yn cael rhodd adroddadwy arall, yn trefnu benthyciad newydd neu'n gwneud newidiadau i fenthyciad presennol. Os nad ydych yn siŵr a yw eich plaid wedi'i heithrio rhag cyflwyno adroddiad chwarterol am roddion neu fenthyciadau, cysylltwch â ni.
Hyd yn oed os ydych wedi'ch eithrio rhag cyflwyno adroddiadau chwarterol, rhaid i chi gyflwyno cyfrifon blynyddol ar gyfer eich plaid o hyd.
Ffurflenni