Dylech feddu ar wybodaeth ymarferol am y ddeddfwriaeth sy'n llywodraethu'r ffordd y caiff yr etholiad ei gynnal. Felly, yn ogystal â dealltwriaeth glir o'ch swyddogaethau statudol, dylai fod gennych drosolwg o'r hyn y mae'r ddeddfwriaeth yn ei gynnwys a dealltwriaeth o'r ffordd y mae'n effeithio ar y broses o weinyddu'r etholiad, fel y gallwch adolygu'r broses gyfan, ei chwestiynu lle bo angen, a sicrhau ei hansawdd.
Mae cyfrifoldebau rheoli yn gysylltiedig â'ch rôl. Er enghraifft:
mynnu cael y staff a'r adnoddau sydd eu hangen i gynnal etholiad trefnus
sicrhau'r cymorth, y sgiliau a'r arbenigedd angenrheidiol o bob rhan o'ch awdurdod lleol eich hun
goruchwylio'r broses o gynllunio, rheoli prosiect a rheoli risg yr etholiad ac ymgorffori unrhyw wersi a ddysgwyd o etholiadau blaenorol
nodi a goruchwylio unrhyw gamau gweithredu sydd eu hangen er mwyn lliniaru unrhyw faterion sy'n codi
sicrhau y caiff staff eu hyfforddi'n briodol i gyflawni eu priod rolau
cefnogi'r staff sy'n gweinyddu'r etholiad a goruchwylio eu gwaith yn briodol
cyfarwyddo staff, monitro cynnydd a chael adborth rheolaidd ar weithgareddau
os nad chi yw'r Swyddog Canlyniadau Ardal Heddlu hefyd, cynnal cydberthynas waith effeithiol â'r unigolyn hwnnw
os nad chi yw'r Swyddog Cofrestru Etholiadol hefyd, cynnal cydberthynas waith effeithiol â'r unigolyn hwnnw
cynnal cydberthynas waith effeithiol â'ch Pwynt Cyswllt Unigol yn yr heddlu
sicrhau y caiff cyfrifon etholiadau eu cwblhau mewn modd amserol