Archwilio ffurflenni cyfeiriad cartref ar ôl i’r enwebiadau gau
Rhai pobl yn unig sydd â’r hawl i archwilio ffurflen cyfeiriad cartref ymgeisydd/ymgeiswyr sy’n sefyll ag enwebiad.1
Y bobl hyn yw:
Unrhyw berson sy’n sefyll ag enwebiad fel ymgeisydd yn yr un etholaeth Senedd
Asiant etholiad neu lofnodwr unrhyw berson arall sydd wedi’i enwebu fel ymgeisydd yn yr un etholaeth Senedd
Pan mae person arall sy’n sefyll ag enwebiad yn yr un etholaeth Senedd yn gweithredu fel asiant arno’i hun, unrhyw berson arall a enwebir ganddo
Dylid cadw ffurflenni cyfeiriad cartref yn ddiogel ac maent ar gael i'w harchwilio yn ystod oriau swyddfa'n unig ar unrhyw ddyddiad gwaith o’r amser hwyraf i gyflwyno papurau enwebu hyd nes diwrnod y bleidlais.2
Pan mae ffurflen cyfeiriad cartref wedi’i chyflwyno’n electronig, mae’n rhaid ichi gymryd camau rhesymol i sicrhau mynediad ar gyfer dibenion archwilio.3
Dylid archwilio ffurflenni cyfeiriad cartref dan oruchwyliaeth. Ni chaniateir cymryd detholiadau o ffurflenni cyfeiriad cartref, na chopïau ohonyn nhw.4
Ar ôl i’r cyfnod archwilio ddod i ben, nid yw'r ffurflenni cyfeiriad cartref ar gael i'w harchwilio.
Dylech ei gwneud yn glir i unrhyw un sy’n archwilio ffurflen cyfeiriad cartref sy’n gofyn i beidio â chyhoeddi cyfeiriad cartref ymgeisydd bod y wybodaeth ar y ffurflen i’w defnyddio gan y person sy’n ei harchwilio'n unig ar gyfer:5
cyflwyno deiseb etholiadol
gwneud cwyn i’r heddlu bod unigolyn wedi gwneud datganiad ffug,
a bod ei defnyddio at unrhyw ddiben arall o bosib yn torri deddfwriaeth diogelu data ac felly allai wneud yr unigolyn sy’n defnyddio’r wybodaeth ar gyfer unrhyw ddiben arall yn atebol i erlyniad troseddol.
Rhaid i ffurflenni cyfeiriad cartref gael eu storio'n ddiogel am gyfnod o 35 diwrnod gwaith ar ôl i'r canlyniad gael ei ddatgan.6
Rhaid iddynt gael eu dinistrio'n ddiogel ar y diwrnod gwaith nesaf ar ôl y cyfnod 35 diwrnod.
Os cyflwynir deiseb etholiadol sy'n gysylltiedig â'r etholiad cyn pen 35 diwrnod gwaith, rhaid cadw'r ffurflenni cyfeiriad cartref yn ddiogel tan ddiwedd y trafodion deiseb (yn cynnwys unrhyw apêl o'r fath drafodion).
Rhaid dinistrio’r ffurflen cyfeiriad cartref yn ddiogel cyn gynted ag y bo’n ymarferol ar ôl i drafodion neu apêl ddod i ben.