Canllawiau i Swyddogion Canlyniadau sy’n gweinyddu etholiad y Senedd

At bwy y mae’n rhaid anfon pleidlais drwy’r post? 

Rhaid i chi anfon pleidlais drwy’r post at:1   

• unrhyw etholwr sy’n ymddangos ar y rhestr pleidleiswyr drwy’r post ar gyfer yr etholiad 
• unrhyw ddirprwy sy’n ymddangos ar y rhestr pleidleiswyr post drwy ddirprwy ar gyfer yr etholiad

Amseriad darparu pleidleisiau drwy’r post

Rhaid darparu pleidleisiau post cyn gynted ag y bo’n ymarferol ar ôl y dyddiad cau i gyflwyno papurau enwebu.2   

Dylech roi trefniadau ar waith i sicrhau bod etholwyr yn cael eu papurau pleidleisio drwy’r post cyn gynted â phosibl ac yn blaenoriaethu unrhyw bleidleisiau drwy’r post y gall fod angen eu hanfon dramor er mwyn cynyddu’r amser sydd gan bleidleiswyr drwy’r post i dderbyn, cwblhau a dychwelyd eu pleidlais drwy’r post.

Gall y Bwrdd Rheoli Etholiadol roi cyfarwyddiadau neu argymhellion ynghylch pryd y dylid anfon y cyhoeddiad cyntaf o bleidleisiau post. 

Etholwyr presennol sydd â threfniadau pleidleisio drwy’r post presennol

Ar ôl i’r dyddiad cau ar gyfer tynnu’n ôl fynd heibio, dylid anfon papurau pleidleisio drwy’r post at etholwyr sydd eisoes wedi gwneud cais llwyddiannus am bleidlais bost.

Etholwyr presennol sy’n gwneud ceisiadau newydd am bleidlais drwy’r post

Dylech gysylltu â’r Swyddog Cofrestru Etholiadol (os nad chi yw’r Swyddog Cofrestru Etholiadol) i sicrhau eich bod yn cael y wybodaeth am unrhyw etholwyr sy’n gwneud cais am bleidlais drwy’r post yn ddiweddarach erbyn y dyddiad cau perthnasol ar gyfer pleidlais absennol. 

Etholwyr newydd a wnaeth gais am bleidlais drwy’r post ochr yn ochr â’u cais cofrestru

Mae’n ofynnol i’r Swyddog Cofrestru Etholiadol gyhoeddi dau hysbysiad addasu etholiad interim cyn cyhoeddi’r hysbysiad addasu terfynol 5 diwrnod gwaith cyn y bleidlais.3 Mae hyn yn cefnogi anfon pleidleisiau drwy’r post yn gynnar yn yr amserlen i’r etholwyr hynny sydd wedi gwneud cais i gofrestru'n agos at y dyddiad cau ar gyfer cofrestru, gan mai dim ond i rywun sydd eisoes wedi cael ei ychwanegu at y gofrestr y gallwch roi pleidlais drwy’r post.

I gael rhagor o wybodaeth, edrychwch ar ein canllawiau i Swyddogion Cofrestru Etholiadol ar hysbysiadau addasu interim. 

Mae ein hamserlen etholiad ar gyfer etholiadau'r Senedd hefyd yn cynnwys y dyddiadau cyhoeddi perthnasol. 

Gallwch ddod o hyd i amserlen etholiad y Senedd yn adran pleidleisio absennol ein tudalen adnoddau.