Rheoli materion sy’n ymwneud â chynhyrchu neu ddanfon pleidleisiau drwy’r post
Er y bydd cael mesurau sicrhau ansawdd cadarn ar waith yn helpu i sicrhau bod gwasanaethau cyflenwyr yn cael eu darparu’n gywir, mae’n bwysig bod yn barod i reoli unrhyw wallau neu broblemau a allai godi. Cyn gynted ag y byddwch yn cael gwybod am broblem, naill ai drwy uwchgyfeirio gan eich cyflenwr, neu drwy gyswllt ag etholwyr, mae’n bwysig siarad â’ch cyflenwr i geisio deall maint a chwmpas y mater, ac ystyried eich cynlluniau wrth gefn presennol fel sy’n briodol, gan y bydd hyn yn effeithio ar eich penderfyniadau ar sut i ddatrys y mater.
Cyn gwneud unrhyw benderfyniadau ynghylch pa gam i’w gymryd, mae’n bwysig eich bod yn cysylltu â ni fel y gallwn drafod y mater gyda chi a darparu cyngor a chefnogaeth wedi’u teilwra ynghylch sut i’w reoli.
Pan fydd gennych y wybodaeth berthnasol, wedi derbyn y cyngor priodol ac wedi gwneud penderfyniad ynghylch pa gam i’w gymryd, dylech gytuno ar gynlluniau gyda’ch cyflenwyr yn unol â hynny a chadw mewn cysylltiad agos wrth i'r cynlluniau wrth gefn hyn gael eu rhoi ar waith. Gall hyn gynnwys yr angen i ail-wirio a chymeradwyo proflenni, neu ffigyrau data neu eu tebyg ar fyrder - ond mae’n bwysig eich bod yn parhau i sicrhau y cynhelir gwiriadau sicrhau ansawdd i osgoi unrhyw wallau pellach.
Am ragor o wybodaeth ynghylch prawf-wirio, gweler ein canllawiau ar sicrhau ansawdd.
Bydd angen i chi hefyd ystyried pa gyfathrebu ychwanegol y gall fod ei angen ar gyfer etholwyr neu ymgeiswyr ac asiantiaid o ganlyniad i’r mater;eto, mae hyn yn rhywbeth y gall cysylltiadau’r Comisiwn eich helpu i’w ystyried, felly mae’n bwysig eich bod yn cysylltu â ni i drafod cyn gynted â phosibl.