Rhoddion a benthyciadau pleidiau gwleidyddol ym Mhrydain Fawr

Argraffu'r canllawiau llawn

Grwpio buddion

Rhaid i chi adio buddion a ganiateir:

  • sydd dros £500
  • sydd o’r un ffynhonnell
  • sydd i’r un rhan o’r blaid (plaid ganolog neu uned gyfrifyddu)
  • sydd yn yr un flwyddyn galendr
  • sydd wedi’u derbyn ers y buddiant diwethaf a adroddwyd (os oes un)

Dylech adio’r holl fuddion yn y drefn y gwnaethoch eu derbyn. Rhaid i chi adrodd am grŵp o fuddion pan fydd y cyfanswm yn uwch na'r trothwy adrodd (naill ai £11,180 neu £2,230).1  Rhaid adrodd am yr holl fuddion yn y grŵp yn y chwarter lle mae’r cyfanswm a dderbyniwyd yn fwy na’r trothwy adrodd.2  Rhaid i bob buddiant yn y grŵp gael eu cofnodi a’u hadrodd ar wahân. 

Gall grŵp o fuddion gynnwys unrhyw gyfuniad o roddion a benthyciadau. Er enghraifft, mwy nag un rhodd, mwy nag un benthyciad neu gyfuniad o'r ddau. Os yw grŵp o fuddion yn cynnwys rhoddion a benthyciadau, rhaid i chi nodi hyn yn eich adroddiadau chwarterol.3

Gall grŵp o fuddion gynnwys un buddiant sy’n uwch na’r trothwy adrodd, os mai hwnnw yw’r buddiant sy’n mynd â’r cyfanswm yn y grŵp dros y trothwy.
 

Diagram yn dangos grŵp o fuddion sydd gyda’i gilydd yn uwch na’r trothwy adrodd, un buddiant sy’n uwch na’r trothwy adrodd, a grŵp o fuddion sy’n cynnwys buddiant sy’n uwch na’r trothwy adrodd

Enghraifft: grwpio rhoddion a benthyciadau

Mae unigolyn yn rhoi rhodd o £6,000 i blaid ac yna, yn yr un flwyddyn galendr, yn ymrwymo i fenthyciad o £12,000.

Rhaid i'r blaid adrodd am unrhyw fuddion a ganiateir pan fydd y cyfanswm o'r un ffynhonnell mewn blwyddyn galendr yn fwy na £11,180. O'u hadio at ei gilydd, cyfanswm gwerth y buddion hyn yw £18,000, sy'n fwy na'r trothwy o £11,180. Rhaid adrodd am y buddion yn y grŵp hwn yn y chwarter yr ymrwymwyd i’r benthyciad, gan mai dyma'r buddiant a aeth â'r cyfanswm dros y trothwy adrodd.

Dros £2,230 Amserlen 12 mis o hyd sy’n dangos rhodd o £6,000 a dderbyniwyd ym mis Mai a benthyciad o £12,000 gan yr un ffynhonnell a dderbyniwyd ym mis Awst. Ychwanegwyd y budd-daliadau hyn at ei gilydd rac maent yn fwy na'r trothwy adrodd o £11,180, ac felly maent yn adroddadwy.

Unwaith y bydd grŵp o fuddion yn fwy na'r trothwy adrodd a bod yn rhaid adrodd amdanynt, ddylech chi ddim ychwanegu unrhyw fuddion pellach i'r grŵp hwn.1  Rhaid ychwanegu unrhyw fuddion pellach mewn grŵp newydd, ac mae'n rhaid i chi adrodd amdanynt pan fydd y cyfanswm yn y grŵp newydd yn fwy na'r trothwy adrodd. 

Diagram yn dangos grŵp o fuddion sy'n cyrraedd y trothwy adrodd a grŵp newydd, ar wahân o fuddion

Enghraifft: grwpiau o fuddion

Mae plaid wedi derbyn rhodd o dros £11,180 gan undeb llafur ac wedi adrodd amdani. Dros yr un flwyddyn, mae'r undeb llafur wedyn yn rhoi saith rhodd gwerth £1,000 yr un i'r blaid.

Oherwydd bod y blaid eisoes wedi adrodd am rodd gan yr undeb llafur, mae'r trothwy adrodd isaf o £2,230 yn berthnasol i fuddion pellach gan yr undeb y flwyddyn honno.

Mae’r tair rhodd gyntaf o £1,000 wedi’u grwpio gyda’i gilydd, gan fod y cyfanswm yn uwch na’r trothwy adrodd o £2,230. Rhaid i'r blaid adrodd am y rhoddion hyn yn y chwarter y derbyniwyd y trydydd rhodd, gan mai dyma'r rhodd a aeth â'r cyfanswm dros y trothwy.

Mae’r un peth yn wir am y tair rhodd nesaf, sy’n creu grŵp newydd sydd dros y trothwy adrodd. Rhaid i'r blaid adrodd am y rhoddion hyn yn y chwarter y derbyniwyd y trydydd o’r rhoddion hyn.

Nid oes angen adrodd am y rhodd derfynol ar hyn o bryd. Mae'n is na'r trothwy adrodd ac nid yw wedi'i grwpio gyda rhoddion blaenorol, gan eu bod eisoes mewn grwpiau o dros £2,230. Mae’n bosib y bydd angen adrodd amdani os bydd y rhoddwr yn gwneud rhoddion ychwanegol.

Amserlen 12 mis o hyd sy’n dangos rhodd o dros £11,180 a saith rhodd o £1,000 gan yr un ffynhonnell a dderbyniwyd. Mae’r rhodd o dros £11,180 a chwech o’r saith rhodd o £1,000 yn adroddadwy.
Diweddarwyd ddiwethaf: 31 Ionawr 2025