Diben gwiriad anffurfiol yw i wirio bod papur enwebu'n ymddangos yn gyflawn o ran yr holl ofynion cyfreithiol.
Wrth gynnal gwiriad anffurfiol dylid ei gwneud yn glir bod y papurau enwebu yn cael eu harchwilio’n anffurfiol yn unig.
Mae’r broses hon yn caniatáu i chi dynnu sylw at unrhyw wallau a fyddai’n annilysu’r papur neu a allai roi rheswm dros her ar ôl yr etholiad, gan roi cyfle i gywiro’r rhain cyn eu cyflwyno’n ffurfiol.
Ar ôl cwblhau’r gwiriadau anffurfiol, bydd y papurau naill ai'n cael eu dychwelyd, neu os nad oes unrhyw newidiadau i'w gwneud, gellir eu cyflwyno'n ffurfiol.
Pan gaiff papurau enwebu eu cyflwyno â llaw, efallai y bydd y person sy’n eu cyflwyno yn penderfynu peidio â disgwyl am wiriad anffurfiol neu gall ddewis peidio â gwneud unrhyw newidiadau ar ôl cael cyngor yn ystod y cam gwirio anffurfiol. Os felly, dylid ystyried bod y papur wedi’i gyflwyno’n ffurfiol a dylech ei dderbyn fel y mae.
Dylai’r holl bleidiau, ymgeiswyr unigol ac asiantiaid (fel sy’n briodol) gael cyfle cyfartal i wneud defnydd o wiriad anffurfiol, p’un a ydynt yn cyflwyno enwebiadau â llaw neu’n electronig.
Dylech ystyried sut fyddwch chi’n rheoli’r broses hon, er enghraifft drwy roi system apwyntiadau ar waith.