Os byddwch yn penderfynu danfon pleidleisiau drwy’r post â llaw, dylech gynllunio sut y bydd hyn yn gweithio’n ymarferol. Dylech benodi digon o staff i sicrhau bod y pecynnau pleidlais bost yn cael eu derbyn gan bleidleiswyr post cyn gynted â phosibl er mwyn cynyddu’r amser sydd gan bleidleiswyr post i dderbyn, cwblhau a dychwelyd eu pleidlais bost.
Dylech sicrhau bod staff yn ymwybodol o ystyriaethau diogelu data, a dylech ystyried ei gwneud hi’n ofynnol i staff gadarnhau’n ysgrifenedig wrth eu recriwtio, y byddant yn cadw at y polisi diogelu data.
Dylech hefyd fod â mecanwaith ar waith i fonitro’r gwaith o ddanfon pecynnau pleidlais bost, gyda’r bwriad o sicrhau eu bod wedi cael eu danfon ar draws yr etholaeth gyfan ac o fewn y terfynau amser y cytunwyd arnynt. Gall hyn gynnwys gofyn i staff dosbarthu lenwi taflenni cofnodi, cael goruchwylwyr i gynnal gwiriadau ar hap, a monitro unrhyw lefelau anarferol o isel o bleidleisiau drwy’r post wedi’u cwblhau sydd wedi’u dychwelyd gan ddosbarthiadau etholiadol.
Cynllunio ar gyfer danfoniadau ad-hoc â llaw
Efallai y bydd amgylchiadau lle bydd angen i chi ddanfon pleidleisiau post â llaw, hyd yn oed pan fydd y rhan fwyaf o’ch pecynnau wedi cael eu danfon drwy’r post, er enghraifft wrth amnewid pecynnau pleidlais bost sydd wedi'u colli neu eu difetha.
Dylech gynllunio sut y bydd hyn yn gweithio’n ymarferol, gan gynnwys sut y byddwch yn sicrhau y gellir argraffu a danfon pecynnau pleidleisio drwy’r post ar fyr rybudd.
Am ragor o wybodaeth ar reoli'r gwaith o ddanfon pecynnau pleidlais bost ychwanegol yn agos at yr etholiad gweler ein canllawiau ar gynllunio ar gyfer darparu pleidleisiau post.