Y drefn ar gyfer ailddarparu o ganlyniad i wall gweithdrefnol
Os ydych chi wedi rhoi pecynnau pleidlais bost anghywir neu anghyflawn mewn camgymeriad, efallai y gallwch ail-ddarparu pecynnau pleidlais bost gan ddefnyddio eich pwerau i gywiro gwall gweithdrefnol.1
Yn dibynnu ar yr amgylchiadau, bydd angen i chi benderfynu a ydych am ailddarparu rhai neu'r holl becynnau pleidlais bost. Er enghraifft, pe bai gwall wrth goladu yn effeithio ar ystod benodol o becynnau, dim ond y pecynnau hynny y byddai angen eu hailddarparu.
Dylid gwneud penderfyniadau ynghylch ailddarparu o ganlyniad i wall gweithdrefnol fesul achos. Ym mhob achos, dylid ystyried yr effaith y gallai’r camgymeriad ac unrhyw gamau i’w gywiro ei chael ar etholwyr. Er enghraifft, bydd angen i chi sicrhau y bydd unrhyw gamau’n cywiro’r gwall heb achosi dryswch diangen nac yn arwain at gamgymeriad gwahanol.
Dylid gwneud unrhyw benderfyniad i gymryd camau i gywiro gwall gweithdrefnol yn dilyn cyngor cyfreithiol. Dylech gofnodi’r gwall ac unrhyw gamau cywiro a gymerwyd rhag ofn bod her i’r etholiad a bod angen hawlio yn erbyn yswiriant.
Pa bynnag gamau a gymerir, dylech sicrhau bod unrhyw gyfathrebu â’r pleidleiswyr hynny yr effeithir arnynt yn esbonio’r camgymeriad yn glir a’r camau rydych yn eu cymryd i’w gywiro. Dylech hefyd roi gwybod i bleidiau, ymgeiswyr ac asiantiaid am y gwall a’r camau cywiro rydych chi’n bwriadu eu cymryd cyn gynted â phosibl. Drwy fod yn dryloyw ynghylch y broblem a’r datrysiad, byddwch yn lleihau’r risg o golli hyder yng ngweinyddiaeth yr etholiadau.
Wrth ystyried defnyddio’r pŵer hwn, dylech gysylltu â Swyddfa Cymru’r Comisiwn, a fydd efallai yn gallu cynnig rhagor o gymorth pwrpasol ichi.
Cadw cofnodion ar gyfer darparu ar ôl gwall gweithdrefnol
Pan fydd pleidlais drwy’r post wedi’i hailddarparu o ganlyniad i wall gweithdrefnol, rhaid canslo’r papur pleidleisio gwreiddiol, ei ychwanegu at y rhestr o bapurau pleidleisio wedi’u canslo, ac ni ddylid caniatáu iddo fynd ymlaen i’r cyfrif.2