Sut i gofrestru eich plaid wleidyddol

Unwaith y byddwch wedi cofrestru'n llwyddiannus, byddwn yn anfon gwybodaeth atoch am eich rhwymedigaethau fel plaid wleidyddol gofrestredig.  

Mae gennych gyfrifoldebau sylweddol fel swyddog plaid wleidyddol, felly mae'n bwysig eich bod yn deall y rhain cyn i chi gofrestru gyda ni. Rydym yn argymell eich bod yn ymgyfarwyddo â'n canllawiau ar gyfer pleidiau gwleidyddol.

Mae gennym dîm Cymorth Rheoleiddiol pwrpasol i'ch helpu i ddeall a chydymffurfio â'r gyfraith. Os oes gennych unrhyw gwestiynau am eich rhwymedigaethau ariannol neu os oes angen unrhyw gymorth neu arweiniad arnoch, cysylltwch â'r tîm drwy e-bostio [email protected].  

Fel trosolwg o'ch rhwymedigaethau, rhaid i blaid wleidyddol gofrestredig, er enghraifft: 

• sicrhau bod pob rhodd a benthyciad dros £500 yn dod o ffynonellau a ganiateir:
  • ffynonellau a ganiateir ar gyfer pleidiau sydd wedi'u cofrestru ym Mhrydain Fawr
  • ffynonellau a ganiateir ar gyfer pleidiau sydd wedi'u cofrestru yng Ngogledd Iwerddon 
• adrodd ar roddion a benthyciadau bob chwarter, ac adrodd yn wythnosol yn ystod etholiad cyffredinol Senedd y DU
  • canllawiau ar roddion a benthyciadau ar gyfer pleidiau sydd wedi'u cofrestru ym Mhrydain Fawr
  • canllawiau ar roddion a benthyciadau ar gyfer pleidiau sydd wedi'u cofrestru yng Ngogledd Iwerddon
• cadw at derfynau gwariant ymgyrchu mewn etholiadau, ac adrodd gwariant ymgyrchu i ni  
• cadw cyfrifon a chofnodion cywir
• anfon cyfrifon blynyddol atom
• os yw incwm neu wariant y blaid dros £250,000 y flwyddyn, rhaid i chi anfon adroddiad archwilydd ar eich cyfrifon blynyddol hefyd
• gweithredu’n gyson â’ch cyfansoddiad a’ch cynllun ariannol, a’u cadw’n gyfredol 
• cynnal manylion y blaid, a'u cadarnhau'n flynyddol.

Mae'r gofynion hyn er mwyn sicrhau uniondeb a thryloywder y cyfreithiau cyllid gwleidyddol, fel bod pleidleiswyr yn deall sut mae pleidiau gwleidyddol yn cael eu hariannu. Os na fyddwch chi'n eu dilyn, efallai y byddwch chi'n destun camau gorfodi. Gallwch ddysgu mwy am sut rydym yn gorfodi'r gyfraith yn ein Polisi Gorfodi.