Cludo blychau pleidleisio a deunyddiau eraill yn ddiogel
Ar y cyd â’ch Pwynt Cyswllt Unigol yn yr heddlu, dylech benderfynu sut byddwch yn sicrhau bod blychau pleidleisio a deunyddiau eraill yn cael eu cludo’n ddiogel i’r dilysu a’r cyfrif.
Fel rhan o hyn, bydd angen i chi asesu a oes gennych chi unrhyw ardaloedd sy'n uchel o ran risg a allai fod angen, er enghraifft, gosgordd yr heddlu, fan diogelwch neu staff ychwanegol i drosglwyddo’r blychau pleidleisio o’r orsaf bleidleisio i’r lleoliad dilysu/man casglu ar ôl i’r gorsafoedd pleidleisio gau.
Diogelwch wrth gludo
Dylech sicrhau bod y Swyddogion Llywyddu yn glir ynghylch y rheolau a’r prosesau ar ôl i’r gorsafoedd pleidleisio gau, yn cynnwys mewn perthynas â selio’r blychau pleidleisio.
Gallwch ddod o hyd i lawlyfr yr orsaf bleidleisio yn yr adran dilysu a chyfrif ar ein tudalen adnoddau.
Dylech bwysleisio i Swyddogion Llywyddu na ddylent fyth adael y blychau pleidleisio na deunyddiau eraill heb oruchwyliaeth ac, os mai hwy eu hunain sy'n danfon y blychau pleidleisio a’r deunyddiau i bwynt casglu neu’r lleoliad dilysu, y dylent gymryd camau i sicrhau eu diogelwch drwy gydol y daith, er enghraifft drwy gloi drysau eu ceir a dilyn unrhyw gyngor penodol gan yr heddlu.
Os yw’r lleoliad ar gyfer cyfrif y pleidleisiau yn wahanol i’r lleoliad dilysu, rhaid i chi selio’r papurau pleidleisio perthnasol mewn blychau pleidleisio neu gynhwysydd addas arall, a chaniatáu i asiantiaid atodi eu seliau. Rhaid i chi gydymffurfio ag unrhyw ofynion yn rheolau’r etholiad megis cymeradwyo disgrifiad o’r ardal y mae’r papurau pleidleisio’n berthnasol iddi ar y blychau pleidleisio a sicrhau bod yr holl ddeunyddiau a gwaith papur gofynnol yn cael eu danfon i leoliad y cyfrif ynghyd â’r papurau pleidleisio.